Mitsengo 35 - Tshwa Bible

¹ Jehova i lo wulawula ka Mosi le mapuweni ya le Moabi, kusuhani ni le Jordani ni Jeriko, aku:

² Leletela a vanana va ka Israeli lezaku va pambulela a vaLevi a tshomba leyi yi ta ngava yabye, va va nyika miti leyi va ta nga aka ka yona; mu va nyika kambe ni masimu lawa ma renzetekelako a miti yabye. Jox. 21:2

³ Va ta aka a miti yabye ni masimu, ti to gela lomo a tihomu tabye ni zontlhe zifuyo zabye.

⁴ A masimu ya miti leyi mu ta nga nyika vaLevi ma tava 1,000 wa mikono kusukela laha ligingisini la muti ka wontihe matlhelo.

⁵ Mu ta pima hi lahandle ka muti 2,000 wa mikono, ni tlhelo ga le Mutsuwuka-gambo, ni tlhelo ga Dzongeni 2,000 wa mikono, ni tlhelo ga le Mupela-gambo 2,000 wa mikono, ni tlhelo ga le Nwalungu 2,000 wa mikono, ni muti wu ta tshama hi laha xikari; ni laya ma tava masimu ya muti wabye.

⁶ Lomu xikari ka miti leyi mu ta nga nyika vaLevi, ku tava ni ntlhanu wa miti ni munwe leyi yi ta ngava ya wuponelo, kasi a mudayi i ta zi kota ku tsutsumela lomo; ahandle ka leyi mu ta va nyika 42 wa miti. Ekso. 21:13; Deut. 4:41

⁷ Yontlhe a miti leyi mu to nyika vaLevi yi tava 48 wa yona, na yi hi ni masimu ya kona.

⁸ Loku mu teka a miti lomu tshombeni ya vanana va ka Israeli mu nyika vaLevi, mu ta teka yo tala ka nyangwa leyi yi nga ni zo tala, kanilezi mu ta teka yi tsongwani ka leyi yi nga ni ya yitsongwani; a nyangwa yinwe ni yinwani yi ta nyika a miti ka vaLevi khwatsi hi lipimo la tshomba leyi yi amukeleko yona.

⁹ Jehova i lo wulawula ka Mosi, aku:

¹⁰ Byela a vanana va ka Israeli uku: Loku mu tlhatuka a Jordani, mu chikela tikweni ga Kanani,

¹¹ mu ta hlawula a miti leyi yi ta ngava ya wuponelo ga nwina, kasi a mudayi loyi a deleko a munhu hi mhango i ta zi kota ku chavela lomo.

¹² A miti leyi yi ta mu vuna a ku pona ka muphoteli, kasi a mudayi a nga dawi na a nga se yima mahlweni ka tlhangano a lamulwa.

¹³ A xikari ka miti leyi mu ta nga nyika vaLevi, a 6 yi tava miti ya wuponelo.

¹⁴ Mu ta va nyika miti minharu tlhatukweni wa Jordani, ni miti minharu le tikweni ga Kanani. Yi tava miti ya wuponelo.

¹⁵ A miti leyi ya 6 yi tava wuponelo ga vanana va ka Israeli ni muluveli loyi a akileko xikari kabye, kasi ni wihi loyi a dayako munhu hi mhango i ta zi kota ku chavela lomo.

¹⁶ Kasike loku a muba hi simbi zonake afa, loyeke mudayi; hakunene mudayi i ta dawawu. Ekso. 21:12; Levi 24:17

¹⁷ Loku a muba hi ribye legi gi zi kotako ku daya munhu, zonake a munhu afa, loyeke mudayi; ni mudayi i ta dawawu.

¹⁸ Ni loku a muba hi mbhinyi lowu wu zi kotako ku daya munhu zonake a munhu afa, loyeke mudayi; ni mudayi i ta dawawu.

¹⁹ A muphoteli i ta daya mudayi loku a kumana naye.

²⁰ Ni loku munhu a nikinya makabye wakwe hi livengo, kutani a mu hoxa a xilo ha womu zonake afa,

²¹ kutani a muba hi canja gakwe hi livengo zonake afa, ni loyi a mu bileko i ta dawawu, hakuva mudayi; ni muphoteli i ta daya a mudayi loye loku a kumana naye.

²² Kanilezi loku a mu nikinyile hi mhango, na ku hi hava livengo, kutani loku a mu hoxile a xilo hi mhango, na ku nga hi ha womu;

²³ hambu loku a mu hoxile a ribye legi gi dayako na a nga mu woni zonake afa na cima a nga hi nala wakwe, ge hambu ku xuva ku mu lamata,

²⁴ lahoke a tlhangano wu ta lamula xikari ka loyi a mu bileko ni muphoteli hi milayo leyi.

²⁵ Ni tlhangano wu ta tlhatlhisa mudayi canjeni ga muphoteli, ni mutlhangano wu ta mu tlhelisela mutini wa wuponelo lowu a nga tsutsumela ka wona. Yena i ta tshama lomo kala kufa ka mupristi wa hombe loyi a totilweko hi mafura ya kubasa.

²⁶ Kanilezi loku mudayi a tlula a mbhingano wa muti wa wuponelo gakwe,

²⁷ loku a muphoteli a mu kuma lahandle ka mbhingano wa muti wa wuponelo gakwe, ni loku a mu daya a nga na nanzu wa ku daya a mudayi loye.

²⁸ Hakuva a mudayi i fanele ku tshama lomu mutini wa wuponelo kala kufa ka mupristi wa hombe; kanilezi loku mupristi wa hombe afa, yenawu i ta tlhelela tikweni ga tshomba yakwe.

²⁹ Hikwalaho lezi zilo zi tava nayo wa kulamula ka zontlhe zizukulwana za nwina, kontlhe lomu mu ta nga aka kona.

³⁰ Loyi a dayako munhu i ta dawawu, loku ku zwele a milomu ya timboni. A mboni yinwe a yi ringani kuva ni wukustumunyu gi enelako ku daya munhu.

³¹ Mu nga dzuki mu amukela a nzhiho wo tirula a wutomi ga munhu loyi a fanelako ku dawa, hakuva i fanele ku dayiwa hakunene.

³² Mu nga dzuki mu amukela a nzhiho wo tirula loyi a tsutsumeleko mutini wa wuponelo, kasi a zi kota ku tlhelela le tikweni gabye na mupristi wa hombe a nga se kufa.

³³ Mu nga dzuki mu onha a tiko legi mu nga ka gona, hakuva a nkhata wu onha tiko; makunu ku hava muphahlelo munwani wa nkhata lowu wu halatilweko, ntsena wona nkhata wa loye a halatileko nkhata. Gen. 9:6

³⁴ Mu nga onhi a tiko legi mu ta nga aka ka gona, hakuva hi kwalaho nzi tshamako kona; hakuva mina Jehova nzi tshama xikari ka vanana va ka Israeli.