Tisimu 135 - Tshwa Bible

A dumiswe Nungungulu wa Israeli.

¹ Dumisani Jehova! Dumisani vito ga Jehova; Gi dumiseni, nwina malanza ya Jehova,

² Nwina lava mu yimako ndlwini ya Jehova, Lomu tihubyeni ta yindlu ya Nungungulu wa hina.

³ Dumisani Jehova, hakuva Jehova i nene; Yimbelelani a vito gakwe hakuva ga nanziha.

⁴ Hakuva Jehova i ti hlawulele Jakobe, Na Israeli lezaku ave tshomba yakwe. Ekso. 19:5; Deut. 7:6

⁵ Nza zi tiva lezaku Jehova ngwa hombe, Lezaku a Hosi ya hina yi le hehla ka vanungungulu vontlhe.

⁶ Ni zihi lezi Jehova a zi ranzako wa zi maha, Le tilweni ni laha misaveni, Lomu bimbini ni matsanwini wontihe ya kueta.

⁷ Wa maha marefu ma tlakukela hehla hi le magunweni ya misava, A humesa zingwalangwanza, a nisa vula, Ni ku humesa mheho hi lomu mabakweni yakwe. Jer. 10:13; 51:16

⁸ Hi yena a ngaba matewula ya Gipite, Ya zihari ni ya vanhu. Ekso. 12:29

⁹ I lo rumela zirewukiso ni masingita ka wena Gipite, Hehla ka Faro ni malanza yakwe wontihe. Ekso. 7-10

¹⁰ I lo hlasela mifumo ya hombe, A daya tihosi ta ntamu: Jox. 12:1

¹¹ Sihoni a hosi ya maAmori, na Ogi a hosi ya Baxani, Ni tihosi tontlhe ta le Kanani; Mitse. 21:21

¹² A nyikela tiko gabye giva tshomba, A tshomba ya Israeli, gi nga tiko gakwe.

¹³ Jehova, a vito ga wena gi simamisa kala kupinzuka, Jehova, u ta alakanyiwa zizukulwaneni zontlhe.

¹⁴ Hakuva Jehova i ta yimela vanhu vakwe, A hawukela a malanza yakwe. Deut. 32:36

¹⁵ A zifananiso za vamatiko i siliva ni nzalama, A mitiro ya mandla ya vanhu.

¹⁶ Zi na ni milomu, kanilezi a zi wulawuli; Ni mahlo zi nawo, kanilezi a zi woni;

¹⁷ Zi na ni tindleve, kanilezi a zi ingisi; A ku na kuhefemula milonwini ya zona.

¹⁸ Lava va zi mahako va ta fanana na zona, Zinghaho ni vontlhe lava va zi tsumbako.

¹⁹ Nwina va yindlu ya Israeli, khesani Jehova, Nwina va yindlu ya Aroni, khesani Jehova,

²⁰ Nwina va yindlu ya ka Levi, khesani Jehova; Nwina lava mu chavako Jehova, khesani Jehova.

²¹ A khesiwe Jehova le Zioni, Loyi a tshamako le Jerusalema. Dumisani Jehova!