Mitiro 3 - Tshwa Bible

A xilema xi hanyiswa.

¹ Pedro na Johani a va kari va kanziha vaya tempeleni hi xikhati xa kukhongela, xi nga hi 3 horas wa gambo:

² Ku wa rwelwe a munhu wo kari loyi a nga wa hi xilema hi le rumbyini ga nyine wakwe, loyi va nga mu veka a masiku ni masiku laha nyangweni yi vitwako Yo Saseka, kasi a kombela a zinyikiwo ka lava va nga enghena lomo tempeleni. Joh. 9:8

³ Laha a nga wona Pedro na Johani na va kari va enghena tempeleni, i lo kombela xinyikiwo ka vona.

⁴ Pedro i lo mu cuwukisisa, zinwe na Johani, aku: Hi cuwuke.

⁵ Yena i lo va cuwuka, na a tsumba ku amukela nchumu ka vona.

⁶ Kanilezi Pedro aku ngalo: A nzi na siliva ni nzalama; kanilezi lezi nzi nga nazo, nza ku nyika zona: Hi vito ga Jesu Kristu wa le Nazareta, suka U famba. 1 Ped. 4:10; Xip. 4:10

⁷ Zonake i lo mu khoma hi canja ga xinene, a mu yimisa; khalekhale a mikonzo yakwe ni mahlakala yakwe zi lo tiyiswa.

⁸ I lo tlula a yima, a sangula ku famba; zonake i lo enghena navo tempeleni, a tlula-tlula, a bonga Nungungulu. Isa. 35:6

⁹ Vanhu vontlhe va lo mu wona na a kari a famba, a bonga Nungungulu. Xip. 4:21

¹⁰ Laha va nga mu tiva lezaku hi yena a nga tshamela ku hiwa zinyikiwo laha nyangweni Yo Saseka ya tempeli, va lo hlamala ni ku riwuka hi kota ya lezi zi mahekileko kakwe.

¹¹ Kota lezi a nga wa ha khomelela ka Pedro na Johani, a vanhu vontlhe va lo tsutsumela kabye a ligumbagumbeni leli li vitwako la Solomoni na va hlamala nguvu. Joh. 10:23; Xip. 5:19

¹² Laha Pedro a nga zi wona, aku ngalo ka vanhu: Nwina madota ya ka Israeli, hi yini mu hlamalako hi munhu loyi ke? Hi yini mu cuwukisisako hina, ku khwatsi hi mu mahile a famba hi ntamu ni kululama ka hina? 2 Kor. 3:5

¹³ A Nungungulu wa Abrahama, ni wa Isaka, ni wa Jakobe, a Nungungulu wa vakoko va hina, i dumisile a Nanza gakwe Jesu; loyi nwina mu nga mu nyikela ka Pilatu, mu mu kaneta mahlweni kakwe, laha yena a nga lava ku mu tlhatlha. Xip. 5:30; Joh. 7:39; 12:16; 17:1; Fil. 2:9

¹⁴ Mu lo kaneta loyi wa Kubasa ni wa Kululama, mu kombela lezaku mu tlheliselwa a mudayi, Tis. 16:10; Mar. 1:24; Xip. 7:52

¹⁵ mu daya a Hosi ya wutomi; kanilezi Nungungulu i mu vuxile hi ka vafileko; hina hi vakustumunyu va lezo.

¹⁶ Hi kukholwa vitweni gakwe, gona vito gakwe gi mu nyikile ntamu loyi munhu, loyi mu mu wonako, mu mu tiva; ina, a kukholwa ka Jesu ku mu hanyisile mahlweni ka nwina nwentlhe. Mat. 9:22; 1 Ped. 1:21

¹⁷ Makunu vamakabye, nza zi tiva lezaku mu zi mahile hi kungativi, kota lezi va nga zi maha ni varangeli va nwina. Lu. 23:34; 1 Kor. 2:8

¹⁸ Kanilezi Nungungulu i zi tatisile lezo, lezi a nga zi tivisile kale hi milomu ya vaprofeti vontlhe, lezaku, Kristu wakwe i ta xaniseka. Tis. 22; Isa. 50:6; 53:5; Dan. 9:26; 1 Ped. 1:10

¹⁹ Hikwalaho ti soleni, mu hunzuluka, kasi a zionho za nwina zi fela ku vinyetelwa, kasi ku chikela a zikhati za kuhumutwa hi le ka Hosi;

²⁰ lezaku yi hi rumela Kristu loyi a yimiselweko nwina, a nga yena Jesu;

²¹ loyi a tilo gi faneleko ku mu amukela ku kala xikhatini xa kutlheliselwa ka zilo zontlhe, lexi Nungungulu a kanetako ha xona hi milomu ya vaprofeti vakwe vo basa, lava va nga hi kona hi kata ka matiko. Xip. 1:11; Maheb. 8:1

²² Mosi i te ngalo: Hosi Nungungulu i ta mu vuxela a muprofeti xikari ka vamakabye va nwina, wo kotisa mina; mu ta mu ingisa ka zontlhe lezi a ta nga mu byela zona. Deut. 18:15; Maheb. 3:2-5

²³ Ni wihi munhu loyi a nga ingisiko a muprofeti loye, i ta lobyiswa aku bhi xikari ka tiko. Maheb. 2:2, 3; 10:29; 12:25

²⁴ Ina, ni vaprofeti vontlhe kusukela ka Samueli ni lava va mu tlhatamako, vontlhelele lava va nga wulawula va lo tivisa hi masiku lawa.

²⁵ Nwina mu vana va vaprofeti, ni va xivumelwano lexi Nungungulu a nga xi maha ni vakoko va nwina, laha a ngaku ngalo ka Abrahama: Hi ka pswalo wa wena a tixaka tontlhe ta misava ti ta katekiswa. Gen. 12:3; Rom. 9:4, 8; 15:8; Gal. 3:26

²⁶ Nungungulu i sangulile hi nwina, a mu humesela a Nanza gakwe Jesu, a mu rumela a ku ta mu katekisa, hi ku mu hunzulukisa nwentlhelele, mu tsika a zionho za nwina.