Mutshawuteli 12 - Tshwa Bible

¹ Alakanya Muvangi wa wena masikwini ya wuswa ga wena, na ku nga se kuta a masiku ya kubiha, na ma nga se ku chikela malembe lawa u ta nga wula ha wona, aku; A nzi tsakiswi ha wona; Tis. 71:17; 119:9

² na ku nga se ku pfupeliswa gambo, ni kuwonekela, a hweti ni tinyeleti, ni marefu na ma nga se nga lanzela vula;

³ a siku legi a varinzeli va yindlu va ta nga rurumela, ni tinhenha ti ta nga goveka, ni vagayi va ta nga yima hakuva va nga va tsongwani, ni lava va cuwukako lomu tinjhaneleni va ta nga pfupeliswa; Gen. 27:1

⁴ ni tivati ti ta valiwa maphangweni, laha a kuvuma ka xigayo ku hunguleka; a siku ku ta nga vukiwa hi kuba ka tinyanyani; a siku legi a ziyimbeleli zontlhe zi ta nga karala;

⁵ a siku legi va ta nga chava tindlela ta zitsunga, ni kutshisa ku tava lomu ndleleni; laha a sinya ya almonde yi pfepfa zitsangi, ni banzala gi ta nga binza, ni kunavela ku ta nga mbhela; hakuva munhu i taya mutini wakwe wa pinzukelwa, a varili na va rinzele lomu maphangweni;

⁶ hi mahlweni a lingoti la siliva na li nga se ku pewuka, ni mukelo wa nzalama na wu nga se nga fayeka, kutani a guwana na gi nga se ku fayeka le hlobyeni, ni nghonghola na yi nga se ku tshoveka lomu nkeleni,

⁷ ni ntshuri wu nga se tlhela wuya misaveni khwatsi hilezi wu nga hi zona, ni moya wu tlhelela ka Nungungulu loyi a nga munyiki wa wona. Gen. 2:7; Lu. 23:46; Miti. 17:25

⁸ A kunganyawuli ka zinganyawuliko! ku wula Mukaneli. Zontlhe a zi nyawuli.

A timhaka ta magumo.

⁹ Tlhatakumbiri, kota lezi Mukaneli a nga tlharihile, i lo simamisa a gonzisa wutivi ka vanhu; ina, i lo kambisisa, a hlolisisa, a xaxameta mavingu yo tala.

¹⁰ A Mukaneli i lo hlotisisa a timhaka leti ti tsakisako, lezi zi tsalilweko na zi lulamile, a timhaka ta zinene.

¹¹ A timhaka ta titlhari ti khwatsi tipopo, a mavingu ya tona ti khwatsi tikhokho leti ti gongonzelweko; wontihe ma nyikilwe hi Murisi munwe. Isa. 49:2; Jer. 23:29; Maheb. 4:12

¹² Ni kambe, nwananga, ngha u vumela ku lulekiwa: A ku tsala mabhuku yo tala a ku na magumo, ni kugonza nguvu ku karata miri.

¹³ A hi nga zwani a magumo ya mhaka yontlhe: Chava Nungungulu, u hlayisa zileletelo zakwe; hakuva leyo hi yona fanelo yontlhe ya munhu.

¹⁴ Hakuva Nungungulu i ta yisa a mitiro yontlhe kulamuleni, ni zontlhe lezi zi fihlilweko, hambu zi sasekile, kutani za kubiha. 1 Kor. 4:5; 2 Kor. 5:10; Kuv. 20:12