Nehemia 8 - Tshwa Bible

Vanhu va gonzelwa milayo hi Ezra.

¹ A vanhu vontlhe va lo tsombana hi mbilu yinwe laha tsenzeleni wu nga hi le mahlweni ka nyangwa ya Mati, va byela matsalani Ezra lezaku a neha a bhuku ga milayo ya Mosi, leyi Jehova a nga wa leletele Israeli. Ezra 3:1; 7:11

² Mupristi Ezra i lo neha milayo leyo mahlweni ka hlengeletano ya vavanuna ni vavasati, ni vontlhe lava va nga wa zi kota ku yizwa va yi pimisisa, hi siku go ranga ga hweti ya wu 7.

³ I lo yi gonza na yimile mahlweni ka tsenzela lowu wu nga hi laha mahlweni ka nyangwa ya Mati, kusukela ni mixo kala hlikanhini, a yi gonza mahlweni ka vavanuna ni vavasati, ni lava va nga wa zi kota ku yi pima. A tindleve tabye vontlhe ti wa pangele a bhuku ga milayo.

⁴ Mutsali Ezra i lo yima le hehla ka xitlhata xa mapulango, va nga wa xi mahele ntiro lowo. Kusuhani kakwe hi tlhelo ga xinene, ku wa yimile Matitia, na Xema, na Anaia, na Uria, na Hilkia, na Maaseia; hi tlhelo ga xibhabha ku wa yimile Pedaia, na Mixaeli, na Malkija, na Haxumi, na Haxbadana, na Zekaria, na Mexulamu.

⁵ Ezra a vulula a bhuku mahlweni ka vanhu vontlhe, (hakuva i wa yimile wutshanwini go tlakuka mahlweni ka vanhu vontlhe;) laha a nga gi vulula, a vanhu vontlhe va lo suka va yima.

⁶ Ezra a bonga Jehova, a Nungungulu wa hombe. A vanhu vontlhe vaku: Amen, Amen! na va tlakusa a mandla yabye, va koramisa tihloko tabye va khozela Jehova a tinghohe tabye na ti cuwukile lahasi.

⁷ Jexua, na Bani, na Xerebia, na Jamina, na Akuba, na Xabetai, na Hodia, na Maaseia; na Kelita, na Azaria, na Jozabadi, na Hanani, na Pelaia, ni vaLevi, vonawu va lo tlhamusela milayo ka vanhu, a vanhu na va yimile kwalaho.

⁸ Va lo gonza milayo ya Nungungulu lomu bhukwini hi kudlunyatisa, na va tlhamusela, kasi za pimeka lezi zi gonziwako.

⁹ Nehemia, loyi a nga wa hi hosi ya kona, ni matsalani wa kona mupristi Ezra, ni vaLevi lava va nga wa hi vagonzisi va vanhu, va te ngalo ka vanhu vontlhe: A siku legi i siku gi basileko ka Jehova Nungungulu wa nwina. Mu nga mahi hlomulo, hambu ku rila. Hakuva a vanhu vontlhe va wa rila, laha va ngazwa a timhaka ta milayo. Levi 23:24

¹⁰ Zonake aku kabye: Ti fambeleni, mu yaga tinyama ti nonileko, munwa kunwa ko nanziha, mu rumela zakuga ka lava va nga ti longiselangiko nchumu, hakuva legi i siku gi basileko ka Hosi ya hina. Mu nga tsanwi, hakuva a litsako la Jehova i ntamu wa nwina.

¹¹ Zinghaho a vaLevi va lo miyeta vanhu vontlhe, vaku: Rutisani, hakuva legi i siku gi basileko; mu nga tsanwi!

¹² A vanhu vontlhe va lo ti fambela va yaga, vanwa, va rumela zakuga ka vanwani, va ti tsakela, hakuva va wa ti pimile a timhaka leti ti nga wa tlhatlhambutelwe kabye.

¹³ Hi siku ga wumbiri ku lo tsombana a tihosana ta tiyindlu ta vararu vabye vontlhe, ni vapristi, ni vaLevi, ka mutsali Ezra kasi ku pimisisa a timhaka ta milayo.

¹⁴ Va lo kuma na ku tsalilwe lomu nayweni lezi Jehova a nga wa leletele Mosi, lezaku a vanana va ka Israeli va fanele ku tshama lomu mixaxeni loku va maha a mubuzo wa hweti ya wu 7. Ekso. 23:16; Levi 23:34

¹⁵ Ni lezaku va fanele kuba nyiwo va tivisa lomu mitini yabye yontlhe, ni le Jerusalema, muku: Humani muya xitsungeni mu ya tshova tiravi ta mioliva, ni mioliva ya khwati, ni maravi ya tihlambuti, ni maravi ya micinzu mu ti akela mixaxa khwatsi hi lezi ku tsalilweko,

¹⁶ Zinghaho a vanhu va lo huma va ya tsema maravi lawo, va ta ti akela mixaxa, munwe ni munwani a ti akela le hehla ka langwa la yindlu yakwe, ni lomu mitsenzeleni yabye, ni lomu mitsenzeleni ya yindlu ya Nungungulu ni laha tsenzeleni wa nyangwa ya Mati, ni laha tsenzeleni wa nyangwa ya ka Efraime.

¹⁷ Yontlhe hlengeletano ya lava va nga wa humele wukhumbini, yi lo aka mixaxa va tshama lomo; hakuva kusukela masikwini ya Jexua nʼwana Nuni kala lego siku, a vanana va ka Israeli va wa nga maha zo kota lezo. Ku wa hi ni kutsaka ka hombe nguvu.

¹⁸ Ni kambe siku ni siku, kusukela siku go ranga kala siku go gumesa, i wa gonza a milayo ya Nungungulu lomu bhukwini. Va lo maha mubuzo lowo 7 wa masiku; hi siku ga wu 8 ku mahiwa a mutlhangano wa hombe, kota kuleletela ka nayo.