Rute 3 - Tshwa Bible

Xikombelo xa Rute ka Boazi.

¹ A nwingi wakwe Naomi i te ngalo; Nwananga, nza xuva ku ku lavela wutshamu ga ku humula ka gona, laha u ta nga tangala kona.

² A nziku gi kona a xaka ga hina Boazi, a nwinyi wa malanza lawa u nga wa tira nawo. Hi gaya, i yile ku ya phopha sevada wusiku legi, le nzhimbyeni.

³ Hikwalaho hlamba, u tola mafura, u ambala tinguwo ta wena uya le nzhimbyeni. Kanilezi u nga ti tivekisi kakwe na a nga se mbheta kuga ni kunwa.

⁴ Kasike a xikhati a yako kuetleleni, u ta cuwukisisa khwatsi a wutshamu lego a ta nga etlela ka gona; zonake u ta ya enghena u funungula milenge yakwe, u etlela laho. Yena i ta ku byela lezi u ta nga zi maha.

⁵ Yena i lo hlamula, aku: Nzi ta maha zontlhe lezi u nzi byelako.

⁶ I lo relela aya le nzhimbyeni, a ya maha zontlhe lezi a nwingi wakwe a nga mu leletele zona.

⁷ Laha Boazi a nga wa gile, anwa, a tsaka, i lo ya etlela le magumo ka nhulu ya sevada. Rute i lota hi kunyanima a ta funungula milenge yakwe, a etlela laho.

⁸ Zonake laha xikari ka wusiku inaloye wanuna i lo khindlimuka hi kuchava, a hunzuluka, a wona wasati a nga etlele milengeni yakwe.

⁹ Aku kakwe: Hi wena mani? Yena a hlamula, aku: Hi mina nanza ga wena Rute. Fenengeta a nanza ga wena hi nguwo ya wena, hakuva wena u xaka gi faneleko ku tirula a tshomba ya hina.

¹⁰ Yena aku kakwe: Jehova a ku katekise. U kombisile wunene ka mina ku hunza kusanguleni, hakuva a ku lanzelangi majaha yo fuma hambu ya zisiwana.

¹¹ Makunu, nwananga, u nga chavi! Nzi ta ku mahela zontlhe lezi u zi wulako, hakuva a muti wontihe wa vanhu va ka hina wa zi tiva lezaku wena u wasati a faneleko.

¹² Hakunene nzi xaka ga nwina, kanilezi i kona a nga xaka ga nwina ga kusuhani nguvu ku hunza mina.

¹³ Etlela laha wusiku legi! Laha mixweni, loku a ta maha ka wena a tifanelo ta wuxaka gakwe, matsenya! Kanilezi loku a nga mahi ka wena a tifanelo ta wuxaka gakwe, nzi hlambanya ha Jehova, nzi ta maha mina tifanelo leto ka wena. Etlela kala manziko.

¹⁴ I lo etlela le milengeni yakwe kala gica. I lo vuka a famba na gi nga se tsuwuka gambo, hakuva Boazi i te ngalo: Ngha zi nga tibyiwi lezaku ku wa tile wasati laha nzhimbyeni.

¹⁵ A ku kakwe: Neha a nguwo leyo u fenengeleko, u ta kangatela. Yena i lo kangatela, Boazi a pima a ntlhanu wa tipimo ni linwe ta sevada, a mu rwexa, a tlhela aya kaya.

¹⁶ Loku a chikele kaya, a nwingi wakwe aku: Zi mahisile kuyini, nwananga? A katamwane a hlawutela zontlhe lezi a wanuna a mahileko ka yena.

¹⁷ Aku kakwe: I nzi nyikile ntlhanu wa tipimo ni linwe ta sevada, hakuva i te ngalo: U nga tlheli uya ka nwingi wa wena na u nga hi na nchumu.

¹⁸ Zonake Naomi aku: Nwananga, tshama u rutisa, kala u tiva magumo ya timhaka leti, hakuva a wanuna loyi a nga ta humula nyamutlha na a nga se mbhetisa a mhaka leyi.