Mutshawuteli 10 - Tshwa Bible

Kutlhariha ni wupumbu.

¹ A tinhongani ti fileko ti maha mafura ya mutoti ma nuha ni ku bola, ni wupumbu gi tsongwani gi onha wutlhari ni wudzunzo.

² A mbilu ya tlhari yi le reveni gakwe ga xinene, kanilezi a mbilu ya xipumbu yi le reveni ga ximatse.

³ Loku xipumbu xi famba ndleleni xi vumala wutlhari; xi wula ka vontlhe xiku: Hi nga wona xipumbu!

⁴ Loku mufumeli a ku zangarela, u nga tsiki xikhundla xa wena; hakuva a kurutisa ku sivela a zigoho za hombe.

⁵ Nzi wonile xilo xo biha lahasi ka gambo, na xi hi xihoxo xi mahiwako hi mufumeli.

⁶ A wupumbu gi vekiwa wutshanwini gi tlakukileko, a vadzunzekileko va tshama lahasi.

⁷ Nzi wonile tikhumbi na ti khilele mahaxi, kasi tihosana ti famba hi milenge kota tikhumbi.

⁸ Loyi a ketako rinzi i ta wela ka gona, ni loyi a tshovako lihlavu i ta lunwa hi nyoka.

⁹ Loyi a wumbutelako maribye i ta bayiswa ha wona, ni loyi a tsemako tihunyi i le mhangweni.

¹⁰ Loku a wutla gi vinyekile gi nga lotiwi, a munhu i fanele ku engetela ntamu; kanilezi a wutlhari gi vuna munhu ku humelela.

¹¹ Loku nyoka yi luma na yi nga se ku lumbeliwa, a noyi a yi vuneki nchumu.

¹² A timhaka ta nomu wa tlhari ta tsakisa; kanilezi a milomu ya xipumbu yi ta xi lovisa.

¹³ A masangulo ya timhaka ta nomu wa xona mbupumbu, ni magumo ya kuwulawula ka xona wuhunguki.

¹⁴ A xipumbu xi anzisa timhaka, kanilezi munhu a nga zi tivi lezi zi ta nga humelela; himani a nga zi kotako ku mu byela lezi zi ta nga kuva kona anzhako kakwe ke?

¹⁵ A ntiro wa xipumbu wa xi karata, hakuva a xi yi tivi a ndlela yi yako mutini.

¹⁶ Khombo ka wena tiko legi a hosi ya wena yi nga nwanana, legi a tihosana ta gona ti gako na ga hi mixo. 2 Kro. 13:7; Isa. 3:4

¹⁷ U katekile wena tiko legi a hosi ya wena yi nga nʼwana wa yindlu ya wuhosi, legi a tihosana ta gona ti gako hi xikhati xa kona, kasi ku kuma ntamu na ku nga hi ku ti popisa.

¹⁸ A timbalelo tiwa hi kota ya wulolo, ni langwa la vuta hi kota ya ku fulelwa hi mandla ya lolo.

¹⁹ A mubuzo wu mahelwe mahleko, ni vinya gi tsakisa kuhanya; zontlhe zi kumiwa hi mali.

²⁰ U nga rukateli hosi, hambu ni le maalakanyweni ya wena; u nga rukateli munhu a fumileko hambu lomu tsawini ga wena; hakuva a tinyanyani ta ndengelenge ti nga dzuka ti rwala a mhaka ya kona, leti ti purumako ti ya hlawutela timhaka ta wena. Ekso. 22:28; Miti. 23:5; Rom. 13:2