Mitsengo 34 - Tshwa Bible

Kuavelwa ka tiko.

¹ Jehova i lo wulawula ka Mosi, aku:

² Leletela a vanana va ka Israeli uku ngalo: Loku mu chikela tikweni ga le Kanani, gi nga gona tiko lego gi nga tshomba ya nwina (a tiko ga Kanani hi mimbhingano ya gona),

³ hi tlhelo ga le Dzongeni gi ta sukela xiwuleni xa le Zini kala gi chikela le Edomi, zonake a mbhingano wa nwina wa le Dzonga wu ta sukela le magunweni ya Bimbi ga Munyu hi tlhelo ga le Mutsuwuka-gambo; Gen. 14:3; Jox. 15:1

⁴ a mbhingano wu ta renzeleka hi le Dzongeni hi ndlela leyi yi kanzihako kuya le Akrabima, wu hunza hi le Zini, wuya chikela le Dzongeni hi le Kadexa-Barnea; zonake wu komama le Hazaradara, wu tsemakanya hi le Azmoni.

⁵ Kusukela le Azmoni, a mbhingano wu ta komama le xicongwaneni xa le Gipite, wu kala wu chikela le bimbini.

⁶ A mbhingano wa Mupela-gambo wu tava a Bimbi ga Hombe; lowo wu tava wona a mbhingano wa nwina wa le Mupela-gambo.

⁷ A mbhingano wa nwina wa le Nwalungu hi lowu: kusukela Bimbini ga Hombe, mu ta panza hi le xitsungeni xa Hora;

⁸ loku mu sukela le xitsungeni xa Hora, mu ta wu panza hi ndlela ya le Hamate, zonake a mbhingano wu ta ya chikela le Zedade;

⁹ a mbhingano wu ta hunza hi le Zifroni, zonake wu ya chikela le Hazar-Enane; lowu hi wona a mbhingano wa nwina wa le Nwalungu.

¹⁰ Nwina mu ta panza a mbhingano wa nwina wa le Mutsuwuka-gambo, mu sukela le Hazar-Enane kala le Xefame;

¹¹ zonake a mbhingano wu ta sukela le Xefame wu relela le Ribla, hi le Mutsuwuka-gambo wa Aina; ni mbhingano wu ta relela wu komama le Bimbini ga Kinereta, hi le Mutsuwuka-gambo;

¹² zonake a mbhingano wu ta relela le Jordani, kala wu chikela le Bimbini ga Munyu. Legi gi tava tiko ga nwina ni mimbhingano ya gona ka matlhelo wontihe.

¹³ Zinghaho Mosi i lo leletela a vanana va ka Israeli, aku: Legi hi gona tiko legi mu ta nga avelana ha gona hi ku hlahluva, legi Jehova a leleteleko ku gi nyika ka ntlhanu wa tinyangwa ni mune ni khihlanya.

¹⁴ Hakuva a nyangwa ya vanana va ka Rubeni, hi tinyimba ta vararu vabye, ni nyangwa ya vanana va ka Gadi, hi tinyimba ta vararu vabye, ni khihlanya ga nyangwa ya vanana va ka Manase, va sina Va tekile a tshomba yabye.

¹⁵ Leti tinyangwa ta timbiri, ni khihlanya ga nyangwa ya ka Manase, va sina va tekile a tshomba yabye le tlhatukweni wa Jordani kusuhani ni le Jeriko, hi le Mutsuwuka-gambo.

¹⁶ Jehova i lo wulawula ka Mosi, aku:

¹⁷ A mavito ya madota lawa ma ta nga avela a tiko hi lawa: Mupristi Eliazare, na Joxua a nʼwana wa Nuni;

¹⁸ mu ta teka a hosana yinwe ka nyangwa yinwe ni yinwani kasi va avela a tiko.

¹⁹ A mavito ya vanhu va kona hi lawa: Lomu ka nyangwa ya ka Juda: hi Kalebi a nʼwana wa Jefuna;

²⁰ lomu ka nyangwa ya vanana va ka Simeoni: hi Xemueli a nʼwana wa Amihudi;

²¹ lomu ka nyangwa ya vanana va ka Benjamini: hi Elidade a nʼwana wa Kisloni;

²² lomu ka nyangwa ya vanana va ka Dani: hi hosana Buki a nʼwana wa Jogli;

²³ lomu ka nyangwa ya vanana va ka Josefa, lomu ka vana va Manase hi hosana Hanieli a nʼwana wa Efode;

²⁴ lomu ka nyangwa ya vanana va ka Efraime: hi hosana Kemueli a nʼwana wa Xiftani;

²⁵ lomu ka nyangwa ya vanana va ka Zebuloni: hi hosana Elizafane a nʼwana wa Pernake;

²⁶ lomu ka nyangwa ya vanana va ka Isakari: hi hosana Paltieli a nʼwana wa Azana.

²⁷ Lomu ka nyangwa ya vanana va ka Axeri: hi hosana Ahihudi a nʼwana wa Kelomi;

²⁸ lomu ka nyangwa ya vanana va ka Naftali: hi hosana Pedaheli a nʼwana wa Amihudi.

²⁹ Lava hi lava Jehova a va leleteleko ku avela a tiko ga Kanani ka vanana va ka Israeli.