Tisimu 132 - Tshwa Bible

Hosi, alakanya Davida!

Lisimu la kuya kukhozeleni.

¹ Jehova, alakanya Davida, Ni hlomulo wakwe wontihe.

² Lezaku i hlamhanyisile kuyini ka Jehova, A funga ka Nyamintamu wa Jakobe;

³ Aku: Nzi nga ta enghena ndlwini ya mina, Ge hambu ku etlela sangweni ga mina,

⁴ Nzi nga ta tsika mahlo ya mina ma khomiwa hi wurongo, Hambu tikohe ta mina ti khudzehela,

⁵ Kala nzi mu kumele wutshamu Jehova, A yindlu ya Nyamintamu wa Jakobe. 2 Sam. 7:2; 1 Kro. 17:1; Miti. 7:46

⁶ Languta, hi zi zwile le Efrata, Hi yi kumile sinwini ga Jaar.

⁷ A hi yeni tendeni gakwe, Hi ya khozela xikhegetelweni xa mikonzo yakwe.

⁸ Vuka, Jehova, u enghena kuhumuleni ka wena, Wena ni arke ga wukulu ga wena. Mitse. 10:35; 2 Kro. 6:41

⁹ A vapristi va wena a va ambale kululama, Ni vobasa va wena va kanyuluka hi kutsaka.

¹⁰ Hi kota ya nanza ga wena Davida, U nga fulareli a totilweko wa wena.

¹¹ Jehova i mahile xihlambanyo xi nene ka Davida, Cima a nga ta hunzuluka ka xona; Ite: Nzi ta veka xitshanwini xa wuhosi xa wena a nʼwana wa nyimba ya wena. 2 Sam. 7:11; Miti. 2:30

¹² Loku a vana va wena va hlayisa xivumelwano xa mina, Ni zileletelo lezi nzi ta nga va gonzisa, A vana vabyewo va ta tshama xitshanwini xa wena xa wuhosi kala kupinzuka.

¹³ Hakuva Jehova i hlawule Zioni, I xuvile ku gi maha wuakelo gakwe.

¹⁴ Aku: Legi wuhumulelo ga mina kala kupinzuka, Nzi ta aka kwalaha, hakuva nzi ku navele.

¹⁵ Nzi ta katekisa nguvu a pfuno wa gona, Nzi xurisa vavumali va gona hi zakuga.

¹⁶ Nzi ta ambexa vapristi va gona hi kuhanyisa, Ni vakubasa va gona va ta kanyuluka hi litsako.

¹⁷ Laho nzi ta tiyisa limhonzo la Davida, Nzi yimisile kona a kandiya ka a totilweko wa mina. 1 Tih. 11:36; Lu. 1:69; 2:32

¹⁸ Nzi ta ambexa valala vakwe hi tingana, Kanilezi a xidlodlo xa wuhosi xi ta hatima hlokweni yakwe.