Mutshawuteli 8 - Tshwa Bible

¹ Himani a fananako ni tlhari? Himani loye a zi kotako ku tlhamusela mhaka ke? A wutlhari ga munhu gi maha nghohe yakwe yi ngangamela, Ku zunya ka nghohe yakwe ku hunzulwa.

² Nziku: Hlayisa a zileletelo za hosi, Hi kota ya xifungo xa wena ka Nungungulu. Mat. 22:21; 1 Ped. 2:17

³ U nga tsutsumeli ku suka mahlweni ka yona, U nga nonohisi mhakeni yo biha; Hakuva i maha lezi zi mu xalalisako.

⁴ A gezu ga hosi gi na ni ntamu; Himani a ta ngaku kakwe: U maha yini ke?

⁵ Loyi a hlayisako a xileletelo, cima a nga ta tiva kubiha; A mbilu ya tlhari ya tiva xikhati ni fanelo.

⁶ Hakuva a mhaka yinwe ni yinwani yi na ni xikhati xa yona ni tsemela; Hakuva a kubiha ka munhu ka mu binzela.

⁷ A nga tivi lexi xi ta nga humelela; Himani a nga zi kotako ku mu byela lezaku xi ta humelelisa kuyini?

⁸ A ku na munhu a nga ni ntamu hehla ka mheho, a ku yi khoma, Ge, hambu ku laya hi siku ga kufa, Ku hava kutlhatlheka yimpini leyo; Ni loyi wa kubiha a nga hanyiswi hi kubiha kakwe.

⁹ Zontlhe lezo nzi zi wonile laha nzi nga ehleketa hi yontlhe mitiro leyi yi mahiwako lahasi ka gambo, a xikhatini lexi munwe a fumela munwani a mu yisa khombyeni.

¹⁰ Nzi wonile a vakubiha va lahliwa, va kuma kuhumula, kasi a vakululama vaya kule ni wutshamu go basa, va rivaliwa mutini. Lezo na zonawu a zi nyawuli.

¹¹ Hakuva a kulamulwa ka wakubiha a ku hatlisi kuta, a timbilu ta vanhu ti navela ku maha zo biha.

¹² Loku muonhi a maha kubiha zana ga makhati, hambu loku masiku yakwe ma hlaya laha misaveni, nza zi tiva lezaku lava va chavako Nungungulu va ta humelela, hakuva va mu chava mahlweni kakwe. Deut. 6:24; Tis. 33:18

¹³ Kanilezi a wakubiha cima a nga ta kateka, ge, hambu kuva ni masiku ya ku tala; i ta hunza kukotisa nzhuti, hakuva a nga chavangi Nungungulu.

¹⁴ Ku kona a kunganyawuli ku mahiwako laha misaveni; lezaku ku nani valulamileko lava va kumako nchachazelo lowu wu faneleko vakubiha, ku hi ni vakubiha va kumako a nchachazelo lowu wu faneleko valulamileko. Nzi lo wula lezaku lezi na zonawu a zi nyawuli.

¹⁵ Zonake nzi lo dzunza litsako, hakuva munhu a nga na xilo xa chukwana lahasi ka gambo ku hunza lezaku aga, anwa, a tsaka, hakuva hi lexo a xi bhinzuleko hi ntiro wa masiku lawa Nungungulu a mu nyikileko lahasi ka gambo.

¹⁶ Laha nzi nga nyiketela mbilu ya mina ku tiva wutlhari, ni ku wona mitiro leyi yi mahiwako laha misaveni, lezaku vanwani va nga kumi wurongo hlikanhi ni wusiku,

¹⁷ zonake nzi lo wona a mitiro yontlhe ya Nungungulu, lezaku munhu a nga zi koti ku pima lezi zi mahiwako lahasi ka gambo; hakuva hambu loku a munhu a ti karata ku zi hlotisisa, cima a nga zi pimi. Ina, hambu ni tlhari, loku yi ringa ku zi pima, cima a yi zi kumi.