Nehemia 9 - Tshwa Bible

A vanhu va khozela Nungungulu.

¹ Makunu hi siku ga 24 ga hweti ywaleyi a vanana va ka Israeli va lo tsombana va yila, na va ambele tinguwo ta xirilo, va ti cheletela a tshuri.

² A pswalo wa ka Israeli wu lo ti hambanyisa ni vontlhe vamatiko, va yima va wulela zionho zabye, ni zihambunyeto za vararu vabye.

³ Va yima wutshanwini gabye, va gonzelwa a bhuku ga milayo ya Jehova Nungungulu wabye hi xipanze xa wumune xa siku; a ka xinwani xipanze xa wumune va wulela zionho zabye, va khozela Jehova Nungungulu wabye.

⁴ Zonake Jexua, na Bani, na Kadmieli, na Xebania, na Bunni, na Xerebia, na Bani, na Kenani, va lo yima laha xitlhateni xa vaLevi va kanyuluka ka Jehova Nungungulu wabye.

⁵ Zonake a vaLevi, na Jexua, na Kadmieli, na Bani, na Haxabneia, na Xerebia, na Hodia, na Xebania, na Petahia, vaku: Sukani mu yima, mu bonga Jehova Nungungulu wa nwina kala kupinzuka. A gi bongiwe a vito ga wena gi dzunzekileko, gi tlakukileko, gi hunzeleleko kudumiswa kontlhe.

⁶ Wena u Jehova, wena wece; hi wena u mahileko tilo ni matilo ya matilo, ni tiyimpi ta wona tontlhe, ni misava ni zontlhe zi nga ka yona, ni mabimbi ni zontlhe zi nga ka wona, u zi hanyisa zontlhe; a yimpi ya le tilweni yi khozela wena. Isa. 37:16, 20; Miti. 4:24

⁷ Hi wena Jehova Nungungulu, loyi u hlawuleko Abrama, u mu humesa le Uri wa maKaldea, u mu chula vito ga Abrahama; Gen. 11:31; 12:1; 17:5

⁸ u kuma mbilu yakwe na yi kholekile mahlweni ka wena, u maha naye xivumelwano xo nyika vana vakwe a tiko ga maKanani, ni ga vaHiti, ni ga vaAmori, ni ga vaPerizi, ni ga vajebusi, ni ga vaGirgaxi, u tlhela u tatisa timhaka ta wena; hakuva wena u lulamile.

⁹ Wena u wonile a kuxaniseka ka vararu va hina le Gipite, uzwa kurila kabye laha Bimbini go Pswhuka.

¹⁰ U kombisa miwoniso ni zihlamaliso ka Faro, ni ka malanza yakwe wontihe, ni ka vanhu vontlhe va tiko gakwe, hakuva wena wa zi tiva lezaku va va khomile hi lunya; wena u ti mahele vito, khwatsi hi nyamutlha lezi Ekso. 7-12

¹¹ U lo va avanyisela a bimbi, kasi va fela ku famba muhanzeni wa lomu xikari ka gona, kanilezi lava va nga wa va hlongolisa u va hoxa lomu kueteni ka gona, khwatsi i ribye gi hoxilweko matini ya ntamu.

¹² Tlhatakumbiri, u lo va rangela hi mhinga ya refu ni hlikanhi, laha wusikwini u va rangela hi mhinga ya nzilo, kasi ku va woningela ndleleni leyi va faneleko ku famba ha yona.

¹³ Ni kambe u lo relela le hehla ka xitsunga xa Sinai, u wulawula navo na u hi le tilweni, u va kombisa zinene, ni milayo ya lisine, ni ziyimiso, ni zileletelo;

¹⁴ u va maha va tiva a sabado ga wena go basa, u va nyika zileletelo, ni ziyimiso, ni milayo hi canja ga nanza ga wena Mosi.

¹⁵ U va nyika zibaba za le tilweni kasi ku miyeta ndlala yabye, u va humesela mati hi lomu ribyeni kasi ku tima tora gabye, u va lelela lezaku va ya fumela a tiko legi u nga gi tlakusela canja ga wena u hlambanya lezaku u ta va nyika gona. Ekso. 16:4; 17:6

¹⁶ Kanilezi vona ni vararu va hina va lo ti alisa, va nonohisa tinhamu tabye, va ala kuzwa zileletelo za wena,

¹⁷ va ala ku ingisa, hambu ku khatala hi zihlamaliso lezi u nga wa zi maha xikari kabye; kanilezi va lo nonohisa tinhamu tabye, kutialiseni kabye va ti hlawutela a murangeli, kasi ku va rangela va tlhelela wukhumbini. Kanilezi wena u Nungungulu loyi a tengileko ku tsetselela, u wa tipswalo, na u tele hi wuxinji; u nonoka ku zangara, na u tele hi wunene, a ku va fularelangi Ekso. 34:6; Joeli 2:13

¹⁸ Ina, laha va nga wa ti wumbele a role, vaku: Loyi hi yena Nungungulu, loyi a hi humesileko le Gipite, va ku zangarisa,

¹⁹ kanilezi wena hi wuxinji ga wena go eta, a ku va tsikangi lomu xiwuleni. Laha hlikanhini a mhinga ya refu a yi tsikangi ku va rangela ndleleni yabye, ge hambu a mhinga ya nzilo a ku tsika ku va woninga a ndleleni leyi va nga wa fanele ku famba ha yona.

²⁰ U lo va nyika kambe a moya wa wena wa zinene lezaku wu va gonzisa, cima a ku va tsimbetelangi kuga mane; u te vaha ni mati kasi ku tima a tora gabye.

²¹ Ina, u te va hlayisa 40 wa malembe lomu xiwuleni, va nga vumali nchumu. A tinguwo tabye a ti hlakalangi, ni mikonzo yabye cima a yi vumbangi, Mitse. 14:4, 18; Deut. 8:3, 16

²² Tlhatakumbiri u te vaha mifumo ni matiko, u va avela hi zipanze. Zingaho va lo fumela a tiko ga Sihoni, ku nga tiko ga hosi Hexboni, ni ga Ogi hosi ya Baxani.

²³ A vana vabye kambe u lo va anzisa va fana ni tinyeleti ta tite, u va neha tikweni legi u nga byela vararu vabye lezaku a vaye ya ya gi fumela.

²⁴ Zinghaho a vana vabye va yile va ya gi fumela, wena u ya khozisela a vaaki va gona, va nga vaKanani, u va nyikela mandleni yabye, ni tihosi tabye ni vanhu va tiko lego, lezaku va maha kuranza kabye ka vona.

²⁵ Va lo teka a miti yi bhiyelweko, ni tiko go nona, va teka ni tiyindlu ti nga wa tele hi zilo zo saseka, a tihlowo ti kelilweko, zivina, mioliva, ni tisinya tinyingi ta mihanzu. Zinghaho va loga, va xura, va kulukelana, va ti tsakela hi wunene ga wena.

²⁶ Ahembaloko, va wa nga ingisi; va lo ti alisa, va hoxa milayo ya wena lenzhako, va daya vaprofeti va wena lava va nga wa kanela kabye lezaku va tlhelela ka wena, va vindlusa a zanga ya wena.

²⁷ Hikwalaho u lo va nyikela mandleni ya valala vabye va va hlokisa. Vaku va hi xikari ka zikarato, va ku rilela, wena u vazwa na u hi le tilweni; hi kota ya wuxinji ga wena go eta, u va nyika vahanyisi lava va nga va ponisa mandleni ya valala vabye. Vala. 3:9, 15

²⁸ Kanilezi anzhako na va humule, va lo engeta va maha kubiha mahlweni ka wena. Hikwalaho u lo va tsika mandleni ya valala vabye, va fumelwa. Kanilezi laha va nga tlhelela ka wena, va ku rilela, wena u lo vazwa na u hi le tilweni; u va tlhatlhisa makhati manyingi hi kota ya wuxinji ga wena;

²⁹ u va khongotela lezaku va tlhelela milayweni ya wena. Kanilezi vona va lo ti alisa, va nga ingisi zileletelo za wena, va huma zineneni za wena, lezi loku a munhu a zi maha, i ta hanya ha zona, va nonohisa tinhamu tabye, va ala ku ingisa. Ezek. 20:11; Rom. 10:5; Gal. 3:12

³⁰ Kanilezi ku lo hunza malembe yo hlaya na u timisela ha vona, u va khongotela hi moya wa wena hi milomu ya vaprofeti va wena; kanilezi va nga pangi tindleve tabye; hikwalaho u va nyikela mandleni ya vanhu va matiko.

³¹ Ahembaloko, hi kota ya wuxinji ga wena go eta, cima a ku va mbhetangi, hambu ku va fularela, hakuva wena u Nungungulu wa tipswalo ni wuxinji.

³² Hikwalaho wena Nungungulu wa hina, u nga Nungungulu wa hombe, wa ntamu, wo tshisa, loyi a hlayisako xivumelwano ni wuxinji, ngha hlomulo lowu wu ngavi wutsongwani mahlweni ka wena, lowu wu weleko hehla ka hina, ni tihosi ta hina, ni tihosana ta hina, ni vapristi va hina, ni vaprofeti va hina, ni vararu va hina, ni hehla ka vanhu va wena vontlhe kusukela xikhatini xa tihosi ta le Assiria kala lezi.

³³ Ahemba, ka zontlhe zi hi humeleko, wena u mahile nongameto, hakuva u mahile zinene, hina hi maha kubiha. Dan. 9:7, 14

³⁴ A tihosi ta hina, kutani tihosana, kutani vapristi, ni vararu va hina, a va hlayisangi milayo ya wena, kutani ku ingisa zileletelo za wena ni wukustumunyu ga wena, lezi wena u nga va khongotela ku zi maha.

³⁵ Hakuva lomu mufunweni wabye a va ku tirelangi, laha u nga va nyika hi wunene ga wena ga hombe, ni tiko leʼga hombe go nona u nga va nyika, kanilezi vona a va humangi zimahweni zabye zo biha.

³⁶ Languta, hina hi tikhumbi nyamutlha; hi tikhumbi lomu tikweni legi u nga nyika vadadani va hina a kuva vaga mihanzu ya gona, va tshameka khwatsi,

³⁷ gi nyika pfuno wa hombe ka tihosi leti u ti yimisileko a ku hi fumela, hi kota ya zionho za hina. Ni kambe va na ni ntamu hehla ka mimiri ya hina, ni tihomu ta hina, va maha kuranza kabye, va hi hlokisa.

³⁸ Hikwalaho ka zontlhe lezo, ha maha xivumelwano xi tiyileko, hi ku xi tsala; a tihosana ta hina, ni vaLevi va hina, ni vapristi va hina va xi tiyisa.