Mitiro 23 - Tshwa Bible

Paule a yima mahlweni ka hubye.

¹ Paule i lo cuwukisisa a hubye, aku ngalo: Nzi hanyile mahlweni ka Nungungulu na nzi hi ni livalo li nene kala siku ga nyamutlha. 1 Kor. 4:4; 2 Kor. 1:12; 2 Tim. 1:3

² Ananiasi a mupristi wa hombe, i lo laya lava va nga yimile kusuhani naye a ku mu phakata nomu. 1 Tih. 22:24; Joh. 18:22

³ Zonake Paule aku ngalo kakwe: Nungungulu i ta ku phakatawu, wena khurisi gi basisilweko hi mhemba; wena u tshamile laha a ku nzi lamula hi ka nayo, kanilezi u laya a kuva nzi biwa u hambunyeta nayo. Joh. 7:51

⁴ Lava va nga yimile kusuhani vaku ngalo: Xana u rukatela a mupristi wa hombe wa Nungungulu ke?

⁵ Paule aku ngalo: Vamakabye, nzi wa nga zi tivi lezaku mupristi wa hombe, hakuva ku tsalilwe ku ngalo: U nga rukateli a hosi ya tiko ga nwina. Ekso. 22:28; 2 Ped. 2:10; Juda 8

⁶ Kanilezi laha Paule a nga zi tivile lezaku vanwani mbaSadusi, ni vanwani vaFarisi, i lo vitana hubyeni, aku: Vamakabye, mina nzi muFarisi, nʼwana wa vaFarisi; nzi kecarilwe hi kota ya kutsumba ka mina kuvukeni ka vafileko. Fil. 3:5; Xip. 24:15; 26:5

⁷ Laha a nga wulile lezo, ku lo vuka a kukanetisana xikari ka vaFarisi ni vaSadusi, ni mutlhangano wu lo avanyeka.

⁸ Hakuva a vaSadusi ve ngalo a ku kona a kuvuka ka vafileko, hambu ni tingelosi, ge ni mimoya; kasi a vaFarisi va vumela zontlhe. Mat. 22:23; Mar. 12:18; Lu. 20:27

⁹ Ku lo vuka a woyonga ga hombe; a vatsali vanwani va ntlawa wa vaFarisi va yima va tiyisa hi ntamu vaku: A hi kumi kubiha ka munhu loyi; kutani a moya wu wulile kakwe, hambu a ngelosi. Xip. 5:39; 22:17, 18

¹⁰ Makunu laha a kukanetisana ku nga enzeleka, a nduna ya hombe yi lo chava lezaku va nga hanzula Paule, yi ruma masochwa a ku relela ma ya mu wutla xikari kabye, ma mu yisa xikanekisweni.

¹¹ Hi wusiku ga kona a Hosi yi lo tshinela kakwe, yiku ngalo: Tiya hlana; hakuva kota lezi u nga kustumunya ha mina laha Jerusalema, zinghaho u ta nzi kustumunyela ni le Roma. Tis. 46:1; Xip. 18:9; 27:23, 24

A khungo go daya Paule.

¹² Laha gi nga wa cile, a vaJuda vanwani va lo tsema khungo, va hlambanya vaku va nga taga ni kunwa va kala va mu daya Paule. Xip. 21:30; 25:3

¹³ Va wa hi 40 wa vavanuna va hlamusa lava va nga maha legi khungo.

¹⁴ Va loya ka vapristi va hombe ni ka masingalakati, va yaku ngalo: Hi hlambanyile hi xifungo xo tshisa hiku hi nga taga nchumu hi kala hi mu daya Paule.

¹⁵ Makunu nwina ni hubye, kombelani a nduna ya hombe lezaku yi mu relelisa ka nwina, a ku khwatsi ma ha lava ku hlolisisa khwatsanyana a mhaka yakwe; hina hi tava hi longile ku mu daya na a nga se ku chikela ka nwina.

¹⁶ Kanilezi a zukulu wa Paule i lozwa hi ku mu xiyelela kabye, aya enghena xikanekisweni a ya byela Paule.

¹⁷ Paule i lo vitana yinwe ya tinduna ta mazana, aku ngalo: Heleketa jaha legi ka nduna ya hombe, hakuva gi na ni mhaka ku yi bikela.

¹⁸ Yona yi lo mu teka yi mu yisa ka nduna ya hombe, yi yaku: Paule loyi a nga peresu i nzi vitanile, a nzi kombela a ku tisa jaha legi ka wena, gi nga ni mhaka ku ku bikela.

¹⁹ A nduna ya hombe yi lo mu khoma hi canja, yiya naye tlhelweni, yi ya mu wutisa, yiku: I mhaka muni u lavako ku nzi byela yona ke?

²⁰ Yena aku ngalo: A vaJuda va vumelene vaku va ta ku kombela a ku yisa Paule le hubyeni manziko, a ku khwatsi va ha lava ku hlolisisa a mhaka yakwe.

²¹ Kanilezi u nga va vumeli; hakuva va mu xiyelele a 40 wa vavanuna va hlamusa, lava va hlambanyileko hi xifungo xaku va nga taga ge ni kunwa kala va mu daya Paule; va longile makunu, na va cuwukela a kutsumbisa ka wena ntsena.

²² Lezo a nduna ya hombe yi lo fambisa a jaha, yi gi laya yiku: U nga byeli munhu lezaku u nzi byelile timhaka leti.

²³ Zonake yi lo vitana a tinduna timbiri ta mazana, yiku ngalo: Longisani 200 wa masochwa a kuya Kesaria hi hora ya wu 9 ya wusiku, zinwe ni 70 wa vamahaxi, ni 200 wa vamatlhari;

²⁴ mu mu longisela zifuyo, mu khilelisa Paule ka zona, lezaku a chikela khwatsi ka hosi Felisi.

²⁵ Yi lo tsala papilo legi gi nge ngalo:

²⁶ Klaudiu Lisia ka Felisi, hosi yi dzunzekileko, nza ku losa, Xewe!

²⁷ A munhu loyi i wa khomilwe hi vaJuda; laha va nga kari va mu daya, nzi lota ni masochwa nzi ta mu ponisa, na nzi tivile lezaku muRoma. Xip. 21:33; 24:7

²⁸ Kota lezi nzi nga ranza ku tiva a mhaka leyi va nga mu kecara ha yona, nzi lo mu yisa hubyeni yabye; Xip. 22:30

²⁹ nzi ya kuma lezaku i kecariwa hi timhaka ta nayo wabye, kanilezi na ku nga hi na nanzu wu faneleko kufa, hambu makhotso.

³⁰ Laha nzi nga byeliwa lezaku va tsemile khungo go mu daya, nzi lo Hatla nzi mu rumela ka wena, na nzi laya a vakecari vakwe a ku ya mu ranisa mahlweni ka wena.

³¹ Zinghaho a masochwa ma lo famba na Paule kota lezi ma nga layilwe, ma mu yisa Antipatri ni wusiku.

³² Kanilezi hi manziko wa kona va lo mu siya ni lava va mahaxi va famba zinwe naye, vona va tlhelela xikanekisweni.

³³ Laha vona va nga chikele le Kesaria, va lo nyika hosi a papilo, va yimisa na Paule mahlweni ka yona.

³⁴ Laha a hosi yi nga wa gi gonzile, yi lo wutisa aku Paule ngwa gihi tiko; na yi zi tivile lezaku ngwa Kilikia, yiku: Xip. 21:39

³⁵ Nzi ta kuzwa khwatsi loku va chikele a varanisi va wena; yi laya lezaku a gongiwe xiluvelweni xa Herodi. Mat. 27:27; Xip. 24:1, 10