Nehemia 6 - Tshwa Bible

A valala va ringa ku beletela ntiro.

¹ Makunu laha ku nga wa bikilwe ka Sanballati na Tobia, ni ka Gexemi a muArabia, ni ka vontlhe valala va hina, lezaku nzi vuxile a ligingisi, ni lezaku ku wa nga ha hi na mole; hambu lezi xikhatini lexo nzi nga kala nzi nga se Vekela tivati lomu tinyangweni;

² Sanballati na Gexemi va lo rumela ka mina, vaku: Tana hi ta tlhangana ka munwe wa miti ya le livaleni la Ono. Kanilezi vona va wa alakanya ku ya nzi maha zahava.

³ Nzi lo rumela a mitsukano kabye yi yaku: Nzi na ni ntiro wa hombe; hikwalaho a nzi zi koti ku relela nzifa. Nzi wa ta kaketela yini ntiro nzita leyo mu nga kona?

⁴ Mune wa zikhati na va nzi rumela a mahungu ya ku nghaho; minawu nzi si va hlamulisa zalezo.

⁵ Zonake Sanballati i lo rumela a nanza gakwe hi khati ga wuntlhanu ni mahungu ya lawo hi papilo gi vululweko, gi tsalilweko hi mandla yakwe;

⁶ gi nga wa tsalilwe lezi: Ka zwala lomu matikweni, ni lomu Gaxmu kambe za wuliwa, lezaku wena ni vaJuda mu lava ku hluwuka; hi xigelo lexo u vuxelako xona a ligingisi. Ni lezaku wena u tava hosi yabye; ku hlawutiwa lezo.

⁷ Ni lezaku u yimisile a vaprofeti lava va kanelako ha wena le Jerusalema, vaku: Ku na ni hosi le Juda. Makunu a mhaka leyo yi ta ya bikisiwa zalezo ka hosi. Hikwalaho relela uta, kasi hi fela ku ta xuxa a mhaka leyo.

⁸ Zonake mina nzi lo rumela a mhaka kabye, nziku: A ku na zilo za ku nghaho, zo kota lezi u zi hlawutako, kanilezi zilo za kuva u zi alakanyelako mbilwini ya wena.

⁹ Hakuva vontlhe va wa lava ku hi dzukisela, vaku: A mandla yabye ma tava ni gome, va nga zi koti ku maha a ntiro. Kanilezi, wena Nungungulu, tiyisa a mandla ya mina.

¹⁰ Nzi loya ka Xemaia nʼwana Delaia wa Mehetabele, loyi a nga wa ti valele ndlwini. I te ngalo: A hi tlhanganeni le ndlwini ya Nungungulu, lomu tempeleni hi vala tivati. Hakuva va tata va ta ku daya. Gona wusiku gwalegi va tata va ta ku daya.

¹¹ Mina nziku: A munhu wo kota mina a nga tsutsuma? I kona munhu wo kota mina a nga enghenako lomu tempeleni kasi ku ponisa wutomi gakwe? Cima nzi nga ta enghena kona.

¹² Nzi lo ehleketa nzi wona lezaku i wa nga rumiwangi hi Nungungulu; kanilezi i wa profeta kasi ku nzi vukela. I wa rengelelwa hi Tobia na Sanballati.

¹³ I wa rengelelelwa aku kasi nza chava, nzi maha lezo, nzi onha, na va fela ku kuma mhaka yo aka ha yona mubiko wa hava, nzi rwala a nzhukano.

¹⁴ Nungungulu wanga, alakanya Tobia na Sanballati, u va tlhelisela maringano ni mitiro yabye, ni muprofeti wa xisati Noadia, ni vontlhe vaprofeti lava va nga wa lava ku nzi dzukisela.

¹⁵ Zinghaho a ligingisi li lo mbhela hi siku ga 25 ga hweti ya Eluli, ku maha 52 wa masiku.

¹⁶ Laha vontlhe valala va hina va nga zizwa, a vamatiko vontlhe va nga wa hi renzelekele va lo chava, va tsanwa nguvu, hakuva va wa zi pima lezaku a ntiro lowu wu wa mahilwe hi Nungungulu wa hina.

¹⁷ Tlhatakumbiri, masikwini lawo a manghanakana ya le Juda ma lo rumela mapapilo yo tala ka Tobia, a ya Tobia matawo kabye.

¹⁸ Hakuva le Juda ku wa hi ni vanyingi va nga wa hlambanyile ku ti boha kakwe, hakuva yena i wa hi mwane wa Xekania nʼwana Ara. A nʼwana wakwe Jehohanani i wa tekile a nhanyana wa Mexullamu nʼwana Berekia.

¹⁹ Ni kambe va wa wulawula hi ku mu dzunza mahlweni ka mina, na va ya mu byela a timhaka leti nzi wulako. Tobia-ke a rumela mapapilo yo nzi dzukisela ha wona.