Tisimu 101 - Tshwa Bible

Wuxinji ni Nongameto.

Lisimu la Davida.

¹ Nzi ta yimbelela hi wuxinji ni nongameto, Nzi yimbelela ha wena Jehova.

² Nzi ta lonzowota a ndlela yi mbheleleko. Hi rini u ta ngata ka mina ke? Nzi tava ni mahanyela ma nene lomu ndlwini ya mina.

³ Nzi nga ta langutela a zilo zi bihileko. Nza venga a zimaho za vagohi, Cima zi nga ta nzi namarela.

⁴ A mbilu yi khohlakeleko a yive kule na mina, Nzi nga ta tiva za kubiha.

⁵ Loyi a hlevako muakelwane wakwe nzi ta mu lovisa, Nzi nga ta honisela hi loyi a ti kulisako, a nga ni mbilu ya matshanza.

⁶ A mahlo ya mina ma cuwuka a vakholekileko lomu tikweni, Lezaku va ta tshama zinwe na mina. Loyi a fambako hi ndlela yi mbheleleko i ta nzi tirela.

⁷ Loyi a khohlisako cima a nga ta tshama ndlwini ya mina, Ni loyi a hembako wunwa a nga ta yima mahlweni ka mina.

⁸ Mixo ni mixo nzi ta lovisa a vaonhi vontlhe va tiko, Kasi nzi heta vontlhe vamahi va kubiha lomu mutini wa Jehova. Rom. 13:4