Tisimu 105 - Tshwa Bible

¹ Bongani Jehova, khongelani a vito gakwe; Tlhatlhambutelani mitiro yakwe matikweni wontihe. 1 Kro. 16:8; Isa. 12:4

² Yimbelelani kakwe, mu dumiseni hi tisimu, Kanelani hi mitiro yakwe yi rewukisako.

³ Ti kuliseni hi vito gakwe go basa, Ngha ti tsaka a timbilu ta lava va lavako Jehova.

⁴ Lavani Jehova ni ntamu wakwe; Mu lava nghohe yakwe xontlhe xikhati.

⁵ Alakanyani mitiro yi rewukisako a nga yi maha, A zihlamaliso zakwe, ni zinene lezi zi humako nonwini wakwe,

⁶ Nwina lixaka la Abrahama, a nanza gakwe, Nwina vana Va Jakobe, vahlawulilweko vakwe.

⁷ Hi yena Jehova, a Nungungulu wa hina; A zinene zakwe zi lomu misaveni yontlhe.

⁸ Wa alakanya xivumelwano xakwe xontlhe xikhati, A gezu legi gi nyikilweko mazanazana ya zizukulwana; Gen. 28:16; Deut. 7:9

⁹ A xivumelwano lexi a xi mahileko na Abrahama, Ni xifungo xakwe ka Isaka; Gen. 15:18; 26:2

¹⁰ A zi tiyisa ka Jakobe lezaku ziva nayo, A ka Israeli xiva xivumelwano xi nga gumelwiko.

¹¹ Aku: Nzi ta ku nyika a tiko ga Kanani, Lezaku giva tshomba ya wena.

¹² Va wa nga se ku tala, Futsi, va wa hi vatsongwani, va hi tinzhuveti tikweni,

¹³ Va wa nzulanzula lomu matikweni ma hambeneko, Va enghena ka mufumo munwe ni munwani. Gen. 12:1, 9; 13:1

¹⁴ A nga vumelangi munhu ku va xanisa, I lo laya tihosi hi kota yabye; Gen. 12:17; 20:3, 7

¹⁵ Aku: Mu nga khumbeni vatotilweko va mina, Mu nga lamati vaprofeti va mina.

¹⁶ A tiko i lo gi vitanela ndlala, A lovisa zakuga zabye zontlhe.

¹⁷ I lo ruma munhu ku va rangela mahlweni, Josefa loyi a nga xabyiswa kota khumbi; Gen. 37:28, 36; 45:5

¹⁸ Loyi a milenge yakwe yi nga bayiswa hi makhotso, A bohiwa hi tisimbi;

¹⁹ Kala xikhati lexi ku nga tatiseka a gezu gakwe, A mhaka ya Jehova yi lo mu ringa.

²⁰ A hosi yi lo ruma lezaku a tlhatlhiwa, A mufumeli wa matiko i lo mu vululela a paxo. Gen. 41:14

²¹ I lo mu maha hosi ya yindlu yakwe, Ni muhlayisi wa titshomba takwe tontlhe;

²² A nyikwa malungelo ya ku boha tihosana takwe, Ni ku gonzisa wutlhari ka masungukati.

²³ Zonake Israeli i lota lomu Gipite, Jakobe i lo luvela tikweni ga Hamu. Gen. 46:1

²⁴ Jehova i lo anzisa vanhu vakwe, A va nyika ntamu ku hunza valala vabye, Ekso. 1:7, 12

²⁵ Lava a nga hunzula timbilu tabye lezaku va venga vanhu vakwe; Va maha wumbyori ka malanza yakwe.

²⁶ I lo ruma Mosi, a nanza gakwe, Na Aroni loyi a nga mu hlawulile. Ekso. 3:10

²⁷ Va lo tira zirewukiso zakwe xikari kabye, Ni zihlamaliso le tikweni ga Hamu.

²⁸ I lo rumela xinyama, ku phuma kontlhe, Cima a va kanetangi a gezu gakwe. Ekso. 10:22

²⁹ I lo hunzula mati yabye ma maha nkhata, A daya zidluwani zabye.

³⁰ A tiko gabye gi tala hi makhele, Ni lomu tindlwini ta tihosi tabye.

³¹ A wula, ku huma mabawani, Ni tinhwala tikweni gabye gontlhe.

³² A va nyika maralala akuva vula yabye, Ni malangavi ya nzilo a tikweni gabye.

³³ Aba zivina zabye ni mikuwu yabye, A tshoveletela tisinya ta tiko gabye.

³⁴ A laya, a humbi yi huma, Ni xigonwani xa tsanza vahlayi,

³⁵ Zi loga gontlhe a byanyi ga tiko, Ni mihanzu ya masimu yabye.

³⁶ I lo hihirita wontihe matewula ya tiko gabye, A tinhonzwa tontlhe ta ntamu wabye. Ekso. 12:29

³⁷ I lo humesa vanhu vakwe na va hi ni siliva ni nzalama, Xikari kabye ku wa nga hi na wo vanzana. Ekso. 12:35

³⁸ A vaGipite va lo tsaka laha va nga andlamuka, Hakuva a chawo wa vaIsraeli wu wa va khomile.

³⁹ I lo andlala refu gi va fenengeta, Ni nzilo wo va woningela ni wusiku. Ekso. 13:21; 14:19

⁴⁰ Va lo kombela, a va nyika tihwari, A va xurisa hi xibaba xa le tilweni.

⁴¹ A vulula ribye, ku huma mati, Ma khulunga xiwuleni kukotisa congo. Ekso. 17:6; Mitse. 20:11; 1 Kor. 10:4

⁴² Hakuva i lo alakanya a xifungo xakwe xi basileko, Na Abrahama a nanza gakwe.

⁴³ A humesa vanhu vakwe hi kutsaka, Ni vahlawulilweko vakwe hi kuyimbelela.

⁴⁴ A va nyika misava ya vamatiko, Va teka titshomba ta vanhu.

⁴⁵ Lezaku kasi va hlayisa a ziyimiso zakwe, Va gonga milayo yakwe. Dumisani Jehova! Deut. 6:24