Mitiro 5 - Tshwa Bible

Ananiasi na Safira.

¹ Kanilezi a munhu wo kari loyi a vitwako Ananiasi, ni sati wakwe Safira, i lo xavisa a simu,

² a pambula a xipanze xa mali a khweketa, i wa zi tiva ni sati wakwe; a neha xipanze xo kari a xi veka mikonzweni ya vapostoli. 1 Tim. 6:10

³ Kanilezi Pedro aku ngalo: Ananiasi, hikuyini Satani a tatisileko a mbilu ya wena, lezaku u hemba wunwa ka Moya wa ku Basa, ni ku khweketa a xipanze xa mali ya simu ke? Mitse. 30:2; Deut. 23:21; Lu. 22:3; Joh. 8:44

⁴ A simu na gi nga se ku xavisiwa, gi wa nga hi ga wena ke? Anzhako na gi xabyisilwe a mali yi wa nga hi ya wena ke? Hikuyini u alakanyileko ku maha xilo xa kunghahi? A ku hembangi ka vanhu, kanilezi ka Nungungulu.

⁵ Laha Ananiasi na a zwile magezu lawa i lowa hasi afa; vontlhe lava va nga zizwa va lo chava nguvu.

⁶ Ni majaha ma lo suka ma mu petsela, ma mu humesa lahandle a ku ya mu lahla. Joh. 19:40

⁷ Loku ku hunzile tihora tinharu a sati wakwe i lo enghena, na a nga zi tivi lezi zi mahekileko.

⁸ Pedro aku ngalo kakwe: Mu xavisile a simu hi mali leyi ke? Yena aku ngalo: Ina, hi yona leyi.

⁹ Pedro aku ngalo kakwe: Hikuyini mu vumeleneko a ku ringa a Moya wa Hosi ke? Wangabye, a mikonzo ya lava va lahlileko a nuna wa wena yi laha nyangweni, na wena va ta ku rwala lahandle. Deut. 6:16; Mat. 4:7; Lu. 4:12; 1 Kor. 10:9

¹⁰ Khalakale i lowa mikonzweni yakwe, afa. A majaha ma lo enghena ma ta mu kuma na a file; ma lo mu humesa lahandle, ma ya mu lahla nkele munwe ni nuna wakwe.

¹¹ A kuchava ka hombe ku lota hehla ka handla gontlhe, ni hehla ka vontlhe lava va nga zizwa lezi zilo.

A ziwoniso ni zirewukiso zo tala.

¹² Ku lo mahiwa a ziwoniso ni zirewukiso zinyingi xikari ka vanhu hi mandla ya vapostoli. A makholwa wontihe ma lo tsombana le ligumbagumbeni la Solomoni, na va hi va mbilu yinwe. Mar. 16:15-20; Xip. 14:3; Rom. 15:8; Maheb. 2:4

¹³ Xikari ka vanwani ku wa nga hi kona ni munhu a nga tiya ku ti tlhanganyisa na vona; kanilezi a vanhu va lo va dzunza nguvu. Joh. 9:22; 12:42; 19:38; Xip. 2:47

¹⁴ Lava va nga kholwa ka Hosi va lo engetelwa nguvu, a wunyingi ga vavanuna ni vavasati;

¹⁵ laha ka kuva va humesela a vababyako va va yisa maphangweni, va ya va etlelisa masangweni ni zitandeni, lezaku loku Pedro a hunza, a nzhuti wakwe wu fela ku sirela munwani wa vona. Mat. 9:21; 14:36

¹⁶ Kambe a vaaki va le mitini leyi yi renzelekeleko Jerusalema va lota na va neha a vababyi, ni lava va nga karatwa hi mimoya ya kubiha; va ta hanyiswa vontlhelele. Mar. 16:17

Vapostoli va khomiwa, va tlhatlhiwa hi ngelosi.

¹⁷ Kanilezi a zilo lezi zi lo vuxa a mupristi wa hombe, ni vontlhe va nga hi zinwe naye, va nga hi vaSadusi, va tatiswa hi mona, Xip. 4:1, 2

¹⁸ va khoma a vapostoli, va va khotsela paxweni. Lu. 21:12

¹⁹ Kanilezi a ngelosi ya Hosi yi lo vulula a tivati ta paxo ni wusiku, yi va humesa, yiku: Tis. 34:7; Xip. 12:7; 16:26; Maheli. 1:14

²⁰ Fambani, mu ya yima tempeleni, mu byela vanhu a timhaka tontlhe ta Wutomi legi. Joh. 6:68; 17:3; 1 Joh. 10:11

²¹ Laha va nga zi zwile, va lo enghena tempeleni ni mixo, va gonzisa kona. Kanilezi a mupristi wa hombe, ni lava va nga hi naye, va lota va ta tsombanyisa a hubye ni masingalakati wontihe ya vana va ka Israeli, zonake va lo rumela paxweni a ku ya teka vapostoli. Xip. 4:5, 6

²² Kanilezi laha a malanza ma nga chikela paxweni, a ma va kumangi; ma lo wuya, ma ta hlawutela,

²³ maku: A yindlu ya paxo hi yi kumile na yi valilwe khwatsi, a varinzeli na va yimile laha tinyangweni; kanilezi laha hi nga vulula a hi kumangi munhu lomo nzeni.

²⁴ Laha a mufumeli wa tempeli ni vapristi va hombe na va ti zwile leti timhaka, va lo kanganyiseka ha tona, lezaku zi ta gumesisa kuyini. Lu. 22:4; Xip. 4:1

²⁵ Zonake ku lota munwe a ta va byela, aku: A vavanuna lava mu nga va enghenisa paxweni, va yimile tempeleni va gonzisa vanhu.

²⁶ A nduna yi loya zinwe ni malanza a ku ya va neha; kanilezi va wa nga va susumetangi hi ntamu, hakuva va lo chava vanhu, vaku va nga gandliwa hi maribye. Mat. 14:5; 21:26

²⁷ Loku va wuyile navo, va lo va yimisa mahlweni ka hubye. A mupristi wa hombe i lo va wutisa,

²⁸ aku: Hi lo mu layisisa nguvu lezaku mu nga gonzisi hi vito legi; hambu zi hi tano, mu tatisile Jerusalema hi kugonzisa ka nwina, mu xuva ku neha a nkhata wa loyi munhu hehla ka hina. Mat. 23:35; 27:25; Xip. 4:18; 2:23; 3:15

²⁹ Pedro ni vapostoli va lo hlamula vaku ngalo: Hi fanele ku ingisa Nungungulu ku hunza ku ingisa vanhu. Gal. 1:10

³⁰ A Nungungulu wa vakoko va hina i vuxile Jesu, loyi nwina mu nga mu daya mu mu hayeka sinyeni. Xip. 10:39; Gal. 3:13; 1 Ped. 2:24

³¹ Kanilezi Nungungulu i lo mu tlakusa hi canja gakwe ga xinene, a kuva Hosi ni Muhanyisi, kasi ku nyika kuhunzuluka ka Israeli, ni kutsetselelwa ka zionho. Xip. 2:33; Fil. 2:9; Isa. 9:6; Ezek. 34:24; Mat. 1:21; Efe. 1:7

³² Hina hi vakustumunyu va timhaka leti, zinghaho ni Moya wa ku Basa lowu Nungungulu a wu nyikileko ka vona lava va mu ingisako. Joh. 15:26

³³ Kanilezi vona laha na va zi zwile, va lo zangara, va kanakanela ku va daya.

³⁴ Kanilezi a muFarisi a vitwako Gamalieli, a mugonzisi wa nayo, a nga dzunziwa hi vanhu vontlhe, i lo suka a yima hubyeni, a laya lezaku a vapostoli a va nga humeswa xikhatanyana. Xip. 22:3

³⁵ Aku ngalo ka hubye: Nwina madota ya ka Israeli, ti woneleni hi ku kumbuka lava vanhu, lezi mu lavako ku va maha zona.

³⁶ Hakuva a kalanyana ku lo huma Teudasi, loyi a ngaku i munhu wa hombe; loye a 400 wa vavanuna va nga namarela kakwe; kanilezi i lo dawa, ni vontlhe va nga kholwa ka yena va lo hangalaka, va nga ha hi nchumu.

³⁷ Anzhako ka yena ku lo huma Judasi wa le Galilea a xikhatini xa xitsalela, a kucetela vanhu a kuva va hluwuka; yenawu i lofa, ni vontlhe lava va nga mu ingisa va lo hangalaka. Lu. 2:1; 13:1

³⁸ Makunu nzi ngalo ka nwina: Tsikani lava vanhu, mu va tlhatlha; hakuva loku legi khungo ni lowu ntiro wu hi wa vanhu, wu ta hangalaka; Tis. 127:1; Mav. 21:30; Isa. 8:10; Mat. 15:13

³⁹ kanilezi loku wu hi wa Nungungulu, mu nga ta zi kota ku va hlula; mu nga dzuka mu kumiwa mu kari muiwa na Nungungulu. Mat. 16:18; 1 Kor. 1:25; Fil. 1:28; Kuv. 17:14; Xip. 9:5

⁴⁰ Vona va lo mu ingisa. Laha na va vitanile a vapostoli, va lo vaba, va va laya lezaku va nga ha kaneti hi vito ga Jesu, va va tsika va famba. Mar. 13:9; Lu. 20:10

⁴¹ A vapostoli va lo suka hi laha hubyeni, na va tsaka hilezi va hlayelweko lava va faneleko a ku xaniseka hi kota ya vito ga Jesu. Mat. 5:12; Rom. 5:3; 2 Kor. 12:10; Fil. 1:29; Jak. 1:2

⁴² A va tsikangi a ku kanela wontihe masiku lomu tempeleni ni le kaya, va gonzisa hi Jesu lezaku hi Kristu.