Nehemia 13 - Tshwa Bible

Ziyimiso za Nehemia.

¹ A siku lego ku lo gonziwa a bhuku ga Mosi tindleveni ta vanhu; bhukwini lego ku lo kumeka na ku tsalilwe lezaku a vaAmoni ni vaMoabi ni kanwe va nga dzuki va enghena hlengeletanweni wa Nungungulu; Deut. 23:3

² hakuva vona a va tlhangavetangi a vanana va ka Israeli ni zakuga ni mati, kanilezi va lo ya rengelela Baalami lezaku a va vukela, a va punga. Hambu lezo, Nungungulu wa hina i lo hunzula a nzhukano leyo yiva xikatekiso. Mitse. 22:5

³ Laha va ngazwa a nayo lowo, va lo humesa xontlhe xidlemo lexi xi nga wa ti tlhanganyisile ni va ka Israeli.

⁴ Makunu hi mahlweni ka lezi, mupristi Eliaxiba loyi a nga wa yimisilwe a kuva muhlayisi wa tikwaruto ta yindlu ya Nungungulu wa hina, i wa akile wuxaka na Tobia.

⁵ I lo mu longisela a kwaruto ya hombe, leyi kusanguleni yi nga hi wuhlayiselo ga minyikelo ya mapa, ni mipepo, ni zibya, ni za wukhume za mavele, ni vinya, ni mafura, lezi a nayo wu nga leletela ku nyika vaLevi, ni vayimbeleli, ni varinzeli va tinyangwa, ni minyikelo ya kunziwitela ya vapristi.

⁶ Kanilezi xontlhe xikhati lexo nzi wa nga hi le Jerusalema, hakuva hi lembe ga wu 32 ga kufuma ka Artaxerxesi a hosi ya le Babuloni, nzi wa yile ka hosi. Ku ku anzhako ka masiku yo kari nzi kombela lezaku a hosi yi nzi tlhatlha.

⁷ Nzi lo tlhelela Jerusalema, nzi tazwa a manyalataniso lawa Eliaxiba a nga wa ma mahile, ya ku longisela Tobia a kwaruto lomu tihubyeni ta yindlu ya Nungungulu.

⁸ Nzi lo bayiseka nguvu; hikwalaho nzi lo humesa zontlhe a zibya za Tobia nzi zi hoxa lahandle ka kwaruto.

⁹ Zonake nzi lo rumisa lezaku a tikwaruto ti basiswa, nzi wuyisa kambe a zibya za yindlu ya Nungungulu, ni minyikelo ya mapa, ni ya mipepo.

¹⁰ Nzi lo kuma lezaku a ziavelo lezi zi nga wa fanele kuva zi nyikelwe ka vaLevi, a zi nyikelwangi, ni lezaku a vaLevi ni vayimbeleli va wa hangalakile, munwe ni munwani a ti yela sinwini gakwe.

¹¹ Zonake nzi lo wulawulisana ni tihosana, nziku: Hi kuyini mu fulareleko a yindlu ya Nungungulu? Nzi va tsombanyisa nzi va tlhelisela mitirweni yabye.

¹² Zonake a tiko gontlhe ga Juda gi lo neha a za wukhume za mavele ni vinya ni mafura lomu wuveketelweni.

¹³ Nzi lo yimisa vahlayisi ka matshamu ya wuveketelo, a nga mupristi Xelemia, na mutsali Zadoki, na Pedaia, a vaLevi, va gamelwa hi Hanani nʼwana Zakura, nʼwana Mattania, hakuva va wa tsumbekile, a ntiro wabye na ku hi ku avela vanakulobye.

¹⁴ Nungungulu wa mina, nzi alakanye hi kota ya zontlhe lezo, u nga fuvisi a mitiro leyi yi nene nzi yi maheleko a yindlu ya Nungungulu wa mina, ni kulonzowotwa ka yona.

¹⁵ Masikwini lawo nzi lo wona le Juda a vanwani na va kamela vinya lomu zigowolweni hi siku ga sabado, ni laʼvo rwalela a tinyanza ta mavele hi timbongola, ni vinya, mauva, ni makuwu, ni minzhwalo ya tixaka ti tsalangeneko, leyi va nga wa yi neha le Jerusalema hi siku ga sabado. Mina nzi lo va holovela hi siku lego va nga wa xavisa ha gona zakuga.

¹⁶ Kwalomo ku wa akile a vanhu va le Tire, va nga wa neha zidluwani ni tixakaxaka ta zibya, va ta zi xavisela va ka Juda ni le Jerusalema hi siku ga sabado.

¹⁷ Zonake nzi lo wulawulisana ni manghanakana ya ka Juda, nziku kabye: Mu mahela yini kubiha loku, mu nyenyezisa a sabado?

¹⁸ A hi zalezi zi nga mahiwa hi vararu va nwina, kala Nungungulu a hi tsayisa ni muti lowu ke? Kanilezi a mu tsayi ku kokela Israeli ginwani khulo hi ku nyenyezisa a siku ga sabado.

¹⁹ Laha a tinyangwa ta Jerusalema ti nga wa fenengetilwe hi nzhuti hi mahlweni ka sabado, nzi lo rumisa lezaku a tinyangwa ti valiwa, ti nga vululwi kala nzhako ka sabado; nzi veka malanza ya mina a kuva varinzeli va tona, kasi ku nga engheniswa nchumu hi siku ga sabado.

²⁰ Zinghaho vontlhe vamahungani ni vaxavisi va zilo zi tsalangeneko va loxwa le handle ka muti wa Jerusalema kanwe kutani kumbiri.

²¹ Zonake nzi lo va holovela, nziku: Hi kuyini mu etlelako laha khurisini? Loku mu engeta kambe nzi ta mu khoma! Kusukela xikhati lexo a va ha engetangi vata hi siku ga sabado.

²² Nzi lo byela vaLevi lezaku va ti basisa, ni kuva vata va ta hlayisa tinyangwa, kasi ku basisa a siku ga sabado. Nungungulu wa mina, nzi alakanye kambe hi lezo, nzi lonzowote hi wukulu ga wuxinji ga wena!

²³ Masikwini walawo nzi lo wona kambe a vaJuda lava va nga wa tekene ni vavasati va ka Axdodi, ni va ka Amoni, ni va ka Moabi;

²⁴ a vanana vabye va nga mbheteleli ku tiva a lirimi la xiAxdodi ge hambu la xijuda, kanilezi ka lirimi linwe ni linwani va wa wulawula khihlanya.

²⁵ Nzi lo va holovela, nzi va rukatela, a vanwani va kona nzi vaba, nzi hlurula misisi yabye, nzi va hlambanyisa hi Nungungulu, nziku: Mu nga lowolisi a vanhanyana va nwina ka vafana vabye, ge hambu ku lowota a vafana va nwina a vanhanyana vabye, ge hambu ku ti lowolela nwina wutsumbu. Deut. 7:3; Ezra 9:2

²⁶ A hi zalezi zi nga onhisa Solomoni hosi ya ka Israeli ke? Kasi ku wa nga hi na hosi yo kota yena xikari ka matiko wontihe; i wa ranziwa hi Nungungulu, a mu wumbela kuva hosi ya gontlhe Israeli. Ahembaloko, a vavasati va matiko va lo mu onhisa. 2 Sam. 12:24; 1 Tih. 3:13; 2 Kro. 1:12

²⁷ Hi ta mu vumelisa kuyini a kuva mu maha kontlhe kubiha loko, mu onhela Nungungulu wa hina hi ku tekana ni vavasati va matiko?

²⁸ A munwe wa vana va Joiada, nʼwana wa mupristi wa hombe Eliaxiba, i wa hi mwane wa Sanballati a muHoroni. Nzi lo mu hlongola mahlweni ka mina.

²⁹ Nungungulu wa mina, va alakanye, hakuva va nyenyezisile a wupristi, ni xifungo xa wupristi ni xa vaLevi.

³⁰ Hilezo nzi lo va basisa, nzi va tsikisa zontlhe za vamatiko, nzi va nyika mitiro vapristi ni vaLevi, munwe ni munwani a ntirweni wakwe;

³¹ nzi sasisa ni ntiro wa hlengo wa tihunyi, hi zikhati zi yimisilweko, ni wa mihanzu yo ranga. Nungungulu wa mina, nzi alakanye, u nzi mahela kusasa.