Tisimu 116 - Tshwa Bible

Jehova i nzi ponisile.

¹ Nzi ranza Jehova, hakuva i zwile A gezu ga mina ni mikhongelo ya mina.

² Hakuva i kangatele a ndleve yakwe ka mina, Nzi ta mu khongela a masiku wontihe ya kuhanya ka mina.

³ A magota ya kufa ma nzi tsonzele, Ni kubayisa ka Xeole ku nzi khomile, Nzi kumile kuxaniseka ni khombo. 2 Sam. 22:5

⁴ Zonake nzi lo khongela vitweni ga Jehova, nziku: Jehova, nza ku khongela, hlanguta muhefemulo wa mina.

⁵ Jehova ngwa tipswalo ni kululama, Nungungulu wa hina i na ni wuxinji.

⁶ Jehova wa lonzowota loyi a nga tlharihangiko; Nzi wa hi khombyeni, i lo nzi vuna.

⁷ Tlhelela kuhumuleni ka wena, muhefemulo wanga, Hakuva Nungungulu i ku katekisile.

⁸ Hakuva u ponisile muhefemulo wa mina kufeni, Ni mahlo ya mina mihlotini, ni milenge ya mina kuweni.

⁹ Nzi ta famba mahlweni ka Jehova A tikweni ga vahanyako.

¹⁰ Nzi lo kholwa laha nzi nga wula: Nzi wa hlokiswa nguvu, 2 Kor. 4:13

¹¹ Nzi wula mahikeni ya mina, nziku: Vontlhe vanhu mbahembi. Rom. 3:4

¹² Nzi ta mu tlhelisela yini Jehova, Hi kota ya makatekwa wontihe a nga nziha wona?

¹³ Nzi ta teka a gombe ga kuhanyiswa, Nzi khongela vitweni ga Jehova.

¹⁴ Nzi ta rihela zifungo za mina ka Jehova, Kuwoneni ka vanhu vakwe vontlhe.

¹⁵ Ku na ni lisima mahlweni ka Jehova A kufa ka vakubasa vakwe.

¹⁶ Jehova, hizinene, nzi nanza ga wena, Nzi nanza ga wena, a nʼwana wa nanza ga wena ga xisati; Wena u tlhatlhile a magota ya mina.

¹⁷ Nzi ta nyikela ka wena a muphahlo ya kubonga, Nzi ta khongela vitweni ga Jehova.

¹⁸ Nzi ta riha zifungo za mina ka Jehova, Kuwoneni ka vanhu vakwe vontlhe,

¹⁹ Lomu ziluvelweni za yindlu ya Jehova, Lomu xikari ka wena Jerusalema. Dumisani Jehova!