Mitsengo 8 - Tshwa Bible

A milayo yi tsalangeneko ya kukhozela.

¹ Jehova i lo wulawula na Mosi, aku:

² Byela Aroni uku ngalo: Loku u yimisa a tikandiya, a ntlhanu wa tona ni timbiri ti ta woningela mahlweni ka meza ya tikandiya. Ekso. 25:37

³ Zonake Aroni i lo maha lezo, i lo yimisa tikandiya kasi ti woningela a wutshamu ga le mahlweni ka meza ya tikandiya, kota lezi Jehova a leleteleko Mosi.

⁴ A meza ya tikandiya yi wa hi ya nzalama yi fulilweko. Kusukela xikhatweni xa kona kala zitsangini yi wa hi ya nzalama yi fulilweko. Zinghaho va lo maha a meza ya tikandiya khwatsi hi lezi Jehova a kombisileko Mosi.

⁵ Jehova i lo wulawula na Mosi, aku:

⁶ Teka vaLevi lomu xikari ka vanana va ka Israeli, u va basisa.

⁷ Lezi u ta nga mahisa zona kasi ku va basisa; hi lezi: U ta va nwatsekela hi mati ya ku tshungula, zonake va ti halula hi likari wontihe miri wabye; va hlaza tinguwo tabye, va ti basisisa lezo.

⁸ Zonake va ta teka a role zinwe ni muphahlo wa zakuga; ma nga mapa yo saseka, ma vuvilweko hi mafura, u teka ni ginwani role ga muphahlo wa kuonha.

⁹ U ta yisa a vaLevi mahlweni ka tenda ga mutlhangano; zonake u tsombanyisa a mutlhangano wontihe wa vanana va ka Israeli.

¹⁰ Loku u tshinetile a vaLevi mahlweni, ka Jehova, a vanana va ka Israeli va ta tlhateka mandla yabye hehla kabye.

¹¹ Zonake Aroni i ta nyikela a vaLevi a kuva munyikelo wa ku nziwitela mahlweni ka Jehova, lowu wu humako ka vanana va ka Israeli; zonake va ta tira a ntiro wa kukhozela mahlweni ka Jehova.

¹² Ni vaLevi va ta tlhateka mandla yabye hehla ka tihloko ta tinkuzi, zonake u ta teka yinwe nkuzi u maha ha yona a muphahlelo wa kuonha, ni yinwani u maha a muphahlelo wa kuhiswa ka Jehova, kasi a vaLevi va fela ku mahelwa nzhiho.

¹³ U ta yimisa a vaLevi mahlweni ka Aroni ni mahlweni ka vana vakwe, zonake u ta va nyikela va maha munyikelo wu nziwitelweko wa Jehova.

¹⁴ U ta hlawulisa lezo a vaLevi xikari ka vanana va ka Israeli, zonake a vaLevi va tava va mina.

¹⁵ A vaLevi va ta enghena ntirweni wa tenda ga mutlhangano, loku u va basisile ni ku va nyikela a kuva munyikelo wa ku nziwitela;

¹⁶ hakuva xikari ka vanana va ka Israeli, vona va nyikelwe ka mina; na mina nzi va hlawulile matshanwini ya matewula wontihe ya vanana va ka Israeli.

¹⁷ Hakuva a matewula wontihe ya vanana va ka Israeli nja mina, hambu matewula ya munhu, hambu matewula ya xifuyo; kusukela a siku lego nzi nga daya a matewula ya vaGipite, vona va basiselwe mina.

¹⁸ Nzi hlawule vaLevi matshanwini ya matewula wontihe ya vanana va ka Israeli.

¹⁹ Hizinene nzi nyikele a vaLevi ka Aroni ni ka vana vakwe, a ku kasi va tira a ntiro wa vanana va ka Israeli lomu ka tenda ga mutlhangano, ni lezaku va maha a miphahlo ya minzhiho ya vanana va ka Israeli, kasi ku nga dzuki ku huma mhango xikari ka vanana va ka Israeli, laha na va tshinela kusuhani ka wutshamu ga kubasa.

²⁰ Mosi na Aroni ni tlhangano wontihe wa vanana va ka Israeli va lo maha zalezo ka vanana va vaLevi; khwatsi hilezi Mosi a leletelweko hi Jehova.

²¹ A vaLevi va lo ti basisa, va hlaza tinguwo tabye; na Aroni i lo va nyikela a kuva munyikelo wa ku nziwitela mahlweni ka Jehova, zonake i lo va mahela muphahlelo wa nzhiho kasi ku va basisa.

²² Anzhako ka lezo a vaLevi va lota va ta tira a ntiro wabye lomu ka tenda ga mutlhangano, mahlweni ka Aroni ni mahlweni ka vana vakwe, khwatsi hilezi Jehova a leleteleko Mosi hi tlhelo ga vaLevi; hi zalezo va nga mahelwa zona.

²³ Na Jehova i lo wulawula ka Mosi, aku:

²⁴ A milayo ya vaLevi hi leyi: Lava va nga ni 25 wa malembe ni kuya mahlweni, va ta enghena ntirweni wa tenda ga mutlhangano.

²⁵ Kanilezi loku munhu a chikela ntangeni ya 50 wa malembe, i ta huma ntirweni wa kukhozela, cima a nga ta ha wu tira kambe.

²⁶ Kanilezi a nga vunetela vamakabye vakwe lomu tendeni ga mutlhangano, a hlayisa a zibya, kanilezi na nga tiri a ntiro wo kari. U ta maha lezo ka vaLevi hi tlhelo ga ntiro wabye.