Tisimu 111 - Tshwa Bible

A mitiro ya Jehova nja hombe.

¹ Dumisani Jehova! Nzi ta bonga Jehova hi mbilu ya mina yontlhe Lomu tlhanganweni wa valulamileko ni le hlengeletanweni.

² A mitiro ya Jehova nja hombe, Yi ehleketiwa hi vona lava va yi tsakelako.

³ A ntiro wakwe ngwa wudzunzo ni wuhosi, A kululama kakwe ku simamisa kala kupinzuka.

⁴ I mahile lezaku a mitiro yakwe yi fela ku alakanyiwa; Jehova ngwa tipswalo, i tele hi wuxinji.

⁵ I nyika zakuga ka lava va mu chavako, Xontlhe xikhati wa alakanya a xivumelwano xakwe.

⁶ I kombisile a vanhu vakwe a ntamu wa mitiro yakwe, Hi ku va nyika a tshomba ya vamatiko.

⁷ A mitiro ya mandla yakwe nja kutsumbeka ni nongameto, A zileletelo zakwe zontlhe zi tiyile.

⁸ Zi yimile kala kupinzuka, Zi mahilwe hi kutsumbeka ni kululama.

⁹ I rumele kutlatlheka ka vanhu vakwe, I yimisile a xivumelwano xakwe kala kupinzuka; A vito gakwe gi basile, ga chaveka.

¹⁰ A kuchava Jehova hi masangulo ya wutlhari, Vontlhe va ku gongako va na ni kupimisisa kunene. A kudumisiwa kakwe ku simamisa kala kupinzuka. Joba 28:28; 1 Tim. 4:8