Mitsengo 6 - Tshwa Bible

A milayo ya wunazira.

¹ Jehova i lo wulawula ka Mosi, aku:

² Byela a vanana va ka Israeli, uku ka vona: Loku munhu, kani ngwanuna kutani ngwasati, a ti hlawutela ku ti nyikela ka Jehova hi ku hlambanya ku maha muNazira,

³ i ta ti tsona a vinya ni byala; cima a nga tanwa a vinagre ya vinya, kutani vinagre ya kunwa ku popako; cima a nga tanwa a dosi ga mauva hambu ni kuga mauva yo nyuka ni lawa ma womileko. Levi 10:9; Vala. 13:7

⁴ Ka wontihe masiku lawa ya wunazira gakwe, cima a nga taga lezi zi humako lomu ka sinya ya mauva, kusukela ka timbewu ta kona kala ka makamba ya kona,

⁵ ka wontihe masiku ya wunazira gakwe, cima ku nga ta enghena likari hlokweni yakwe, kala ku tatiseka a masiku lawo a ti hlawuleleko ku tirela Jehova ka wona, i tava loyi a hlazekileko, i ta tsika misisi yakwe yi kula.

⁶ Ka wontihe masiku lawa a ti hlawuleleko Jehova akuva munazira, a nga dzuki a tshinelela xirumbi;

⁷ hambu loku a hi raru wakwe, kutani mamani wakwe, hambu loku ku hi makabye wakwe, a nga dzuki a ti nyenyezisa ha vona loku va file, hakuva a xifungo xa ku ti hlawutela kakwe Nungungulu wa yena xi le hlokweni yakwe.

⁸ Ka masiku wontihe ya wunazira gakwe i basile ka Jehova.

⁹ Kasike loku munhu afa hi xitshuketi kusuhani kakwe, zonake ku nyenyeziswa a hloko yakwe leyi yi nga ni xifungo xa wunazira, yena i ta cinga misisi yakwe hi siku ga ku ti basisa kakwe, i ta cinga hi siku ga wuntlhanu ni mambiri.

¹⁰ Hi siku ga wuntlhanu ni manharu i ta neha ka mupristi a matuva mambiri, hambu mavinyani mambiri ya xipomba, laha nyangweni ya tenda ga mutlhangano.

¹¹ A mupristi i ta nyikela ginwe gi maha a muphahlelo wa kuonha, ni ginwani gi ta maha munyikelo wa kuhiswa; i ta mu mahela muphahlelo wa nzhiho wa kuonha kakwe, hakuva i ti nyenyezisile hi xirumbi; gwalego siku i ta basisa a hloko yakwe.

¹² I ta engeta a ti hlawulele a masiku ya wunazira gakwe ka Jehova. Zonake i ta nyikela a hambana ya lembe ginwe a wukale, a kuva muphahlelo wa kuonha; kanilezi a masiku lawa ma hunzileko cima ma nga ta hlayiwa, hakuva a wunazira gakwe gi nyenyezisilwe.

¹³ Lowu hi nayo wa wunazira. A siku lego ma ta nga tatiseka a masiku ya wunazira gakwe, i ta nehiwa nyangweni ya tenda ga mutlhangano.

¹⁴ Zonake i ta nyikela ka Jehova a yivana ya lembe ginwe a wukale, leyi yi nga hiko na bawa; yi tava munyikelo wa kuhiswa, ni yivu ya lembe ginwe a wukale ya nkati, leyi yi nga hiko na bawa, yi tava ya muphahlelo wa kuonha, ni hamba yi nga hiko na bawa, yi tava muphahlelo wa kubonga.

¹⁵ I ta neha ni xirunzu xa zibaba zi nga hiko na comelo, na ti hi timbunzu ta mapa yo saseka leti ti vuvilweko hi mafura, ni zibaba zi nga comelwangiko zi totilweko hi mafura. Hehla ka lezo i ta neha ni munyikelo wa zakuga ni zakunwa.

¹⁶ A mupristi i ta zi neha mahlweni ka Jehova, zonake i ta nyikela a muphahlelo wakwe wa kuonha, ni munyikelo wakwe wa kuhiswa.

¹⁷ Ni kambe i ta nyikela a hamba ya muphahlelo wa kubonga ka Jehova, ni xirunzu xa zibaba zi nga hiko na comelo, a mupristi i ta nyikela a munyikelo wakwe wa zakuga ni zakunwa.

¹⁸ A munazira i ta cinga a hloko yakwe yi nga ni xifungo xa wunazira laha nyangweni ya tenda ga mutlhangano; i ta teka misisi yakwe a yi hisa nzilweni lowu wu nga lahasi ka muphahlelo wa kubonga. Miti. 18:18; 21:28

¹⁹ A mupristi i ta teka a woko gi bhikilweko ga hamba, ni mbunzu lomu xirunzwini yi nga comelwangiko, ni xibaba xi nga hiko na comelo, a zi veka mandleni ya munazira, anzhako ko ngha a cingile a hloko yakwe.

²⁰ A mupristi i ta zi nziwitela mahlweni ka Jehova; lezo zi tava zilo zi basileko nguvu, zi tava za mupristi, zinwe ni xifuva lexi xi nga nziwitelwa, ni nenge wa muphahlo. Zonake anzhako ka lezo a munazira wa zi kota kunwa a vinya. Ekso. 29:27; Levi 7:31

²¹ Lowu hi nayo wa munazira loyi a bohileko hi kuhlambanya; ni munyikelo wakwe ka Jehova hi kota ya wunazira gakwe, ahandle ka lezi a zi kotako ku nyikela kota ntamu wakwe. I ta mahisa lezi loku a ti bohile hi kuhlambanya; i ta lanzela a nayo wa wunazira gakwe.

²² Jehova i lo wulawula ka Mosi, aku:

²³ Byela Aroni ni vana vakwe, uku ngalo kabye: Mu ta katekisa a vanana va ka Israeli, muku ngalo kabye:

²⁴ Jehova a ku katekise, a ku hlayisa;

²⁵ Jehova a ku woningele hi nghohe yakwe, a ku mahela wuxinji!

²⁶ Jehova a ku hunzulusele a nghohe yakwe, a ku nyika kurula!

²⁷ Va ta vekisa lezo a vito ga mina hehla ka vanana va ka Israeli, zonake mina nzi ta va katekisa.