Rute 4 - Tshwa Bible

Boazi a tekana na Rute.

¹ Boazi i loya le hubyeni a ya tshama laho. I lo wona loyi wa xaka a nga mu wula na ata; aku kakwe: He sawe! Hi ngata u ta tshama laha! I lo hambuka a ya tshama laho.

² Zonake Boazi i lo ramba a 10 wa masingalakati ya muti, aku kabye: Tshamani laha! Va lo tshama.

³ Aku ka xaka gakwe: Naomi loyi a wuyileko hi le tikweni ga Moabi wa xavisa a xipanze xa misava lexi xi nga wa hi xa nakulori Elimeleki.

⁴ Hikwalaho mina nzi wonile lezaku nzi fanele ku tivisa wena aku u xi tirula mahlweni ka vontlhe lava va tshamileko laha, ni mahlweni ka masingalakati ya tiko ga hina. Loku u ranza ku xi xava, xi xave! Kanilezi loku u nga ranzi ku xi tirula, nzi byele kasi nza fela ku zi tiva, hakuva a nga kona munwani a nga ni fanelo ku xi teka ahandle ka wena. Mina nzi wa lenzhako. Yena aku: Nzi ta xi tirula. Deut. 25:5

⁵ Zonake Boazi, aku: A siku legi u ta nga xava a sava lego mandleni ya Naomi, u ta gi xava kambe mandleni ya Rute a muMoabi, a sati wa matsuva, kasi u fela ku vuxa a vito ga matsuva lomu tshombeni yakwe.

⁶ Inaloye wa xaka aku: Mina nzi nga ta zi kota a ku gi tirula, hakuva nzi nga lahlekelwa hi tshomba ya mina. Teka malungelo ya mina yo gi tirula, hakuva mina nzi nga ta gi tirula.

⁷ Makunu a kale ku wa ni mukhuwo xikari ka va ka Israeli waku loku a munhu a tsika a tshomba, a tiyisa a mhaka ya kona hi ku susa xilato xakwe a nyika nakulobye. Lego gi wa hi wumboni ka va Israeli.

⁸ Hikwalaho, laha inaloyi a nga wula ka xaka gakwe Boazi, aku: Xava wena a simu lego, i lo susa xilato xakwe.

⁹ Boazi aku ka masingalakati ni ka vanhu vontlhe: Nwina mu timboni nyamutlha, lezaku nzi xavile zontlhe lezi zi nga wa hi za Elimeleki, ni za Kilioni, ni za Mahloni mandleni ya Naomi.

¹⁰ Tlhatakumbiri, nzi tekile na Rute a muMoabi, a sati wa Mahloni, kasi nzi fela ku vuxa a vito ga matsuva, kasi gi nga fuvi xikari ka vanakulobye ni laha hubyeni yabye. Nwina mu timboni nyamutlha.

¹¹ A vanhu vontlhe lava va nga wa hi laho hubyeni ni masingalakati, va te ngalo: Hina hi timboni! Jehova a mahe loyi wasati a enghenako ndlwini ya wena a fanana na Rakeli na Lea, lava hi wumbiri gabye va nga aka a yindlu ya ka Israeli. Hikwalaho tiyahlana lomu Efrata, ni vito ga wena a gi dume lomu Betlehema!

¹² Ngha a yindlu ya wena yi fanana ni yindlu ya Perezi, loyi Tamari a nga beleka na Juda, ziva nghaho ni ka vanana lava Jehova a ta nga ku nyika hi pswatsana loyi.

¹³ Zinghaho Boazi i lo teka Rute a maha sati wakwe. I lo tivana naye; Jehova a mu nyika rumbu, a pswala mufana.

¹⁴ A vavasati vaku ka Naomi: A dumiswe Jehova loyi a nga laviko ku ku tsika u nga hi na xaka; a vito gakwe a gi dume xikari ka Israeli.

¹⁵ 1 tava mutangalisi wa moya wa wena, ava muwundli wa wena wukhosaneni ga wena. Hakuva hi loye a pswelweko hi katamwane wa wena, loyi a ku ranzako nguvu ku hunza ntlhanu wa vafana ni vambiri.

¹⁶ Naomi i lo teka a xihlangana a xi wukarela, a maha muhlayisi wa xona.

¹⁷ A vaakelane vakwe va vavasati va lo xi chula vito, vaku: Naomi i pswalelwe xihlangana; va lo mu chula vito ga Obedi. Hi yena a raru wa Jese, a raru wa Davida.

¹⁸ Makunu lezi hi zizukulwana za Perezi: Perezi i lo pswala Hezroni, Gen. 46:12; Mat. 1:3

¹⁹ Hezroni a pswala Rama, Rama a pswala Aminadaba,

²⁰ Aminadaba a pswala Naxoni, Naxoni a pswala Salmoni,

²¹ Salmoni a pswala Boazi, Boazi a pswala Obedi,

²² Obedi a pswala Jese, Jese a pswala Davida.