Mutshawuteli 3 - Tshwa Bible

A xilo xinwe ni xinwani xi na ni nguva ya xona.

¹ A xilo xinwe ni xinwani xi nani nguva ya xona, ku nani xikhati ka zilo zontlhe lezi zi mahiwako lahasi ka tilo.

² Ku nani xikhati xa ku belekiwa, ni xikhati xa kufa; a xikhati xa ku byala, ni xikhati xa ku tsuwula lezi zi byalilweko; Gen. 8:22; Joba 14:5

³ ku nani xikhati xa ku daya, ni xikhati xa ku chuma; a xikhati xa ku khungumula, ni xikhati xa ku aka;

⁴ a xikhati xa ku rila, ni xikhati xa ku hleka; a xikhati xa hlomulo, ni xikhati xa ku kina;

⁵ a xikhati xa ku hoxa maribye, ni xikhati xa ku wungeletela maribye; a xikhati xa ku pswopswa, ni xikhati xa ku tsika ku pswopswa;

⁶ a xikhati xa ku lava, ni xikhati xa ku lahlekelwa; a xikhati xa ku hlayisa, ni xikhati xa ku cukumeta;

⁷ a xikhati xa ku hanzula, ni xikhati xa ku runga; a xikhati xa ku miyela, ni xikhati xa ku wulawula;

⁸ a xikhati xa ku ranza, ni xikhati xa ku venga; a xikhati xa tiyimpi, ni xikhati xa kurula.

⁹ Loyi a tirako i bhinzula yini hi ku ti karata kakwe ke?

¹⁰ Nzi wonile a mitiro leyi Nungungulu a nyikileko vanana va vanhu lezaku va ti karata ha yona.

¹¹ I mahile zontlhe zi sasekile hi xikhati xa zona; kambe i vekile timbilwini tabye ku alakanya xikhati xi nga mbheliko; hambu zi hi tano, a nga kona munhu a tivako ntiro lowu Nungungulu a wu mahileko, a masangulo ya wona ni magumo ya wona.

¹² Nza zi tiva lezaku lezi zi va sasekelako nguvu hi ku ti tsakela ni ku tshameka khwatsi kuhanyeni kabye.

¹³ Ni kambe, loku munhu aga, anwa a tsakela ntirweni wakwe wontihe, xinyikiwo xa Nungungulu.

¹⁴ Nza zi tiva lezaku ni xihi lexi Nungungulu a xi mahako, xi ta simamisa kala ku pinzuka; ku hava nchumu wu nga engetelwako ka xona, hambu ku hungulwa. Nungungulu i zi mahile kasi vanhu vave ni xichawo mahlweni kakwe. Tis. 33:11; Isa. 46:10

¹⁵ Lexi xi nga kona makunu xi wa hi kona ni kale, ni lexi xi ta nga maheka, xi mahekile kale; Nungungulu i humesa luswa lezi zi hunzileko.

A kuvumaleka ka nongameto.

¹⁶ Tlhatakumbiri, nzi lo wona lahasi ka gambo lezaku ku kona kubiha xitshanwini xa kulamula, ni wutshanwini ga kululama kugoha ku kona.

¹⁷ Nzite mbilwini ya mina; Nungungulu i ta lamula valulamileko ni va kubiha; hakuva i vekele xikhati ka mhaka yinwe ni yinwani ni ntiro munwe ni munwani.

¹⁸ Nzite mbilwini ya mina: Zi mahiwa lezo hi kota ya vana va vanhu, lezaku Nungungulu i ta va ringa, kasi va fela ku tiva lezaku vona va fanana ni zihari.

¹⁹ Hakuva a xiavelo xa vana va vanhu xa fana ni lexi xa zihari, xiavelo xinwe. Kota lezi munhu a fako, ni xihari xa fawo; i moya munwe wu nga kona ka yena ni ka xona. Hikwalaho a munhu a nga hunzi xihari; hakuva zontlhe a zi nyawuli.

²⁰ Zontlhe ziya wutshamu ginwe; zontlhe zi mahilwe hi ntshuri, hikwalaho zontlhe zi tlhela ziya ntshurini kambe. Gen. 2:19; Tis. 104:29; Joba 34:15

²¹ Himani a tivako loku a moya wa vana va vanhu wuya hehla, ni loku a moya wa zihari zi relela lahasi misaveni?

²² Hikwalaho mina nzi lo wona lezaku zi mu sasekele nguvu munhu lezaku a tsakela mitiro yakwe, hakuva hi xona xiavelo xakwe. Hakuva himani a ta nga mu wuyisa, kasi ku ta wona ni ku tsaka hi lezi zi ta nga humelela nzhako kakwe?