Tisimu 103 - Tshwa Bible

Muhefemulo wanga, khesa Jehova.

Lisimu la Davida.

¹ Muhefemulo wanga, khesa Jehova, Ni zontlhe zi nga nzeni ka mina a zi khese a vito gakwe go basa.

² Muhefemulo wanga, khesa Jehova, U nga rivali a mitiro yakwe yontlhe ya yi nene;

³ Loyi a ku tsetselelako a zigoho za wena zontlhe, Loyi a chumako tinghumbe ta wena tontlhe;

⁴ Loyi a tirulako wutomi ga wena xilahleni, A ku ambexa hi wuxinji ni tipswalo;

⁵ Loyi a xurisako a malembe ya wena hi malongo, Kasi ku vuxetwa a wuswa ga wena khwatsi hi ga gama. Joba 33:25; Isa. 40:31

⁶ Jehova wa yimela hi nongameto Vontlhe lava va tsimbeketilweko.

⁷ I lo tivekisa a tindlela takwe ka Mosi, Ni mitiro yakwe ka vana va Israeli.

⁸ Nungungulu i na ni wuxinji ni tipswalo, Wa nonoka ku zangara, i tele hi wunene. Ekso. 34:6; Joeli 2:13; Jona 4:2

⁹ A nga kawuki xontlhe xikhati, Ge hambu ku zangara kala ku pinzuka.

¹⁰ A nga hi maheli nchumu hi lipimo la zionho za hina, Ge hambu ku hi tlhelisela maringano ni zigoho za hina.

¹¹ Hakuva khwatsi hi lezi a tilo gi tlakukileko hehla ka misava, Zi tano a wuxinji gakwe ka lava va mu chavako.

¹² Khwatsi hi kutsawukana ka Mutsuwuka-gambo ni Muhlwa-gambo, I susile kule kota lezo a zionho za hina.

¹³ Khwatsi hi dadani a hawukelako a vanana vakwe, Hilezo Jehova wa va hawukela lava va mu chavako. Isa. 63:16; 64:8; Jer. 31:9

¹⁴ Hakuva yena wa tiva lezi hi nga wumbiswa zona, Wa alakanya lezaku hina hi ntshuri.

¹⁵ A masiku ya munhu ma fanana ni ya byanyi; I anza khwatsi hi xitsangi xa nkova. Joba 14:2; 1 Ped. 1:24; Jak. 1:10

¹⁶ Loku a mheho yi hunza hehla ka xona, a xa ha hi kona; Ni wutshamu ga xona gi nga ha xi tivi.

¹⁷ Kanilezi a wuxinji ga Jehova ga kala kupinzuka Ka vona lava va mu chavako, Ni kululama kakwe ka vazukulu, Ekso. 20:6; Deut. 7:9; Lu. 1:50

¹⁸ Ka lava va hlayisako a xivumelwano xakwe, Va alakanya a zileletelo zakwe, va zi maha.

¹⁹ Jehova i yimisile a xitshamu xakwe xa wuhosi le matilweni, Ni mufumo wakwe wu fumela zontlhe.

²⁰ Khesani Jehova, nwina tingelosi takwe, Nwina tinhenha leʼta ntamu, mu mahako kulaya kakwe, Hi kuzwa a gezu ga mhaka yakwe.

²¹ Khesani Jehova, nwina tiyimpi takwe tontlhe, Nwina malanza yakwe mu mahako kuranza kakwe.

²² Khesani Jehova, nwina mitiro yakwe yontlhe, Matshanwini wontihe ya kufuma kakwe; Khesa Jehova, muhefemulo wa mina.