Mitsengo 20 - Tshwa Bible

Mosi na Aroni va kanyisa Nungungulu.

¹ Wontihe hlengeletano wa vanana va ka Israeli wu lo chikela xiwuleni xa Zini hi hweti yo ranga, zonake a vanhu va lo gova le Kadexe. Miriamu i lofa ka lego wutshamu, a lahliwa laho.

² Laho ku wa nga hi na mati ya kuva vanhu vanwa; hikwalaho va lo tsombana va vukela Mosi na Aroni.

³ A vanhu va lo zangarela Mosi, vaku: Ku wa hi chukwana loku hi wa file ni vamakabye va hina lava va fileko mahlweni ka Jehova! Ekso. 16:2; 17:2

⁴ Xana mu nehele yini a hlengeletano wa Jehova lomu xiwuleni kasi hi ta fela kona, hina ni zifuyo za hina ke?

⁵ Mu hi humesele yini le Gipite mu hi neha ka tiko ga ku bihisa lezi, legi gi nga miliko ni mbewu, gi nga hiko ni makuwu, ne vinya, ne mapomegranada, ne ni mati ya kunwa ke?

⁶ Zonake Mosi na Aroni va lo suka laha ka hlengeletano vaya nyangweni ya tenda ga mutlhangano; va lo yawa lahasi hi tinghohe tabye; zonake a kungangamela ka Jehova ku lo woneka ka vona.

⁷ Jehova i lo byela Mosi, aku:

⁸ Teka nhonga, u vitana a hlengeletano; wena ni nakuloni Aroni mu ta wulawula ka ribye kuwoneni kabye; a ribye gi ta humesa a mati ya gona. Zonake wena u ta va nyika a mati ya lomu ka ribye; u nyika a hlengeletano wunwa zinwe ni zifuyo zabye.

⁹ Mosi i lo teka a nhonga mahlweni ka Jehova, khwatsi hi lezi Jehova a mu leleteleko.

¹⁰ Zonake Mosi na Aroni va lo vitana a hlengeletano mahlweni ka ribye, Mosi aku ngalo kabye: Zwanani makunu, nwina vahluwuki! Hina hi ta mu humesela mati ka legi ribye ke?

¹¹ Mosi i lo tlakusa a canja gakwe, aba a ribye zikhati zimbiri hi nhonga yakwe, zonake ku lo huma a mati yo tala. A hlengeletano wu lonwa zinwe ni zifuyo zabye.

¹² Jehova i te ngalo ka Mosi na Aroni: Kota lezi mu nga kholwangiko ka mina, mu nzi basisa mahlweni ka vanana va ka Israeli, cima mu nga ta chiketa lowu hlengeletano ka tiko legi nzi va nyikileko; gona.

¹³ Lawa hi mati ya Meriba, laha a vanana va ka Israeli va nga kanetisana na Jehova, a wonisa kubasa kakwe ha wona.

A va ka Israeli vaya le Hora.

¹⁴ Laha va nga hi Kadexe, Mosi i lo ruma mitsumi ka hosi ya ka Edomi, aku: Makwenu Israeli i ngalo: Wena wa tiva a zikarato zontlhe lezi hi humelweko ha zona.

¹⁵ A vararu va hina va wa luvela le Gipite, na hina hi tshamile a malembe ya kutala le Gipite; kanilezi a vaGipite va lo hi xanisa, hina ni vararu va hina.

¹⁶ Hi lo rila ka Jehova, zonake i lozwa magezu ya hina, a rumela a ngelosi yakwe, yi ta hi humesa le Gipite. Makunu hi kona lomu Kadexe, ka muti lowu wu nga laha mbhinganweni wa tiko ga wena. Ekso. 14:19; 23:20

¹⁷ Hikwalaho hi vumele hi tsemakanya a tiko ga wena; cima hi nga ta tsemakanya hi lomu masinwini ni lomu ka zivina; cima hi nga tanwa a mati ya tihlowo; hina hi ta famba hi magonzo, cima hi nga ta hambuka a tlhelo ga xinene hambu ni ga xibhabha, kala hina hi tsemakanya a tiko ga wena.

¹⁸ Edomi i te ngalo kakwe: Cima u nga ta hunza hi lomu ka hina; loku u maha lezo nzi ta huma nzi ku tlhangaveta hi supado.

¹⁹ A vanana va ka Israeli va te ngalo kakwe: Hina hi ta famba hi magonzo; loku hina ni mitlhambi ya hina hinwa mati ya wena, hi ta rihela; ahandle ka lezo u nga kanakani, hi nga ta maha nchumu; hi ta hunza hi mikonzo ya hina basi.

²⁰ Kanilezi Edomi i te ngalo: Cima u nga ta hunza! Zonake Edomi i lo huma ku ta tlhangana na yena, na hi ni vanhu vo tala va hlomileko.

²¹ Zinghaho Edomi i lo alela Israeli ku tsemakanya a tiko gakwe; zonake Israeli i lo potsoloka.

²² Wontihe a hlengeletano wa vanana va ka Israeli wu lo andlamuka le Kadexe, va loya xitsungeni xa Hora.

²³ Jehova i lo wulawula ka Mosi na Aroni le xitsungeni xa Hora, a mbhinganweni wa tiko ga Edomi, aku:

²⁴ Aroni i ta amukelwa ka va ka kabye, hakuva a nga ta enghena ka tiko legi nzi nyikileko a vanana va ka Israeli; hakuva mu kanetile a gezu ga mina le matini ya le Meriba.

²⁵ U ta teka Aroni ni nʼwana wakwe Eliazare, u kanziha uta navo xitsungeni xa Hora.

²⁶ Zonake u ta teka a tinguwo ta Aroni u ambexa nʼwana wakwe Eliazare. Aroni i ta fela laho, a amukelwa ka va ka kabye.

²⁷ Mosi i lo maha khwatsi hi lezi Jehova a mu leleteleko. Va lo kanziha xitsungeni xa Hore kuwoneni ka hlengeletano wontihe.

²⁸ Mosi i lo teka tinguwo ta Aroni a ambexa a nʼwana wakwe Eliazare. Zonake Aroni i lo fela laho hehla ka xitsunga, kanilezi Mosi na Eliazare va lo relela lahasi ka xitsunga.

²⁹ Laha a hlengeletano wontihe wu nga wonile lezaku Aroni i file, wu lo rilela Aroni 30 wa masiku.