Tisimu 106 - Tshwa Bible

A vaIsraeli va rivele Nungungulu.

¹ Dumisani Jehova! Khesani Jehova, hakuva i nene; Hakuva a wuxinji gakwe gi simamisa kala kupinzuka.

² Himani a nga hlawutelako a zimaho za ntamu za Jehova, Ni ku zwatisa a wudumo gakwe gontlhe?

³ Va katekile, lava va hlayisako nongameto, Lava va mahako kululama xontlhe xikhati.

⁴ Jehova, nzi alakanye hi tipswalo leti u mahelako vanhu va wena, U nziha a kuhanyisa ka wena,

⁵ Kasi nza fela ku wona a kuvuvuma ka vahlawulilweko va wena, Nzi nengela hi litsako la tiko ga wena, Kasi nza hlalela zinwe ni zigatshomba za wena.

⁶ Hina hi onhile ku fana ni vadadani va hina, Hi gohile, hi tira kubiha. Levi 26:40; Jer. 3:25; Dan. 9:5

⁷ A vadadani va hina a va khatalelangi zihlamaliso za wena le Gipite, A va alakanyangi a wuxinji ginyingi ga wena, Kanilezi va lo ku hluwuka le bimbini, gi nga Bimbi go Pswhuka.

⁸ Hambu zi hi tano, a va ponisa hi kota ya vito gakwe, Kasi ku tivekisa a wukulu ga ntamu wakwe.

⁹ A kawuka a Bimbi go Pswhuka, gipswa, A va rangela lomu kueteni khwatsi hi lomu xiwuleni. Ekso. 14:21; Isa. 63:10-12

¹⁰ A va ponisa mandleni ya vavengi, A va tirula mandleni ya valala.

¹¹ A mati ma khubunyeta valala vabye, Ku nga poni ni munwe wabye,

¹² Zonake va lo kholwa timhaka takwe, Va yimbelela kudumisa kakwe.

¹³ Va lo hatlisa va rivala mitiro yakwe, A va rinzelangi a makungo yakwe.

¹⁴ Kanilezi va lo engheniwa hi kunavela lomu xiwuleni, Va ringa Nungungulu kona. Ekso. 16:3; Mitse. 11:4; 1 Kor. 10:6

¹⁵ A va nyika kota kukombela kabye, Kanilezi a va maha va swireka timbilwini tabye.

¹⁶ Va lusela Mosi lomu wugovelweni, Na Aroni a basileko wa Jehova. Mitse. 16:1

¹⁷ A misava yi avanyeka, yi mita Datani, Yi khubunyeta a ntlawa wa Abiramu.

¹⁸ A nzilo wu lo vura hlengeleta nweni yabye, A malangavi ma hisa a vakubiha.

¹⁹ Va maha a role le Horebe, Va khizamela a xifananiso xi chululweko. Ekso. 32:1

²⁰ Va lo hunzulusa wukosi gabye, Va nyikwa a xifananiso xa homu yi gako byanyi. Jer. 2:11; Rom. 1:23

²¹ Va lo rivala Nungungulu, Muhanyisi wabye, Loyi a nga maha zilo za hombe le Gipite;

²² Ni zirewukiso lomu tikweni ga Hamu, Ni zilo zo tshisa le Bimbini go Pswhuka.

²³ Hikwalaho i lo wula lezaku i wa ta va lovisa, Loku Mosi a hlawulilweko wakwe, a wa nga yimangi mahlweni kakwe, Kasi ku rengisa a zanga yakwe, lezaku a nga va lovisi. Ekso. 32:11

²⁴ Va lo nyenya a tiko leʼgo saseka, A va kholwangi gezu gakwe.

²⁵ Kanilezi va lo kalala lomu matendeni yabye, Va nga ingisi a gezu ga Jehova.

²⁶ Hikwalaho i lo va tlakusela a canja gakwe, Kasi ku va wisa lomu xiwuleni; Mitse. 14:21; 1 Kor. 10:5

²⁷ Ni ku hangalasa vanana vabye xikari ka matiko, A va hangalasa matikweni wontihe. Levi 26:38

²⁸ Va lo namarela ka Baal-Peor, Vaga miphahlo ya vafileko. Mitse. 25:2

²⁹ Va zangarisa Nungungulu hi zimaho zabye, A ntungu wu lo wela hehla kabye.

³⁰ Zonake ku huma Fineasi a lamula mhaka, A ntungu wu gawula. Mitse. 25:7

³¹ Lezo zi mu hlayelwa kululama, Ka zontlhe zizukulwana kala kupinzuka.

³² Va lo zangarisa Nungungulu ni le matini ya Meriba, Laha ka kuva Mosi a humelwa hi khombo hi kota yabye.

³³ Hakuva va lo zangarisa moya wakwe, Lezaku Mosi a wulawula zahava hi milomu yakwe.

³⁴ A va lovisangi a tixaka Leti Jehova a nga wa va leletele ha tona. Deut. 7:1; 12:2; Vala. 1:21

³⁵ Kanilezi va lo tlhangana ni vamatiko, Va gonza mahanyela yabye.

³⁶ Va lo khizamela zifananiso zabye, Lezi zi nga va phasamisa.

³⁷ Futsi, va lo phahlela ka madimoni Hi varisanyana ni vanhwana vabye. 2 Tih. 21:6; 23:10; Jer. 7:31

³⁸ Va halata nkhata wu nga hiko na nanzu, A nkhata wa varisanyana ni vanhwana vabye; Va phahlela ha vona ka zifananiso za le Kanani, Ni tiko gi nyenyeziswa hi nkhata. Mitse. 35:33

³⁹ Lezo va lo nyenyeziswa hi mitiro yabye, Va nga tsumbeki zimahweni zabye.

⁴⁰ A zanga ya Jehova yi lo vukela tiko gakwe, Laha kaku a swireka hi tshomba yakwe.

⁴¹ A va nyikela mandleni ya vamatiko, Lezaku va fumiwa hi vavengi vabye. Vala. 3:8; 4:2; 10:7

⁴² A valala vabye va lo va tsimbeketa, Va tsongahatiwa canjeni gabye.

⁴³ Zikhati zinyingi i lo va tlhatlhisa, Kanilezi va mu ala makungweni yabye; Va lova kubiheni kabye.

⁴⁴ Hambu-lokoke i lo wona kuxaniseka kabye, Laha a ngazwa kurila kabye;

⁴⁵ A alakanya a xivumelwano xakwe hi kota ya vona, A va zwela hi wuxinji gakwe ga hombe. Deut. 30:1

⁴⁶ A va maha va zwelwa wusiwana Hi lava va nga va maha tikhumbi.

⁴⁷ Hi hanyise, Jehova, Nungungulu wa hina, Hi hlengelete xikari ka vamatiko, Kasi ha fela ku bonga a vito ga wena go basa, Hi ku dumisa hi ku giya. 1 Kro. 16:35

⁴⁸ A khesiwe Jehova, Nungungulu wa Israeli, Kusukela kusanguleni kala kupinzukeni! A vanhu vontlhe a va wule, vaku; Amen! Dumisani Jehova!