Tisimu 10 - Tshwa Bible

A mahanyela ya wakubiha.

¹ Jehova, hikuyini u yimako kule? Hikuyini u fihlalako zikhatini za kuxaniseka?

² A xisiwana xi xanisiwa hi kota ya matshanza ya vakubiha, Va phase hi makungo yabye wutsumbu.

³ Hakuva a wakubiha wa buma hi mixuvo ya mbilu yakwe; Loyi wa makangwa i rukatela, a kanyisa Jehova.

⁴ Hi matshanza yakwe a wakubiha aku: A nga zi khataleli. Na alakanya ku ngalo: A ku kona Nungungulu.

⁵ A tindlela takwe ti tiyile xontlhe xikhati, A nga zi koti ku pima a kulamula ka wena; A kanyisa vontlhe valala vakwe.

⁶ Aku mbilwini yakwe: Nzi nga ta tsekatsekiswa, Cima nzi nga ta dzuka nziwa makhombyeni.

⁷ A nomu wakwe wu tele hi hlamba, ni kukhohlisa ni kutsimbeketa; Ku na ni kukhohlakala ni kubiha lahasi ka lirimi lakwe. Rom. 3:14

⁸ I nyanimela kusuhani ni zimutana, A daya kufihlaleni lava va nga hiko na nanzu, A mahlo yakwe ma xiya loyi a nga khombyeni.

⁹ I rinzela xihundleni khwatsi i nghala nzawini wa yona, A tumbela a xiyelela ku khoma a xisiwana, A xi kokovisela hi ntlhamu wakwe. Tis. 17:12; 59:3; Mika 7:2

¹⁰ Yena a vumbama, a barama, Kasi a va makhombo va wela tinyaleni takwe.

¹¹ I wula mbilwini yakwe, aku: Nungungulu i rivakelwe, I fihlile a nghohe yakwe, cima a nga ta zi wona.

¹² Vuka, Jehova! Nungungulu, tlakusa a canja ga wena; U nga rivali lava va nga hlomulweni.

¹³ Hikuyini a wakubiha a tlangamelako Nungungulu? A wula mbilwini yakwe, aku: Cima u nga ta zi khatalela.

¹⁴ Wena u zi wonile, hakuva u wona a kuxaniseka ni hlomulo, U zi khoma hi canja ga wena; Loyi a nga hlomulweni i ti nyikela ka wena; Hi wena muvuni wa zisiwana.

¹⁵ Tshova a woko ga wakubiha; Tsayisa a kubiha kakwe kala u nga ha ku kumi.

¹⁶ Jehova i Hosi kala kupinzuka ni kupinzuka; A vamatiko va lobyiswa tikweni gakwe.

¹⁷ Jehova, u zwile a mixuvo ya lava va koramileko; U tiyisa timbilu tabye; U demba a ndleve ya wena,

¹⁸ Kasi ku lulamisa timhaka ta zisiwana ni ta va tsimbeketilweko. Lezaku a munhu wa misava a fela ku kala a nga ha chavisi kambe. Deut. 10:18; Isa. 2:22