Mitiro 14 - Tshwa Bible

Paule na Barnabasi va gonzisa le Ikoniume, ni Listra, ni Derbe.

¹ Le Ikoniume, Paule na Barnabasi va lo enghena zinwe sinagogeni ga vaJuda va kanela, laha ka kuva ku kholwa a xidlemo xa hombe xa vaJuda ni vaGreki.

² Kanilezi a vaJuda lava va nga kala ku kholwa va lo vindlukisa a vamatiko, lezaku a timbilu tabye ti zangarela a vamakabye.

³ Ahemba-lezoke a vapostoli va lo tshama kona a xikhati xa hombe, va kanela hi kutiya hi Hosi; leyi yi nga kustumunyela a mhaka ya yona ya tipswalo hi ziwoniso ni zirewukiso zi nga mahiwa hi vona. Mar. 16:20; Rom. 15:19; Maheb. 2:4

⁴ Kanilezi a vanhu va muti va lo hambana, a vanwani va yimela a vaJuda ni vanwani va yimela vapostoli.

⁵ Laha na ku mahilwe a gujeguje hi vamatiko ni vaJuda zinwe ni varangeli vabye, go va khoma hi kubiha ni ku va gandla hi maribye, 2 Tim. 3:11; 1 Tes. 2:14-16

⁶ va lo zi tiva, va chavela mitini ya le Likaonia, ni le Listra, ni Derbe, ni le tikweni ga kona;

⁷ va ya kanela ivangeli kona.

⁸ Le Listra ku wa hi kona a munhu loyi a nga lamele milenge hi le rumbyini ga nyine wakwe, yena cima a nga fambangi.

⁹ Yena i lozwa Paule na a kanela; Paule na a mu cuwukisisa, a wona lezaku i na ni kukholwa ka ku hanyiswa,

¹⁰ aku ngalo hi gezu ga hombe: Suka u yima hi milenge ya wena uku pswhe! I lo tlula a famba. Isa. 35:6

¹¹ Laha a zidlemo zi nga wona lezi zi mahilweko hi Paule, zi lo tlakusa gezu ga zona hi lirimi la xi Likaonia, ziku: A vanungungulu va relele ka hina na va hi ni madzumba ya vanhu. Xip. 8:10; 28:6

¹² Va lo chula Barnabasi vaku hi Jupiteri; Paule vaku hi Merkure, hakuva hi yena a nga hi muwulawuli wa kona.

¹³ Zonake a mupristi wa tempeli ya Jupiteri, leyi yi nga mahlweni ka muti, i lo neha tinkavi ni tisimbo ta zitsangi le tinyangweni, na a lava ku va tlhavela mhamba zinwe ni xidlemo.

¹⁴ Kanilezi laha vapostoli, Barnabasi na Paule, va nga wa zizwa, va lo hanzula tinguwo tabye, va tsutsumela xidlenwini, va kanyuluka,

¹⁵ vaku: Madota, Hiyini mu mahako lezi zilo? Hinawu hi vanhu va tshamela ginwe na nwina, hi mu nehela a ivangeli, lezaku kasi ma fela ku tsika lezi zi nga nyawuliko, muta ka Nungungulu loyi a hanyako, loyi a nga maha tilo ni misava ni bimbi, ni zontlhe lezi zi nga ka zona; Jak. 5:17; 1 Sam. 12:21; 1 Tes. 1:9

¹⁶ loyi hi zizukulwana zi hunzileko a nga tsika matiko wontihe lezaku ma famba tindleleni ta wona.

¹⁷ Hambu lezo a nga vumalangi Wukustumunyu ka wona, hakuva i lo maha kusaseka, a mu nyika vula hi le tilweni ni tinguva ta mihanzu, a mu anzisela zakuga, a tatisa timbilu ta nwina hi kutsaka. Deut. 11:14; Levi 26:4; Mat. 5:45

¹⁸ Hambu lezi va nga wula lezo, kutsongwani va wa lava ku tsanzeka ku tsimbeta a zidlemo lezaku zi nga va phahleli.

¹⁹ Kanilezi ku lo chikela a vaJuda na vata hi le Antiokia ni le Ikoniume, va hlohlotela a zidlemo, va gandla Paule hi maribye, va mu rorovisela le handle ka muti, na va alakanya lezaku i file. Xip. 13:45; 2 Kor. 11:25

²⁰ Kanilezi laha a vapizani va nga yimile va mu ranzela, i lo vuka a enghena mutini; hi manziko wa kona i lo suka aya Derbe zinwe na Barnabasi.

Vapostoli va tlhelela Antiokia.

²¹ Laha va nga wa kanele a ivangeli mutini lowo, va maha vapizani vo tala, va lo tlhelela Listra, ni le Ikoniume, ni le Antiokia,

²² na va tiyisa a mihefemulo ya vapizani, va va khongotela ku tiyiseta kukholweni, vaku hi yimelwe hi ku enghena mufunweni wa Nungungulu hi zikarato zo tala. Xip. 11:23; Mat. 10:38; Rom. 8:17

²³ Laha na va va hlawulele a masingalakati mabandleni wontihe, hi kukhongela ni kuyila, va lo va nyikela Hosini, leyi va nga kholwa ka yona. Tit. 1:5

²⁴ Zonake va lo tsemakanya Pisidia, vaya Pamfilia.

²⁵ Laha va nga kanele a mhaka le Perga, va lo relela vaya Atalia;

²⁶ ku suka hi laho va loya Antiokia hi taru, ku nga laha va nga nyikelwe kona tipswalweni ta Nungungulu a kuya ntirweni lowu va wu hetileko.

²⁷ Laha va nga wa chikele, va lo tsombanyisa a handla, va hlawutela zontlhe lezi Nungungulu a zi mahileko ha vona, ni lezaku i vululele a vamatiko a nyangwa ya kukholwa. Xip. 15:4, 12; 1 Kor. 16:9

²⁸ Zonake va lo tshama laho a xikhati xo leha zinwe ni vapizani.