Mitiro 18 - Tshwa Bible

Paule le Korinte.

¹ Anzhako ka lezo Paule i lo suka le Atensi, aya Korinte.

² A ya kuma a muJuda a vitwako Akwila, a munhu wa le Pontu hi kupswalwa, na a ha kuta hi le Italia, zinwe ni sati wakwe Prisila, hakuva Klaudiu i wa layile lezaku a vaJuda vontlhe va suka le Roma. Paule i loya kabye, Rom. 10:3; 1 Kor. 16:19; 2 Tim. 4:19

³ kota lezi a nga hi wa ntiro munwe navo, i lo tshama na vona, va tira zinwe; hakuva a ntiro wabye ku wa hi ku maha matenda. Xip. 20:34; 1 Kor. 4:12

⁴ I lo gonzisa sinagogeni a masabado wontihe, a kholwisa a vaJuda ni vaGreki.

⁵ Laha Silasi na Timote va nga chikele vata hi le Makedonia, Paule i wa ti nyikela ku kanela mhaka, a kustumunya ka vaJuda lezaku Jesu hi Kristu. Xip. 17:14; Joba 32:18

⁶ Kanilezi laha va nga kaneta, va rukatela, i lo zuza a tinguwo takwe, aku ngalo kabye: A nkhata wa nwina a wuve hehla ka tihloko ta nwina venyi; mina nzi basile, a kusukela lezi nzi taya ka vamatiko. Xip. 13:45; 28:28; Ezek. 33:9; 1 Ped. 1:4

⁷ I lo suka, a ya enghena ndlwini ya wokari a tibyako Titusi Justusi, a munhu a chavako Nungungulu, loyi a yindlu yakwe yi nga gamekene ni sinagoga.

⁸ Krispusi a nga hi murangeli wa sinagoga i lo kholwa ka Hosi, zinwe ni yindlu yakwe yontlhe; ni vanyingi va le Korinte lava va ngazwa Paule va lo kholwa, va bapatizwa: 1 Kor. 1:14

⁹ A Hosi yiku ngalo ka Paule hi muwoniso ni wusiku: U nga chavi, kanilezi wulawula, u nga miyeli. Xip. 23:11; Isa. 58:21

¹⁰ Hakuva mina nzi ha wena, a ku na munhu a ta nga ku vukela a ku ku lamata; hakuva nzi na ni vanhu vanyingi mutini lowu. Isa. 41:10; Jer. 1:18; Mat. 28:20

¹¹ Yena i lo tshama laho a lembe ginwe ni ntlhanu wa tihweti ni yinwe, na a gonzisa a mhaka ya Nungungulu xikari kabye.

¹² Kanilezi laha Galio a nga wa hi mufumeli wa le Akaya, a vaJuda va lo vukela Paule hi mbilu yinwe, va mu yisa mahlweni ka hubye,

¹³ vaku: Loyi munhu i vumelisa vanhu ku khozela Nungungulu hi ku hambunyeta nayo.

¹⁴ Kanilezi laha Paule a nga lava ku vulula a nomu wakwe, Galio aku ngalo ka vaJuda: Nwina vaJuda, hakunene loku ku wa hi mhaka ya kugoha, kutani ntiro wa kubiha, nzi wa ta fanela ku mu ingisela; Xip. 23:29; 25:11, 19

¹⁵ kanilezi loku ku hi kukanetisana hi timhaka ni mavito ni nayo wa nwina, zi cuwukeni nwina ha nwece; a nzi lavi ku maha mulamuli wa mahungu lawa.

¹⁶ I lo va hlongola hubyeni.

¹⁷ Zonake a vanhu vontlhe va lo khoma Sostenisi, a murangeli wa sinagoga, va muba mahlweni ka hubye; kanilezi Galio a nga khatalangi nchumu hi lezi zilo. 1 Kor. 1:1

Paule a tlhelela Antiokia.

¹⁸ Paule na a tshamile kona a masiku yo tala, i lo onekana ni vamakabye, a famba hi taru aya Siria, zinwe na Prisila na Akwila; na a cingile hloko le Kenkrea, hakuva i wa ti bohile hi kuhlambanya. Mitse. 6:18; Xip. 21:24; Rom. 16:1

¹⁹ Vona va lo chikela Efesusi, a va siya laho; yena a enghena sinagogeni a wulawula ni vaJuda.

²⁰ Laha va nga mu kombela ku tshama navo a xikhati xo kari, a nga vumelangi;

²¹ kanilezi na a onekana navo, aku: Nzi ta tlhela nzi wuya ka nwina, loku Nungungulu a zi ranza. Zonake i lo suka le Efesusi hi taru. Xip. 19:21; 20:16; Jak. 4:15

²² Laha a nga wa chikele le Kesaria, i lo kanziha aya Jerusalema a ya losetela bandla, zonake i lo relela aya Antiokia.

²³ Na a tshamile laho a xikhati xo kari, i lo suka a ya tsemakanya tikweni ga le Galatia, ni le Frigia, na a tiyisa vapizani vontlhe. Gal. 1:2; 4:14; Xip. 14:22; 15:32

Apolosi a chikela le Efesusi.

²⁴ Ku lota le Efesusi a muJuda, a vito gakwe hi Apolosi, loyi a belekelweko le Alekzandria, a munhu a gonzileko, loyi a tlharihileko hi tlhelo ga Mitsalo. 1 Kor. 1:12; 3:5, 6

²⁵ I wa gonzisilwe hi ndlela ya Hosi; ni kota lezi a nga vura moyeni i lo wulawula ni ku gonzisa ziku dlunya hi timhaka ta Jesu, hambu lezi a nga tiva a kubapatiza ka Johani ntsena. Rom. 12:11; Xip. 19:3

²⁶ I lo sangula ku kanela hi kutiya sinagogeni. Kanilezi laha Prisila na Akwila va nga mu zwile, va lo mu yisa kaya kabye, va ya mu tlhamusela khwatsi a ndlela ya Nungungulu.

²⁷ Ni laha a nga xuva ku hunza aya Akaya, a vamakabye va lo mu tiyisa hlana, va tsalela a vapizani va seyo, va va khongotela ku mu amukela. Laha a nga chikele kabye i lo va vuna nguvu lava va kholilweko hi tipswalo ta Nungungulu; 1 Kor. 3:6

²⁸ hakuva i lo kanetisana ni vaJuda hi ntamu, a va kona mahlweni ka vanhu, a kombisa hi Mitsalo lezaku Jesu hi Kristu. Xip. 9:22; 17:3