Mitsengo 36 - Tshwa Bible

Titshomba ta vanhwana va Zelofehade.

¹ Ku lo tshinela a manghanakana ya vanana va ka Gileade, a nʼwana wa Makira wa Manasa, va nyangwa ya Josefa, va ta wulawula mahlweni ka Mosi ni mahlweni ka tihosana, va nga vona vafumeli va tinyangwa ta vanana va ka Israeli, vaku:

² Jehova i leletele a hosi ya hina ku avela tiko hi ku hlahluva xikari ka vanana va ka Israeli, a kuva a tshomba yabye, ni kambe a hosi ya hina yi leletelwe hi Jehova a ku nyika a tshomba ya Zelofehade, makabye wa hina, ka vanhanyana vakwe. Mitse. 26:55; Jox. 17:3

³ Makunu loku va tekiwa hi vavanuna va tinwani tinyangwa ta vanana va ka Israeli, a tshomba yabye yi ta susiwa lomu tshombeni ya vararu vabye, zonake yiya engetela a tshomba ya nyangwa leyi a tekilweko ka yona, kanilezi yi hungulwa lomu ka tshomba ya hina.

⁴ Makunu laha ku ta nga chikela lembe ga jubileu xikari ka vanana va ka Israeli, a tshomba yabye yi taya engetela a tshomba ya nyangwa leyi a tekilweko ka yona, kanilezi yi hungulwa lomu tshombeni ya vararu va hina. Levi 25:10

⁵ Zonake Mosi i lo byela a vanana va ka Israeli, a kuleletela ka Jehova, aku: A nyangwa ya vanana va ka Josefa yi wula zona.

⁶ Hi yona mhaka leyo Jehova a leleteleko hi vanhanyana va ka Zelofehade aku ngalo: A va tekiwe hi lava va va ranzako; kanilezi a va tekiwe lomu mingangweni ya nyangwa ya vararu vabye,

⁷ kasi a tshomba ya vanana va ka Israeli yi nga nzulanzuli lomu ka tinwani tinyangwa; kanilezi a vanana va ka Israeli va ta namarela munwe ni munwani lomu ka tshomba ya nyangwa ya vararu vakwe.

⁸ Hikwalaho a nhanyana loyi a nga ni tshomba lomu ka nyangwa ya vanana va ka Israeli, i ta tekiwa hi nuna wa yindlu ya nyangwa ya vararu vakwe, kasi a vanana va ka Israeli loyi ni loyi a tshama ka tshomba ya raru wakwe.

⁹ Lezo a tshomba ya nyangwa yinwe a yi nga humi yi yiswa ka yinwani nyangwa; hakuva tinyangwa ta vanana va ka Israeli ti ta namarela lomu titshombeni tabye.

¹⁰ A vanana va ka Zelofehade va lo maha kota lezi Jehova a leleteleko Mosi;

¹¹ hakuva Mahla, na Tirza, na Hogla, na Milka, na Noa, a vanhanyana va Zelofehade va lo tekiwa hi vavanuna va vakokwani vabye.

¹² Va tekiwa mingangweni ya vanana va ka Manasa a nʼwana Josefa, zonake a tshomba yabye yi lo tshama lomu ka nyangwa ya yindlu ya raru wabye.

¹³ Leyi hi milayo ni zileletelo lezi Jehova a nga nyika ka vanana va ka Israeli ha Mosi, le mikoveni ya le Moabi kusuhani ni Jordani ni Jeriko.