Mutshawuteli 4 - Tshwa Bible

¹ Nzi lo engeta nzi wona a zixaniso zontlhe lezi zi mahiwako lahasi ka gambo. Nzi lo wona mihloti ya lava va xanisiwako, na va nga hi na mutangalisi; a vaxanisi vabye va wa hi ni tihanyi, kanilezi vona va wa nga hi na mutangalisi.

² Hilezo nzite: Lava va fileko kaleloko va katekile ku hunza lava va ha hanyako; Joba 3:3; Jer. 20:14

³ kanilezi lava va kalako va nga se kuva kona va katekile ku hunza vontlhe, hakuva a va wonangi a mitiro ya kubiha leyi yi mahiwako lahasi ka gambo.

⁴ Zonake nzi lo wona lezaku a kutikarata kontlhe ni wihi ntiro wa wutlhari wu huma hi kota ya wukhuxu hi muakelwani. Lezo kambe a zi nyawuli, hi ku lanza mheho ntsena.

⁵ A xipumbu xi khumbareta mawoko ya xona, xiga miri wa xona.

⁶ I chukwana a kuva ni zitsongwani zinwe ni kurula ku hunza a ku kuna zo tala hi kukarateka ni ku lanza mheho.

⁷ Nzi lo engeta nzi wona lezi zi nga nyawuliko lahasi ka gambo:

⁸ Ku kona munhu loyi a nga yece, a nga hi na wumbiri; loyi a nga hiko na nʼwana hambu nakulobye; hambu zi hi tano, a ntiro wakwe a wu na magumo, a mahlo yakwe a ma enelisiwi hi wukosi. I wula aku: Nzi ti karatela mani, nzi ti tsonela yini a makatekwa ke? Lezo kambe a zi nyawuli, i ntiro wo bhinza.

⁹ A vambiri va chukwana ku hunza munwe, hakuva va nani nchachazelo wu nene ntirweni wabye;

¹⁰ hakuva loku munwe awa, munwani i ta vuxa munghana wakwe; kanilezi khombo ka loyi a nga yece loku awa, na a nga hi na munwani wa ku mu vuxa.

¹¹ Ni kambe, loku vambiri va etlela zinwe va kufumetana; kanilezi a munwe a nga kufumelisa kuyini ke?

¹² Munwe a nga hlula loye a nga yece, kanilezi loku va hi vambiri va ta mu hlula. A gota legi gi petsilweko kunharu a gi phewuki hi kuhatlisa.

¹³ I chukwana a jaha gi nga xisiwana na gi hi ni wutivi ku hunza a hosi ya xipumbu yi kumbileko, leyi yi nga zi kotiko ku lulekwa.

¹⁴ Hakuva a wa kunghahi i lo huma hi le paxweni a ta fuma, hambu lezo a nga belekiwa na hi xisiwana mufunweni wakwe.

¹⁵ Nzi lo wona vontlhe lava va hanyako lahasi ka gambo, va lanzela a jaha legi gi ta nga teka wutshamu ga munwani;

¹⁶ a vanhu lava a nga hi hehla kabye a va nga hi na magumo, kanilezi lava va ta ngata hi lenzhako cima va nga ta mu tsakela. Hizinene, na zonawu lezi a zi nyawuli, ku lanzela mheho ntsena.