Nehemia 1 - Tshwa Bible

Nehemia a kombelela Jerusalema.

¹ A timhaka ta Nehemia nʼwana Hakalia. Hi hweti ya Kislevi, hi lembe ga wu 20, na nzi hi le Xuxani lomu ka khokhola ga kona,

² Hanani, a munwe wa vanakulori, i lo chikela ni vavanuna vo kari, na vata hi le Juda. Nzi lo va wutisa xungetano ni vaJuda lava va ponileko, va nga wa humile wukhumbini, ni muti wa Jerusalema.

³ Vaku ka mina: A misalela leyi yi humileko wukhumbini, yi akileko tikweni legiya, va le kuxanisekeni ka hombe nguvu ni nzhukanweni. A ligingisi la Jerusalema kambe li khungumulwe, a tivati ta lona ni hisilwe hi nzilo. 2 Tih. 25:9

⁴ Na nzi zwile timhaka leto, nzi lo tshama lahasi nzi rila, nzi hlaluka masiku yo kari. Nzi lo yila nzi kombela mahlweni ka Nungungulu wa tilo,

⁵ nziku: Nza ku khongotela Jehova, wena Nungungulu wa tilo, Nungungulu wa hombe a chavekako, loyi a hlayisako a xivumelwano, a mahela wuxinji lava va mu ranzako va hlayisako zileletelo zakwe, Ekso. 20:6; Mitse. 14:18; Dan. 9:4

⁶ ngha a ndleve ya wena yi panga, ni mahlo ya wena ma vululeka, kasi wa fela kuzwa a mukombelo wa nanza ga wena, lowu nzi wu kombelako xikhati lexi, wusiku ni mumu, nzi kombelelako a vanana va ka Israeli, a malanza ya wena, na nzi wulela zionho zabye, lezi hi ku onheleko. Ina, mina ni vadadani va mina hi onhile.

⁷ Hi ku onhele nguvu, a hi hlayisangi zileletelo, ni milayo, ni ziyimiso lezi u nga zi leletela nanza ga wena Mosi.

⁸ Nza ku khongotela lezaku u alakanya lezi u nga byela a nanza ga wena Mosi, uku: Loku mu hambunyeta, nzi ta mu hangalasa ni matiko; Levi 26:27

⁹ kanilezi loku mu tlhelela ka mina, mu hlayisa a zileletelo za mina mu zi maha, hambu loku mu hoxilwe muya magemeta-musi ya tilo, nzi ta va tsombanyisa nzi va wuyiseta wutshanwini legi nzi hlawuleko a kuva wuakelo ga vito ga mina.

¹⁰ Makunu tawa hi malanza ya wena, a vanhu va wena, lava u va tiruleko hi ntamu wa wena, hi canja ga wena ga ntamu.

¹¹ Hosi, nza ku khongotela, panga ndleve ya wena uzwa mukombelo wa nanza ga wena, ni mukombelo wa malanza ya wena, tawa ma tsakelako ku chava a vito ga wena. Nza ku khongotela lezaku u vuvumisa a nanza ga wena nyamutlha, u mu mahela tipswalo kuwoneni ka wanuna loyi. (Makunu nzi wa hi muweleli Wa gombe ga hosi.)