Mitsengo 29 - Tshwa Bible

¹ Hi hweti ya wuntlhanu ni timbiri ka siku go ranga ga hweti, mu tava ni mutlhangano wu basileko; mu nga tiri ntiro wo binza ha gona. Gi tava siku ga kuba mipunzu ya nwina. Levi 23:24

² Mu ta nyikela a munyikelo wa kuhiswa wa masema yo nanziha ka Jehova; mu ta nyikela a nkuzi, ni hamba, ni 7 wa tihambana ta lembe ginwe a wukale, ti nga hiko na bawa;

³ ni munyikelo wa mapa ma nanaselweko ma vuvilweko hi mafura; ni xipanze xa wukhume xi wuyetilweko kanharu ka nkuzi, ni zipanze zimbiri za wukhume zo longoloka ni hamba.

⁴ Ni xipanze xa wukhume xa efa ka hambana yinwe ni yinwani.

⁵ Mu ta nyikela ni mhongo ya muphahlelo wa kuonha, mu ti mahela a nzhiho ha yona.

⁶ Mu ta yi nyikela zinwe ni munyikelo wa kuhiswa wa hweti, zinwe ni munyikelo wa kona wa kuga ni kunwa, kota nayo wa kona; lowu muphahlelo wa kuhiswa wa masema yo nanziha ka Jehova.

⁷ Hi siku ga wukhume ga hweti leyi ya wuntlhanu ni timbiri, mu tava ni mutlhangano wu basileko, mu ti koramisa lomu mihefemulweni ya nwina; mu nga tiri hambu ni ntiro munwe.

⁸ Mu ta nyikela ka Jehova a munyikelo wa kuhiswa a kuva masema yo nanziha, mu nyikela a nkuzi ni hamba ni 7 wa tihambana ta lembe ginwe a wukale; mu teka leti ti nga hiko na bawa.

⁹ A munyikelo wa kona wa zakuga wu tava mapa ma nanaselweko ma vuvilweko hi mafura; ni xipanze xa wukhume xi wuyetilweko kanharu, a kuva xi longoloka ni nkuzi;

¹⁰ ni xipanze xa wukhume xa efa ka hambana yinwe ni yinwani ka leti ta ntlhanu ni timbiri;

¹¹ Mu ta nyikela ni mhongo ya muphahlelo wa kuonha, zinwe ni muphahlelo wa nzhiho, ni munyikelo wa kuhiswa wa masiku ni masiku, ni munyikelo wa zakuga, zinwe ni munyikelo wa zakuga ni zakunwa.

¹² Hi siku ga 15 ga hweti ya 7 mu tava ni mutlhangano wu basileko; mu nga tiri ntiro wo binza ha gona, kanilezi lomu ka 7 wa masiku mu ta mahela Jehova mubuzo. Levi 23:34

¹³ Mu ta nyikela a munyikelo wa kuhiswa a kuva masema yo nanziha ka Jehova; mu ta nyikela hi 13 wa tinkuzi, ni tihamba timbiri, ni 14 wa tihambana ta lembe ginwe a wukale, leti ti nga hiko na bawa.

¹⁴ A munyikelo wa zakuga wu tava a mapa ma nanaselweko ma vuvilweko hi mafura, ni xipanze xa wukhume xi wuyetilweko kanharu ka nkuzi yinwe ni yinwani ka leti ta 13; ni xipanze xa wukhume xi wuyetilweko kambiri ka hamba yinwe ni yinwani ka tihamba leti ta timbiri.

¹⁵ Ni xipanze xa wukhume xa yivana yinwe ni yinwani ka 14 wa tiyivana.

¹⁶ Mu ta nyikela hi mhongo yinwe kasi yi maha muphahlelo wa kuonha zinwe ni munyikelo wa kuhiswa wa siku ni siku, zinwe ni munyikelo wa zakuga ni zakunwa.

¹⁷ Anzhako ka lezo hi siku ga wumbiri mu ta nyikela a 12 wa tinkuzi, ni tihamba timbiri, ni 14 wa tihambana ta lembe ginwe a wukale, ti nga hiko na bawa.

¹⁸ Mu ta nyikela ni munyikelo wa zakuga ni zakunwa, ku kheta hi mitsengo ya tinkuzi ni tihamba ni tihambana kotisa a nayo wa kona,

¹⁹ zinwe ni mhongo ya muphahlelo wa kuonha, zinwe ni munyikelo wa kuhiswa wa siku ni siku, ni munyikelo wa zakuga ni zakunwa wu longolokako nawo.

²⁰ Hi siku ga wunharu, i 11 wa tinkuzi, ni tihamba timbiri, ni 14 wa tihambana ta lembe ginwe a wukale, ti nga hiko na bawa,

²¹ ni munyikelo wa zakuga ni zakunwa, a ku kheta hi tinkuzi, ni tihamba, ni tihambana, khwatsi hi mitsengo ya tona kukotisa a nayo wa kona.

²² Zinwe ni mhongo ya muphahlelo wa kuonha, ni munyikelo wa kuhiswa wa siku ni siku, ni munyikelo wa kona wa zakuga ni zakunwa.

²³ Hi siku ga wumune, i 10 wa tinkuzi, ni tihamba timbiri, ni 14 wa tihambana ta lembe ginwe a wukale, ti nga hiko na bawa;

²⁴ ni munyikelo wa zakuga ni zakunwa, ku kheta hi tsengo wa tinkuzi ni tihamba ni tihambana kotisa a nayo wa kona;

²⁵ zinwe ni mhongo ya muphahlelo wa kuonha, ni muphahlelo wa kuhiswa wa siku ni siku, ni munyikelo wa kona wa zakuga ni zakunwa.

²⁶ Hi siku ga wuntlhanu, i 9 wa tinkuzi, ni tihamba timbiri, ni 14 wa tihambana ta lembe ginwe a wukale, ti nga hiko na bawa;

²⁷ ni munyikelo wa zakuga ni zakunwa, ku kheta hi tsengo wa tinkuzi ni tihamba ni tihambana, kotisa a nayo wa kona;

²⁸ zinwe ni mhongo ya muphahlelo wa kuonha, ni muphahlelo wa kuhiswa wa siku ni siku, ni munyikelo wa kona wa zakuga ni zakunwa.

²⁹ Hi siku ga wuntlhanu ni ginwe, i 8 wa tinkhuzi, ni tihamba timbiri, ni 14 wa tihambana ta lembe ginwe a wukale, ti nga hiko na bawa;

³⁰ ni munyikelo wa zakuga ni wa zakunwa, ku kheta hi tsengo wa tinkuzi, ni tihamba ni tihambana, kotisa a nayo wa kona;

³¹ zinwe ni mhongo ya muphahlelo wa kuonha, ni munyikelo wa kuhiswa wa siku ni siku, ni munyikelo wa kona wa zakuga ni wa zakunwa.

³² Hi siku ga wuntlhanu ni mambiri, i 7 wa tinkuzi, ni tihamba timbiri, ni 14 wa tihambana ta lembe ginwe a wukale, ti nga hiko na bawa;

³³ ni munyikelo wa zakuga ni zakunwa, ku kheta hi tsengo wa tinkuzi ni tihamba ni tihambana kukotisa a nayo wa kona;

³⁴ zinwe ni mhongo ya muphahlelo wa kuonha, ni munyikelo wa kuhiswa wa siku ni siku, ni munyikelo wa kona wa zakuga ni zakunwa.

³⁵ Hi siku ga wuntlhanu ni manharu mu ta maha tlhangano wa ku basa; mu nga tiri ntiro wo binza ha gona;

³⁶ kanilezi mu ta nyikela a munyikelo wa kuhiswa wu nga ni masema yo nanziha ka Jehova, mu nyikela hi nkuzi, ni hamba, ni 7 wa tihambana ta lembe ginwe a wukale, ti nga hiko na bawa,

³⁷ zinwe ni munyikelo wa zakuga ni zakunwa, ku kheta hi tsengo wa tona; a nkuzi, ni hamba, ni tihambana, kukotisa a nayo wa kona;

³⁸ zinwe ni mhongo ya muphahlelo wa kuonha, ni munyikelo wa kuhiswa wa siku ni siku, ni munyikelo wa kona wa zakuga ni zakunwa.

³⁹ Lezi hi lezi mu ta nga nyikela ka Jehova lomu ka mibuzo ya nwina, zinwe ni miphahlelo ya zifungo za nwina, ni minyikelo ya kuranza ka nwina, ya kuhiswa, ni ya zakuga, ni ya zakunwa, ni ya kubonga.

⁴⁰ Mosi i lo hlawutela a vanana va ka Israeli kota lezi Jehova a mu leleteleko.