Mitiro 16 - Tshwa Bible

Paule na Silasi va kuma Timote.

¹ Zonake i lo chikela le Derbe ni le Listra. Laho ku wa hi kona a mupizani wo kari, a vitwako Timote, loyi a nyine wakwe a nga hi muJuda a kholilweko, kanilezi a raru wakwe i wa hi muGreki. Xip. 14:6; Rom. 16:21; Fil. 2:19

² Yena i wa khesiwa hi vamakabye lavo va nga wa hi le Listra ni le Ikoniume. Xip. 6:3

³ Paule i wa xuva a kuva a famba naye; i lo mu teka a mu enghenisa wukwera, hi kota ya vaJuda lava va nga hi le matlhelweni lawo; hakuva vontlhe va wa zi tiva lezaku a raru wakwe muGreki. 1 Kor. 9:20; Gal. 2:3

⁴ Kota lezi va nga ha famba va tsemakanya miti, va lo nyika vamakabye a zileletelo lezi zi nga wa yimisilwe hi vapostoli ni masingalakati ya le Jerusalema, lezaku va zi gonga. Xip. 15:28, 29

⁵ Zinghaho a mabandla ma lo tiyiswa kukholweni, ni ziro za wona zi engetelana masiku ni masiku.

Vaya Makedonia.

⁶ Va lo famba va tsemakanya Frigia ni le Galatia, hakuva va wa tsimbetelwe hi Moya wa ku Basa a ku kanela mhaka le Asia.

⁷ Laha va nga chikele ku cuwukana ni le Misia, va lo ringa a kuya Bitunia; kanilezi a Moya wa Jesu a wu va vumelangi.

⁸ Na va hunzile Misia, va lo relela vaya Troasi. 2 Kor. 2:12; 2 Tim. 4:13

⁹ Ni wusiku ku lo woneka a muwoniso ka Paule, wa wanuna wa le Makedonia a nga yima a mu khongotela, aku: Tlhatuka, uta leno Makedonia, u ta hi vunetela. Mitse. 12:6; Xip. 10:30

¹⁰ Laha a nga wonile a muwoniso, khalekhale hi lo hlota ndlela ya kuya le Makedonia, na hi pimile lezaku Nungungulu i hi vitanile ku ya kanela ivangeli kabye. Tis. 119:60; 2 Kor. 2:13

¹¹ Na hi suka Troasi hi taru, hi lo lulameta hiya Samotrake, hi manziko wa kona hi chikela Neapoli.

¹² Ku sukela laho hi loya le Filipi, lowu wu nga muti wa hombe tikweni ga Makedonia, gi nga kolonia ga vaRoma; hi loxwa mutini lowo a masiku yo kari. Fil. 1:1

¹³ Hi siku ga sabado hi lo huma handle ka muti hiya congweni, laha ku nga hi kona a wutshamu ga kukhongela; hi lo tshama hasi, hi kanela ka vavasati lava va nga tsombene laho.

¹⁴ A wasati a nga hi Lidia a vito gakwe, a muxavisi wa ziwunguwungu, wa le mutini wa Tuatira, loyi a chavako Nungungulu, i lo hizwa; zonake a Hosi yi lo mu vulula mbilu lezaku a ingisa lezi zi nga kanelwa hi Paule. Lu. 24:45

¹⁵ Laha na a bapatizilwe zinwe ni va yindlu yakwe, i lo hi khongotela, aku: Loku muku nzi tsumbekile ka Hosi, ngonani ndlwini ya mina, mu ta tshama kona. I lo hi kurumeta. Gen. 19:3; Lu. 24:29

¹⁶ Ku te laha hi nga kari hi famba wutshanwini ga kukhongela, hi lo tlhangana ni nhwana wo kari wa khumbi, loyi a nga hi ni moya wa kuvumba, a nga bhinzulela nguvu a venyi vakwe hi kuvumba. 1 Sam. 28:7; Xip. 19:24

¹⁷ Yena i lo lanzela Paule na hina, a kanyuluka aku: A vavanuna lava malanza ya Nungungulu a nga Hehlahehla, lava va bako hungu ka nwina hi ndlela ya kuhanyiswa.

¹⁸ I lo maha lezo masiku manyingi; kanilezi Paule na a karatiwa ha zona, i lo hunzuluka, aku ngalo ka moya lowo: Nza ku laya hi vito ga Jesu Kristu a kuva u huma ka yena! Wu lo huma kakwe hi xwalexo xikhati. Mar. 1:25, 34; 16:17

¹⁹ Kanilezi laha a venyi vakwe va nga wona lezaku va nga ta ha bhinzula nchumu ha yena va lo khoma Paule na Silasi, va ya rorovisela le hubyeni mahlweni ka vafumeli.

²⁰ Laha va nga va yisile tinduneni, vaku ngalo: A vanhu lava, va nga vaJuda, va vuxa woyonga mutini wa hina, 1 Tih. 18:17; Xip. 17:6

²¹ va gonzisa mikhuwo leyi hina vaRoma hi nga faneliko ku yi amukela ni ku yi gonga.

²² A xidlemo xontlhe xi lo va vukela; a tinduna ti lo va runzuwulela a tinguwo tabye, ti laya lezaku a va biwe hi tinhonga. 2 Kor. 6:5; 1 Tes. 2:2

²³ Na va va bile a tirimbiri to tala, va lo va khotsela paxweni, va laya murinzeli wa gona ku va lavelela nguvu.

²⁴ Yena na a layisisilwe lezo, i lo va enghenisa paxweni ga lomo xikari, a va boha milenge yabye hi makhotso. Jer. 20:2

²⁵ Hi laha xikari ka wusiku, Paule na Silasi va wa kari va khongela, va yimbelela tisimu to dumisa Nungungulu, a tiperesu na ti va ingisela.

²⁶ Hi xitshuketi xa lezo ku wa hi kona a kutsekatseka ka hombe ka misava, laha ka kuva ku tsekatsekiswa ni ziseketelo za yindlu ya paxo, ni tinyangwa tontlhe ti vululeka, ni ziboho za tontlhe tiperesu zi tlhatlheka, Xip. 4:31; 5:19; 12:7, 10

²⁷ A murinzeli wa paxo na a khindlimukile, i lo wona a tinyangwa ta paxo na ti vululekile, a hlomula supado yakwe a lava ku ti daya, na a alakanya lezaku a tiperesu ti pfovole.

²⁸ Kanilezi Paule i lo vitana hi gezu ga hombe, aku: U nga ti lamati, hakuva hina hontlhe hi kona.

²⁹ I lo vitanisa tikandiya, a enghena hi kuhatlisa na a rurumela hi kuchava, i lowa lahasi mahlweni ka Paule na Silasi,

³⁰ a va humesa, aku: Tihosi, nzi fanele ku maha yini kasi nza hanyiswa ke? Lu. 3:10; Xip. 2:37

³¹ Vona vaku ngalo: Kholwa ka Hosi Jesu, zonake u ta hanyiswa, wena ni ngango wa wena. Isa. 45:22; Joh. 3:16

³² Va lo kanela a mhaka ya Hosi ka yena, ni ka vontlhe lava va nga wa hi lomo ndlwini yakwe.

³³ Zonake i lo va teka hi xikhati lexo xa wusiku, a va hlaza a tirimbiri tabye, zalezo a bapatizwa yena ni va yindlu yakwe yontlhe.

³⁴ Zonake i lo va yisa ndlwini yakwe, a ya va phamela zakuga, a tsaka nguvu zinwe ni vontlhe va yindlu yakwe, hilezi a nga kholilwe ka Nungungulu. 1 Sam. 2:1; Lu. 5:29; 19:6

³⁵ Loku gi cile, a tinduna ti lo ruma a vanyakasani, tiku: Va tlhatlheni vanhu lavo va famba.

³⁶ A murinzeli wa paxo i lo byela Paule leti timhaka, aku: A tinduna ti rumele a kuva mu tlhatlhiwa mu famba; hikwalaho humani makunu, mu famba hi kurula.

³⁷ Kanilezi Paule aku ngalo ka vona: Va hi bile kubaseni na hi nga lamuliwangi, hina vanhu hi nga vaRoma, va hi khotsela paxweni; makunu va lava ku hi humesa xihundleni ke? Kokwihi, kanilezi a vate vona wutsumbu, va ta hi humesa. Xip. 22:25

³⁸ A vanyakasani va lo ya bikela a tinduna leti timhaka; laha ti ngazwa lezaku mbaRoma ti lo chava;

³⁹ ti lota ti ta va khongotela; na ti va humesile, ti lo va kombela a kuva va suka mutini wabye. Mat. 8:34

⁴⁰ Vona va lo huma paxweni, vaya enghena ndlwini ya Lidia; ni laha va nga wonene ni vamakabye, va lo va tangalisa, va ti fambela.