Mutshawuteli 11 - Tshwa Bible

¹ Rumela a zakuga za wena hehla ka mati, hakuva anzhako ka masiku yo tala u ta tlhela u zi kuma.

² Zi avanyisele ka ntlhanu ni vambiri, hambu ka ntlhanu ni vanharu; hakuva a ku tivi a khombo gi ta nga huma laha misaveni.

³ Loku a marefu ma tele hi vula ma yi chulula laha misaveni; ni loku sinya yi wela tlhelo ga Dzonga kutani tlhelo ga Nwalungu, yi ta sala kwalaho yi weleko kona.

⁴ Loyi a langutelako mheho a nga na ku byala, ni loyi a cuwukako marefu cima a nga ta tshovela.

⁵ Khwatsi hilezi u nga tiviko a ndlela ya mheho, hambu ni mawumbela ya marambu lomu rumbyini ga loyi a nga ni nyimba, zinghaho cima a ku tivi mitiro ya Nungungulu loyi a mahako zilo zontlhe.

⁶ Byala a mbewu ya wena na ga hi mixo, ni laha gambyeni u nga humuti a woko ga wena; hakuva a ku zi tivi lezaku ku ta mila yihi, leyi kutani leyiya, hambu loku ti mila hi wumbiri ga tona.

⁷ Hakunene, a kuwonekela ka nanziha, kambe za tsakisa a kuva mahlo ma wona gambo.

⁸ Hambu loku munhu a hanya malembe yo tala, ngha a tsaka ka wona wontihe; kanilezi a a alakanye a masiku ya munyama, hakuva ma tava manyingi. Zontlhe lezi zi ta nga humelela a zi nyawuli.

A ziluleko ka vanhu vaswa.

⁹ O jaha, tsakela a wuswa ga wena, a mbilu ya wena a yi ku tsakise masikwini ya wuswa ga wena; famba hi tindlela ta kuranza ka mbilu ya wena, ni kuwoneni ka mahlo ya wena; kanilezi tiva lezaku Nungungulu i ta ku lamula hi zontlhe lezi zilo. Mat. 12:36; 2 Kor. 5:10

¹⁰ Hikwalaho, susa kukarateka mbilwini ya wena, u susa a kubayiseka ontlhe mirini wa wena; hakuva a wunwanana ni wujaha a zi nyawuli.