Mitiro 13 - Tshwa Bible

Saule na Barnabasi va rumelwa matikweni.

¹ Ku wa hi kona a vaprofeti ni vagonzisi lomu bandleni ga le Antiokia, va nga Barnabasi, na Simeoni loyi a nga vitwa Nigeri, na Lukio wa le Kirene, na Manaen loyi a nga wundliwa zinwe ni hosi Herodi, na Saule. Xip. 14:26; 11:22

² Na va kari va tira a ntiro wa Hosi, na va yila, a Moya wa ku Basa wu te ngalo: Nzi hambanyiseleni Barnabasi na Saule a ntirweni lowu nzi va viteleko wona. Efe. 3:7, 8; 1 Tim. 2:7

³ Zonake loku va yilile ni ku khongela, va lo va tlhateka mandla, va va tsika va famba.

Barnabasi na Saule le Kupero.

⁴ Vona na va rumilwe hi Moya wa ku Basa, va lo relela vaya Selukia; va suka laho hi taru vaya Kupero.

⁵ Laha na va chikele le Salami, va loba hungu hi mhaka ya Nungungulu masinagogeni ya vaJuda; va wa hi na Johani a nga hi muvuni wabye. Xip. 12:25

⁶ Laha na va tsemakanyile xihlale va kala va chikela Pafosi, va lo kuma a mungoma wo kari, a muJuda a nga hi muprofeti wa mawunwa, loyi a vito gakwe a nga hi Bar-Jesu.

⁷ Yena i wa tshama ka hosana Sergiu Paulusi, a munhu a tlharihileko. Yaloye i lo vitana Barnabasi na Saule, na a lava kuzwa a mhaka ya Nungungulu.

⁸ Kanilezi Elima, (kutani Mungoma, hakuva a vito gakwe gi wula lezo,) i lo va vukela, na a xuva ku hambukisa a hosana kukholweni.

⁹ Kanilezi Saule, loyi kambe a nga Paule, na a tele hi Moya wa ku Basa, i lo mu honokela,

¹⁰ aku ngalo: Wena loyi u teleko hi kukanganyisa kontlhe ni wuchunguhungu, wena nʼwana wa Diabolus, u nga nala wa zontlhe lezi zi lulamileko, xana u nga ta tsika ku hambukisa a tindlela ti lulamileko ta Hosi ke?

¹¹ Makunu, languta, a canja ga Hosi gi le hehla ka wena, u tava xikhumu, u nga ha woni gambo hi xikhati xo kari. Zalezo i lo chikelelwa hi kupfhupela ni munyama; a hulumetela na a lava wo mu koka hi canja. Ekso. 9:3; 2 Tih. 6:18

¹² Loyi wa hosana, na a wonile lezi zi mahekileko, i lo kholwa, na a kari a hlamala hi kugonzisa ka Hosi.

Barnabasi na Paule le Antiokia wa Pisidia.

¹³ Paule ni lava a nga hi zinwe navo va lo suka Pafosi hi taru vaya Perga ga le Pamfilia; kanilezi Johani i lo hambana navo, a tlhelela Jerusalema. Xip. 15:38

¹⁴ Vona va lo tsemakanya Perga, va chikela Antiokia wa le Pisidia; va enghena sinagogeni hi siku ga sabado, va tshama.

¹⁵ Anzhako ka kuva na ku gonzilwe a nayo ni vaprofeti, a varangeli va sinagoga va lo va vitana, vaku: Vamakabye, loku mu hi ni mhaka ya ku khongotela vanhu, wulani. Lu. 4:16; Maheb. 13:22

¹⁶ Paule i lo suka a yima, a khweneta hi canja, aku ngalo: Madota ya ka Israeli, na nwina lava mu chavako Nungungulu, ingisani.

¹⁷ Nungungulu wa lixaka leli la ka Israeli i lo hlawula a vakoko va hina, a va kulisa laha va nga luvele tikweni ga le Gipite, a va humesa ka gona hi canja gi tlakukileko,

¹⁸ Yena i lo hunisela ha vona le xiwuleni a xipimo xa 40 wa malembe.

¹⁹ Ni laha a nga lovisile a ntlhanu wa matiko ni mambiri le tikweni ga Kanani, i lo va nyika a matiko ya wona, ma maha a tshomba yabye a xipimo xa 450 wa malembe.

²⁰ Zonake i lo va nyika Valamuli, kala ka muprofeti Samueli.

²¹ Anzhako ka lezo va lo kombela a hosi. Nungungulu i lo va nyika Saule nʼwana Kixi, wa lixaka la ka Benjamini, loyi a nga fuma 40 wa malembe.

²² Kanilezi i lo mu susa, a yimisa Davida a kuva hosi yabye, loyi Nungungulu a nga maha wukustumunyu ha yena, aku: Nzi mu kumile Davida nʼwana Jese, a nga munhu wa mbilu ya mina, loyi a ta nga maha kontlhe kuranza ka mina. 1 Sam. 16:1, 13; Tis. 89:20

²³ Hi ka pswalo wa loyi munhu, Nungungulu i humesele Israeli a Muhanyisi kotisa xitsumbiso, a nga Jesu. Isa. 11:1; Lu. 1:32; Rom. 1:3; 2 Sam. 7:12

²⁴ Na a nga se ku chikela yena, Johani i lo kanela a kubapatiza ka kuhunzuluka ka vanhu vontlhe va ka Israeli.

²⁵ Laha Johani a nga lava ku mbhetisa a ntiro wakwe, aku ngalo: Mu alakanya muku nzi mina mani ke? A hi mina yena. Kanilezi wata munwe anzhako ka mina, loyi a zilato za mikonzo yakwe nzi nga faneliko ku zi tlhatlha.

²⁶ Vamakabye, vana va lixaka la ka Abrahama, ni vona lava xikari ka nwina va chavako Nungungulu, a mhaka ya kuhanyisa loku yi rumelwe ka hina.

²⁷ Hakuva kota lezi a vaaki va le Jerusalema ni vahombe vabye, va nga kala ku mu tiva Jesu, va lo mu kona, va tatisisa lezo a timhaka ta vaprofeti leti ti gonziwako hi sabado ginwe ni ginwani. 1 Kor. 2:8

²⁸ Hambu lezo va nga kala ku kuma nanzu ka yena wa kuva afa, va lo kombela Pilatu lezaku ngha a dayiwa.

²⁹ Laha va nga wa tatisile zontlhe lezi zi nga wa tsalilwe ha yena, va lo mu chisa sinyeni, va mu lahla xilahleni.

³⁰ Kanilezi Nungungulu i lo mu vuxa hi ka vafileko;

³¹ a woniwa masiku yo tala hi lava va ngata zinwe naye hi le Galilea kuya Jerusalema, lava makunu va nga vakustumunyu vakwe xikari ka vanhu. 1 Kor. 15:5

³² Hina ha mu nehela a mahungu yo saseka ya xitsumbiso lexi xi nga mahiwa ka vakokwani, Gen. 3:15; 12:3; 22:18; Rom. 4:13

³³ lezaku Nungungulu i xi tatisile ka hina, vana vabye, hilezi a nga vuxa Jesu; kota lezi ku tsalilweko lomu ka Lisimu la wumbiri, ku ngalo: Wena u Nʼwana wa mina, nzi ku psweleko nyamutlha. Tis. 2:7; Maheb. 5:5

³⁴ Ni wukustumunyu legi gi tiyisako lezaku i mu vuxile hi ka vafileko, kasi a nga tlheli a bola, hi gezu ga Nungungulu legi gi nge ngalo: Nzi ta ku nyika a zikatekiso zi basileko lezi zi tsumbisilweko ka Davida.

³⁵ Ni ka linwani lisimu i te ngalo: Wena u nga ta vumela a wa ku Basa wa wena ku wona kubola. Tis. 16:10

³⁶ Hakuva anzhako ka kuva Davida a tirile a khungo ga Nungungulu xizukulwaneni xakwe, i lo etlela, a lahliwa zinwe ni vakoko vakwe, a wona kubola;

³⁷ kanilezi loyi Nungungulu a mu vuxileko a nga wonangi kubola.

³⁸ Hikwalaho, vamakabye, ngha zi tiveka ka nwina, lezaku ha yena ku biwa hungu ka nwina hi kutsetselelwa ka zionho.

³⁹ Ni kambe kani hi wihi loyi a kholwako wa hlayelwa kululama ha yena, ka zilo zontlhe lezi nwina mu nga hluleka ku hlayelwa kululama hi nayo wa Mosi. Isa. 53:11; Gal. 2:16

⁴⁰ Hikwalaho ti woneleni, lezaku ku nga dzuki ku wela hehla ka nwina lezi zi tsalilweko mabhukwini ya vaprofeti, ku ngalo: Hab. 1:5

⁴¹ Langutani nwina vakanyisi, mu hlamala, mu lova; Hakuva nzi ta tira ntiro masikwini ya nwina, Lowu mu to kala mu nga wu kholwi hambu loku mu byeliwa,

⁴² Laha Paule na Barnabasi va nga huma sinagogeni, a vanhu va lo va kombela lezaku a timhaka leti ti kanelwa kabye kambe hi sabado gi tako.

⁴³ Laha a hlengeletano yi nga wa hangalakile, a linyingi la vaJuda ni vaproselita va chavako Nungungulu, va lo lanzela Paule na Barnabasi, lava va nga wulawula kabye, va va khongotela lezaku va namarela tipswalweni ta Nungungulu. Xip. 11:23; Tit. 2:11; 1 Ped. 5:12

⁴⁴ Hi sabado gi gamelako ku wa su khwatsi a muti wu tsombene wontihe a ku tazwa a mhaka ya Nungungulu.

⁴⁵ Kanilezi laha a vaJuda va nga wona a xidlemo, va lo tatiswa hi wukhuxu, va kaneta lezi zi nga kanelwa hi Paule, va rukatela. Xip. 18:6; 1 Ped. 4:4; Juda 10

⁴⁶ Zonake Paule na Barnabasi va lo wulawula hi kutiya, vaku: Zi wa lavekile lezaku a mhaka ya Nungungulu yi kanelwa ka nwina kuranga. Kanilezi kota lezi nwina mu yi alako, mu ti lamula lezaku a mu fanelwi hi wutomi ga pinzukelwa, mangabye, hi hunzulukela ka vamatiko. Isa. 55:5; Mat. 10:6; 21:43; Rom. 1:16

⁴⁷ Hakuva zinghaho a Hosi yi hi layile, yiku: Nzi ku yimisile a kuva a kuwonekela ka vamatiko, Kasi uva kuhanyiswa kabye ku kala le magemeta-musi. Isa. 49:6

⁴⁸ Laha a vamatiko na va zi zwile, va lo tsaka, va dumisa a mhaka ya Nungungulu; ni vontlhe lava va nga wa yimiselwe wutomi ga pinzukelwa va lo kholwa. Xip. 2:47

⁴⁹ Ni mhaka ya Hosi yi la su ga fenemete tikweni lego gontlhe.

⁵⁰ Kanilezi a vaJuda va lo kucetela a vavasati va dumileko va chavako Nungungulu, ni vahombe va muti, va vuxela Paule na Barnabasi a kuxaniswa, va va panzanya tikweni gabye.

⁵¹ Kanilezi vona va lo phumunhela a ntshuri wa mikonzo yabye ka vona, vaya le Ikoniume. Mat. 10:14; Lu. 9:5

⁵² Ni vapizani va lo tala hi kutsaka ni Moya wa ku Basa. Mat. 5:12; Joh. 16:22; Xip. 2:46