Tisimu 12 - Tshwa Bible

Ta ku kombelela a zisiwana ni vavumali.

Ka muchuli wa Xeminite. Lisimu la Davida.

¹ Hanyisa, Jehova, hakuva lava va lulamileko va mbhelile, A va kholekileko a va ha hi kona xikari ka vanana va vanhu. Isa. 57:1; Mika 7:2

² Va hembelana mawunwa ni vaakelane vabye, Va xengetela hi milomu yabye, Va wulawula hi timbilu timbiri.

³ Jehova a hetise a milomu yi wulawulako mahlenga, Ni lirimi leli li wulawulako matshanza.

⁴ Lava va nge: Hi tirimi ta hina hi na ni ntamu; A milomu nja hina, himani a hi fumako? Ekso. 5:2

⁵ Hi kota ya kutsimbeketwa ka zisiwana ni kurila ka vavumali, Nzi ta vuka makunu, ku wula Jehova; Nzi ta ponisa loyi a zi langutelako.

⁶ A timhaka ta Jehova timhaka ti basileko, Ti khwatsi i siliva yi hlutilweko, Yi basisilweko ntlhanu ni mambiri makhati. 2 Sam. 22:31; Mav. 30:5

⁷ Jehova, u ta va hlayisa; U ta va lonzowota ka lexi xizukulwana kala kupinzuka.

⁸ A vakubiha va ti fambela matshanwini wontihe, Loku a kukhohlakala ku su fenemete xikari ka vana va vanhu.