Tisimu 119 - Tshwa Bible

A nayo wa Jehova.

¹ Va katekile lava va mbheleleko mahanyeleni yabye, Lava va fambako nayweni wa Jehova.

² Va katekile lava va hlayisako wumboni gakwe, Lava va mu lavako hi mbilu yabye yontlhe. Joh. 14:21, 23; 1 Joh. 3:23

³ Lava va nga mahiko kubiha, Va fambako tindleleni takwe.

⁴ U hi nyikile zileletelo za wena, Lezaku hi zi hlayisa hi kupinyama.

⁵ A tindlela ta mina ngha ti basiswa, Kasi nzi hlayisa ziyimiso za wena.

⁶ Zonake nzi nga tava na tingana, Laha na nzi chela kota hi zileletelo za wena.

⁷ Nzi ta ku bonga hi mbilu yi basileko, Laha na nzi gonza a zilayelo za wena zi lulamileko.

⁸ Nzi ta hlayisa a ziyimiso za wena; U nga nzi tsikeli magumo.

⁹ A jaha gi nga basisisa kuyini a ndlela ya gona ke? Hi ku gonga a mhaka ya wena.

¹⁰ Nza ku hlota hi mbilu ya mina yontlhe, U nga nzi tsiki nzi hambuka zileletelweni za wena.

¹¹ Nza fihla mhaka ya wena mbilwini yanga, Lezaku nzi nga ku onheli.

¹² A ku khesiwe, wena Jehova! Nzi gonzise a ziyimiso za wena.

¹³ Hi milomu ya mina nzi tlhatlhambutele Zilayelo zontlhe za nomu wa wena.

¹⁴ Nza tsaka hi ndlela ya wumboni ga wena Kukotisa loku nzi hi ni titshomba tontlhe.

¹⁵ Nzi ta ehleketa zontlhe zileletelo za wena, Nzi khatalela a tindlela ta wena.

¹⁶ Nzi ta tsakela ziyimiso za wena, Nzi nga rivali a mhaka ya wena.

¹⁷ Mahela zinene a nanza ga wena, Kasi nza hanya, nzi hlayisa a mhaka ya wena.

¹⁸ Vulula mahlo ya mina, Kasi nza wona mahanjalati ya nayo wa wena.

¹⁹ Nzi muenzi laha misaveni; U nga nzi fihleli zileletelo za wena. 1 Kro. 29:15; Maheb. 11:13

²⁰ A muhefemulo wa mina wa mbhela ntamu Hi ku navela zilayelo za wena xontlhe xikhati.

²¹ U layile a vamatshanza lava va rukilweko, Lava va hambunyetako a zileletelo za wena. Deut. 27:26; Gal. 3:10

²² Susa ka mina a nzhukano ni xikanya, Hakuva nzi hlayisile a wumboni ga wena.

²³ A tihosana ti tshama ti wulawulisana ha mina, Kanilezi a nanza ga wena gi ehleketa a ziyimiso za wena.

²⁴ Nzi tsakela wumbonini ga wena, Hi masungukati ya mina.

²⁵ A muhefemulo wa mina wu namarela ntshurini, Nzi ponise kukotisa a mhaka ya wena.

²⁶ Nzi hlawutele hi tindlela ta mina, u nzi hlamule; Nzi gonzise ziyimiso za wena.

²⁷ Nzi pimise a ndlela ya zileletelo za wena, Zonake nzi ta gugutsela hi zihlamaliso za wena.

²⁸ A muhefemulo wa mina wa rila hi hlomulo, Nzi tiyise kukotisa a mhaka ya wena.

²⁹ A ndlela ya mawunwa a yive kule na mina, U nziha hi tipswalo ku tiva a nayo wa wena.

³⁰ Nzi hlawule a ndlela ya kutsumbeka, A zilayelo za wena nzi zi vekile mahlweni ka mina.

³¹ Nzi namarela wumbonini ga wena, Jehova, u nga nzi wisi tingana.

³² Nzi ta tsutsuma ndleleni ya zileletelo za wena, Laha wena u anamisako a mbilu ya mina.

³³ Jehova, nzi gonzise a ndlela ya ziyimiso za wena, Nzi ta zi hlayisa kala magumo.

³⁴ Nzihe kupima, nzi ta hlayisa a nayo wa wena, Futsi, nzi ta wu hlayisa hi mbilu ya mina yontlhe.

³⁵ Nzi mahe nzi famba zileletelweni za wena, Hakuva nza zi tsakela.

³⁶ Kokela a mbilu ya mina wumbonini ga wena, Lezaku yi ngayi kumbilukeleni.

³⁷ Hambukisa a mahlo ya mina lezaku ma nga cuwuki lezi zi nga nyawuliko, U nzi hanyisa tindleleni ta wena.

³⁸ Tiyiseta nanza ga wena a mhaka ya wena, Leyi u yi tsumbisileko ka tava va ku chavako.

³⁹ Ahlukanisa kule na mina a nzhukano leyi nzi yi chavako, Hakuva a kulamula ka wena ku nene.

⁴⁰ Languta, nzi lavela a zileletelo za wena, Nzi hanyise hi kululama ka wena.

⁴¹ Jehova, a wuxinji ga wena a gite ka mina, Ni kuhanyisa ka wena khwatsi hi mhaka ya wena.

⁴² Kasi nza zi kota ku hlamula loyi a nzi rukako, Hakuva nzi tsumba a mhaka ya wena.

⁴³ U nga suseli magumo a mhaka ya zinene nonwini wa mina, Hakuva nzi tsumbile zileletelo za wena.

⁴⁴ Nzi ta simamisa ku hlayisa nayo wa wena, Kala kupinzuka ni kupinzuka.

⁴⁵ Nzi ta famba wutshanwini gi anamileko, Hakuva nzi hleleketa a zileletelo za wena.

⁴⁶ Nzi ta hlawutela wumboni ga wena mahlweni ka tihosi, Cima nzi nga tava na tingana.

⁴⁷ Nzi ta tsakela zileletelo za wena, Lezi nzi zi ranzako.

⁴⁸ Nzi ta tlakusela mandla ya mina zileletelweni za wena, Lezi nzi zi ranzako; Nzi ta ehleketa a ziyimiso za wena.

⁴⁹ Alakanya a gezu u nga gi wula ka nanza ga wena, Legi u nga nziha ha gona kutsumba.

⁵⁰ Loku hi kuchavelelwa ka mina hlomulweni, Lezaku a mhaka ya wena yi nzi hanyisile.

⁵¹ A vamatshanza va nzi hleka nguvu, Kanilezi a nzi hambukangi nayweni wa wena.

⁵² Jehova, nzi alakanya a zilayelo za wena za kale, Nzi tangaliswa.

⁵³ Nzi zangara hi kota ya vakubiha, Loku nzi va wona va tsika nayo wa wena.

⁵⁴ A ziyimiso za wena tisimu ta mina, A ndlwini ya wuenzi ga mina.

⁵⁵ Jehova, nzi alakanya a vito ga wena laha wusikwini, Nzi hlayisa a nayo wa wena.

⁵⁶ Xiavelo xa mina Hakuva nzi hlayisile a zileletelo za wena.

⁵⁷ Jehova xiavelo xa mina, Nzi wulile lezaku nzi ta hlayisa timhaka ta wena.

⁵⁸ Nzi ku khongeta hi mbilu ya mina yontlhe, Nzi zwele wuxinji kukotisa gezu ga wena.

⁵⁹ Nzi alakanyela hi mahanyela ya mina, Nzi renzeleta mikonzo ya mina wumbonini ga wena.

⁶⁰ Nzi hatlisa, a nzi hlweli Ku gonga zileletelo za wena.

⁶¹ A maziyo ya vakubiha ma nzi tsonzele, Kanilezi a nzi rivali nayo wa wena.

⁶² Nzi ta vuka xikari ka wusiku nzi ku bonga, Hi kota ya kulamula ka wena ku lulamileko. Miti. 16:25

⁶³ Nzi xaka ga vontlhe lava va ku chavako; Ni lava va hlayisako zileletelo za wena.

⁶⁴ Jehova, a misava yi tele hi wuxinji ga wena, Nzi gonzise a ziyimiso za wena.

⁶⁵ Jehova, u mahele zinene a nanza ga wena, Kukotisa a mhaka ya wena.

⁶⁶ Nzi gonzise kupimisisa ni wutivi, Hakuva nza kholwa zileletelo za wena.

⁶⁷ Na nzi nga se kuva hlomulweni nzi wa pengile, Kanilezi makunu nza gonga a mhaka ya wena.

⁶⁸ Wena u nene, u maha kusaseka, Nzi gonzise ziyimiso za wena.

⁶⁹ A vamatshanza va nzi hembele wunwa, Nzi ta hlayisa zileletelo za wena hi mbilu ya mina yontlhe.

⁷⁰ A timbilu tabye ti nonile, a vazwi nchumu; Kanilezi mina nzi tsakela nayo wa wena. Deut. 32:15

⁷¹ Zi nzi sasekele a kuva nzi hlokiswa, Kasi nza gonza ziyimiso za wena.

⁷² A nayo wa nomu wa wena wucukwana Ku hunza makume ya mazana ya zipanze za nzalama ni siliva.

⁷³ A mandla ya wena ma lo nzi maha, ma nzi wumba; Nzihe kupima kasi nza gonza zileletelo za wena.

⁷⁴ Lava va ku chavako va ta tsaka loku va nzi wona, Hakuva nza tsumba a gezu ga wena.

⁷⁵ Jehova, nza zi tiva lezaku a kulamula ka wena ku lulamile, Lezaku u nzi hlokisile hi kutsumbeka.

⁷⁶ Nza kombela lezaku nzi tangaliswa hi wuxinji ga wena, Kota lezi u tsumbisileko a nanza ga wena.

⁷⁷ A tipswalo ta wena a tite ka mina, kasi nza hanya; Hakuva a nayo wa wena wa nzi tsakisa.

⁷⁸ Ngha vamatshanza va wiswa tingana, hakuva va nzi xanisa ahandle ka nanzu; Kanilezi mina nzi ta ehleketa a zileletelo za wena.

⁷⁹ Lava va ku chavako a va tlhelele ka mina, Ni lava va tivako wumboni ga wena.

⁸⁰ A mbilu ya mina a yi mbhelele ziyimisweni za wena; Kasi nzi nga wiswi tingana.

⁸¹ A muhefemulo wa mina wu navelisisa nguvu a kuhanyisa ka wena, Nzi tsumba a gezu ga wena. Gen. 49:18; Lu. 2:25, 30

⁸² A mahlo ya mina ma langutela a zitsumhiso xa wena, Nziku: U ta nzi chavelela rini?

⁸³ Nzi womile kota nkwama lomu ka musi, Kanilezi a nzi rivali ziyimiso za wena.

⁸⁴ A masiku ya nanza ga wena ma ngani ke? Hi rini u ta nga nzi lamulela ka vaxanisi va mina ke?

⁸⁵ A vamatshanza va nzi kelele marinzi, Lava va nga fambiko nayweni wa wena.

⁸⁶ Zontlhe zileletelo za wena zi tsumbekile; Va nzi xanisa mahala, nzi vune.

⁸⁷ Va wa lava ku nzi lovisa laha misaveni; Kanilezi a nzi tsiki zileletelo za wena.

⁸⁸ Nzi hanyise hi tipswalo ta wena, Kasi nza gonga a zikhumbuxeto za nomu wa wena.

⁸⁹ Jehova, a mhaka ya wena yi tiyile le tilweni Kala kupinzuka. Isa. 40:8; Lu. 21:33

⁹⁰ A kutsumbeka ka wena ku tsonzoma ka xizukulwana ni xizukulwana. U seketele misava, yi tshama yi tiyile.

⁹¹ Za ha yimile ni nyamutlha kukotisa zileletelo za wena, Hakuva zontlhe zi lahasi ka wena.

⁹² Loku nzi wa nga tsakelangi a nayo wa wena, Ngha nzi lovile hlomulweni wa mina.

⁹³ Cima nzi nga ta rivala a zileletelo za wena, Hakuva u nzi hanyisile ha zona.

⁹⁴ Nzi wa wena, nzi hlangute; Hakuva nza hlota zileletelo za wena. Rom. 14:8; 1 Kor. 6:20

⁹⁵ A vakubiha va rinzele ku nzi lovisa, Kanilezi nzi ta alakanya zikhumbuxeto za wena.

⁹⁶ Nzi wonile magumo ya zontlhe leʼzi mbheleleko, Kanilezi a zileletelo za wena a zi na mbhingano.

⁹⁷ E, nzi wu ranzisa kuyini a nayo wa wena! Nzi wu alakanya gontlhe siku.

⁹⁸ A zileletelo za wena za nzi tlharihisa ku hunza valala va mina, Hakuva zi na mina xontlhe xikhati.

⁹⁹ Nzi na ni kupimisisa ku hunza vagonzisi va mina vontlhe, Hakuva nzi ehleketa a zikhumbuxeto za wena.

¹⁰⁰ Nza tiva ku hunza vakale, Hakuva nzi hlayisile a zileletelo za wena.

¹⁰¹ Nzi potsolokisile milenge ya mina tindleleni tontlhe ta kubiha, Kasi nza gonga a mhaka ya wena.

¹⁰² A nzi hambukangi zilayelweni za wena, Hakuva wena wa nzi gonzisa.

¹⁰³ A timhaka ta wena ti nanzihisa kuyini lirimini la mina, Ti tsombela ku hunza wulombe nonwini wa mina.

¹⁰⁴ A zileletelo za wena za nziha kupimisisa, Hikwalaho nza venga tontlhe tindlela ta mawunwa.

¹⁰⁵ A mhaka ya wena i kandiya mikonzweni ya mina, Ni kuwonekela le ndleleni ya mina. Mav. 6:23; 2 Ped. 1:19

¹⁰⁶ Nzi hlambanyile, nza zi tiyisa Lezaku nzi ta hlayisa a zilayelo za wena zi lulamileko.

¹⁰⁷ Nza hlokiswa nguvu; Jehova, nzi hanyise kukotisa kuwula ka wena.

¹⁰⁸ Jehova, amukela a minyikelo yi humako nonwini wa mina, U nzi gonzisa a ziyimiso za wena.

¹⁰⁹ A wutomi ga mina gi wa hi mhangweni ya kufa, Kanilezi a nzi rivali nayo wa wena. 1 Sam. 19:15

¹¹⁰ A vakubiha va nzi vekele a nzhiyo, A nzi hambunyetangi a zileletelo za wena.

¹¹¹ A zikhumbuxeto za wena zi mahile tshomba ya mina kala kupinzuka, Hakuva zi tsakisa a mbilu ya mina.

¹¹² Nzi koramisile a mbilu ya mina a ku maha milayo ya wena, Ku kala ku chikela magumelweni.

¹¹³ Nza venga lava va timbilu timbiri, Kanilezi a nayo wa wena nza wu ranza. 1 Tih. 18:21; Jak. 1:8

¹¹⁴ U wuchavelo ga mina ni xitlhangu xa mina, Nza tsumba a mhaka ya wena.

¹¹⁵ Sukani ka mina, nwina vobiha, A kuva nzi hlayisa a zileletelo za Nungungulu wa mina.

¹¹⁶ Nzi tiyise kotisa xitsumbiso xa wena, kasi nza hanya; Nzi nga wiswi tingana kutsumbeni ka mina. Rom. 5:4

¹¹⁷ Nzi tiyise lezaku nzi pona, A ziyimiso za wena zi tava mahlweni ka mina xontlhe xikhati.

¹¹⁸ U kanyisa vontlhe va hambunyetako milayo ya wena. Hakuva a kukhohlisa kabye a ku vuni nchumu.

¹¹⁹ U susa vontlhe vakubiha va misava khwatsi makaha, Hikwalaho nza ranza a zikhumbuxeto za wena.

¹²⁰ A miri wa mina wa rurumela hi ku chava wena, Nza chava ni kulamula ka wena.

¹²¹ Nzi hlayisile nayo ni nongameto, U nga nzi tsiki mandleni ya vatsimbeketi va mina.

¹²² Yimela a mhaka ya nanza ga wena kasi ga humelela, A vamatshanza va nga dzuki va nzi tsimbeketa.

¹²³ A mahlo ya mina ma navela a kuhanyisa ka wena, Ni mhaka ya wena yi lulamileko.

¹²⁴ Maha ka nanza ga wena kotisa wuxinji ga wena, U nzi gonzisa ziyimiso za wena.

¹²⁵ Nzi nanza ga wena, nzihe kupimisisa, Kasi nza fela ku tiva zikhumbuxeto za wena.

¹²⁶ Jehova, xikhati xa wena a kuva u tira, Hakuva va fuvisile nayo wa wena.

¹²⁷ Nza ranza zileletelo za wena ku hunza nzalama, Ku hunza nzalama yi basileko.

¹²⁸ Nza wona lezaku a zileletelo za wena zontlhe zi lulamile, Nzi venga a tindlela tontlhe ta mawunwa.

¹²⁹ A zikhumbuxeto za wena za hlamalisa, Hikwalaho a muhefemulo wa mina wa zi hlayisa.

¹³⁰ A kuvululwa ka timhaka ta wena ka woningela, Ku nyika kupima ka lava va nga tlharihangiko. 2 Tim. 3:15

¹³¹ Nzi ahlamisa nomu wa mina, nzi hefemuteka, Hakuva nzi navela a zileletelo za wena.

¹³² Nzi cuwuke, u nzi mahela wuxinji, Kota lezi u toloveleko ku mahela lava va ranzako vito ga wena.

¹³³ Tiyisa milenge ya mina mhakeni ya wena, U nga vumeli ni kugoha kunwe ku nzi fumela.

¹³⁴ Nzi tlhatlhise ka lava va nzi tsimbeketako, Lezaku nzi hlayisa zileletelo za wena.

¹³⁵ A nghohe ya wena a yi woningele nanza ga wena, U nzi gonzisa ziyimiso za wena. Mitse. 6:25

¹³⁶ A mahlo ya mina ma khulunga a micongo ya mati, Hakuva a va hlayisi nayo wa wena.

¹³⁷ Jehova, u lulamile, Ni kulamula ka wena ku nene. Deut. 32:4

¹³⁸ U vekile zikhumbuxeto za wena hi nongameto, Ni kutsumbeka ka hombe.

¹³⁹ A kupangama ka mina ka nzi mbheta ntamu, Hakuva a valala va mina va rivele a timhaka ta wena.

¹⁴⁰ A mhaka ya wena yi basile nguvu, A nanza ga wena ga yi ranza.

¹⁴¹ Nzi tsongwani, nzi kanyiswa, A nzi rivali a zileletelo za wena.

¹⁴² A kululama ka wena ka simasima, A nayo wa wena hi zinene.

¹⁴³ A zikarato ni hlomulo za nzi tikela, Kanilezi nza tsakela zileletelo za wena.

¹⁴⁴ A zikhumbuxeto za wena zi lulamile kala kupinzuka, Nzihe kupimisisa kasi nza hanya.

¹⁴⁵ Nzi khongeta hi mbilu ya mina yontlhe, nzi hlamule, Jehova, Nzi ta hlayisa milayo ya wena.

¹⁴⁶ Nzi khongeta ka wena, nzi ponise, Kasi nza hlayisa zikhumbuxeto za wena.

¹⁴⁷ Nzi rangela wuronga nziba huwa, Nzi tsumba a gezu ga wena.

¹⁴⁸ A mahlo ya mina ma rangela kurinza ka wusiku, Lezaku nzi ehleketa a mhaka ya wena.

¹⁴⁹ Zwana gezu ga mina kotisa tipswalo ta wena, Jehova, nzi hanyise kotisa zilayelo za wena.

¹⁵⁰ Lava va lanzako kubiha va tshinele, Va ta kuta ni nayo wa wena.

¹⁵¹ Jehova, wena u laha kusuhani, Zontlhe zilayelo za wena zi nene.

¹⁵² Kale na nzi tivile a zikhumbuxeto za wena, Lezaku u zi tiyisile kala kupinzuka.

¹⁵³ Languta kuxaniseka ka mina, u nzi ponisa, Hakuva a nzi rivali a nayo wa wena.

¹⁵⁴ Yimela a mhaka ya mina, u nzi tlhatlhisa, Nzi hanyise kota kuwula ka wena.

¹⁵⁵ A kuhanyiswa ku le kule ni vakubiha, Hakuva a va khataleli a milayo ya wena.

¹⁵⁶ Jehova, a tipswalo ta wena ta hombe, Nzi hanyise kukotisa kulamula ka wena.

¹⁵⁷ Mbanyingi a vaxanisi ni valala va mina, Kanilezi a nzi hambunyetangi a zikhumbuxeto za wena.

¹⁵⁸ Nzi swireka loku nzi wona vakanganyisi, Hakuva a va hlayisi a mhaka ya wena.

¹⁵⁹ Alakanya lezaku nza ranza a zileletelo za wena, Jehova, nzi hanyise hi tipswalo ta wena.

¹⁶⁰ A zinene xiseketelo xa mhaka ya wena, A zileletelo zontlhe zi lulamileko za wena za kala kupinzuka. Joh. 17:17

¹⁶¹ A tihosana ta nzi xanisa handle ka nanzu, Kanilezi a mbilu ya mina yi chava mhaka ya wena.

¹⁶² Nza tsakela kuwula ka wena, Khwatsi hi munhu a kumako muphango wa hombe.

¹⁶³ Nza venga ni ku nyenya mawunwa, A nayo wa wena nza wu ranza.

¹⁶⁴ Nza ku dumisa ntlhanu wa makhati ni mambiri hi siku, Hi kota ya kulamula ka wena ku lulamileko.

¹⁶⁵ Va na ni kurula ka hombe lava va ranzako nayo wa wena, A xi kona xo va khunguvanyisa.

¹⁶⁶ Jehova, nzi langutele kuhanyisa ka wena, Nzi mahile zilayelo za wena. Gen. 49:18; Lu. 2:25, 30

¹⁶⁷ Muhefemulo wa mina wu gonga a zikhumbuxeto za wena, Nza zi ranza ku hunza mpimo.

¹⁶⁸ Nza hlayisa a zileletelo za wena ni zikhumbuxeto za wena, A tindlela tontlhe ta mina ti ta mahlweni ka wena.

¹⁶⁹ Jehova, a kurila ka mina a kute mahlweni ka wena, Nzihe kupimisisa khwatsi hi kuwula ka wena.

¹⁷⁰ A kukhongela ka mina a kute mahlweni ka wena, Nzi ponise kukotisa kuwula ka wena.

¹⁷¹ A milomu ya mina ya ku dumisa, Hakuva wa nzi gonzisa milayo ya wena.

¹⁷² A lirimi la mina a li yimbelela hi mhaka ya wena, Hakuva zontlhe zileletelo za wena zi nene.

¹⁷³ A canja ga wena a gi nzi vune, Hakuva nzi ti hlawulele a zileletelo za wena.

¹⁷⁴ Jehova, nza navela a kuhanyisa ka wena, A nayo wa wena litsako la mina.

¹⁷⁵ A muhefemulo wa mina a wu hanye, kasi wa ku dumisa, A zileletelo za wena a zi nzi vune.

¹⁷⁶ Nzi pengile khwatsi hi yivu yi lahlekileko, Hlota nanza ga wena, Hakuva a nzi rivali milayo ya wena. Isa. 53:6; Lu. 15:4