Tisimu 112 - Tshwa Bible

Va katekile lava va lulamileko.

¹ Dumisani Jehova! I katekile a munhu loyi a chavako Jehova, Loyi a tsakelako nguvu milayo yakwe.

² A pswalo wakwe wu tava ni ntamu misaveni, A xizukulwana xa vakululama xi ta katekiswa.

³ A titshomba ni kufuma zi tava ndlwini yakwe, A kululama kakwe ku simamisa kala kupinzuka.

⁴ Lomu munyameni a wakululama i ta wona kuwonekela; Yena ngwa tipswalo, ni wuxinji, i lulamile.

⁵ I katekile a munhu loyi a zwelako wusiwana, a lombisa, A timhaka takwe ti ta yimeliwa kulamulweni. Mav. 14:21; Lu. 6:34

⁶ Hakuva cima a nga ta tsekatsekiswa, A wakululama i ta alakanyiwa kala kupinzuka.

⁷ A nga ta chava a mahungu yo biha, A mbilu yakwe yi tiyile, yi tsumba Jehova.

⁸ A mbilu yakwe yi tiyile, a yi chavi nchumu, Kala ava ni zigingi hehla ka valala vakwe.

⁹ Wa hana, a nyika ka lava va vumalako; A kululama kakwe ku simamisa kala kupinzuka; A limhonzo lakwe li ta tlakuswa hi wudzunzo. 1 Sam. 2:1; 2 Kor. 9:9

¹⁰ A wakubiha i ta zi wona a tsanwa, I ta getsela meno, a hlomuka; A kuxuva ka wakubiha ku ta fuva.