Mitiro 12 - Tshwa Bible

Jakobe a dawa.

¹ Hi lexo xikhati hosi Herodi i lo sangula ku xanisa a vo kari va handla. Mat. 10:17

² A daya Jakobe, a nakulobye wa Johani, hi supado. Pedro a tlhatlhiwa paxweni hi ngelosi.

³ Laha na a wona lezaku zi xalalisile a vaJuda, i lo engeta a khoma Pedro kambe; lezi zi lo mahiwa hi masiku ya zibaba zi nga hava comelo. Ekso. 12:15

⁴ Laha a nga wa mu khomile, i lo mu enghenisa paxweni, a mu nyikela ka mune wa mitlawa, lezaku yi mu hlayisa, a ntlawa munwe ni munwani wu wa hi wa mune wa masochwa; Herodi na a xuva ku mu humesa mahlweni ka vanhu hi nzhako ka Pasika.

⁵ Hikwalaho Pedro i lo rinzelwa paxweni; kanilezi a handla gi lo mu khongelela ka Nungungulu hi kutikisa.

⁶ Laha Herodi a nga lava ku mu humesa, gwalego wusiku Pedro i wa etlele xikari ka masochwa mambiri, na a bohilwe hi mangenje mambiri; a varinzeli na va yimile laha nyangweni va rinzela paxo.

⁷ Languta, a ngelosi ya Hosi yi lo yima kakwe, ni kuwonekela ku woninga lomo ndlwini; yi lo mu dukunya Pedro laha reveni, yi mu vuxa, yiku; Hatlisa u suka; ni mangenje ma lowa hi le mandleni yakwe. Maheb. 1:14; Xip. 5:19

⁸ A ngelosi yiku ngalo kakwe: Boha bhandi, u ambala zilato za wena. Pedro a maha lezo. Yiku ngalo kakwe: Fenengela kumba wa wena, u nzi lanzela.

⁹ I lo huma, a yi lanzela, na a nga zi tivi lezaku lezi zi mahiwako hi ngelosi zi maheka hakunene; kanilezi i wa alakanya lezaku o wona muwoniso. Tis. 126:1

¹⁰ Laha na va hunzile a ntlawa wo ranga ni wa wumbiri, va lo chikela nyangweni ya xiketse leyi yi komamako mutini; yi lo ti vululekela ha yoce, va huma, va famba a phango ginwe; zonake a ngelosi yi lo mu siya hi xitshuketi.

¹¹ Laha Pedro na a tilimukile, aku ngalo: Makunu nza zi tiva hakunene, lezaku a Hosi yi rumile a ngelosi ya yona, yi ta nzi tlhatlhisa canjeni ga Herodi, ni ka zontlhe lezi va nga zi langutele a vaJuda. Tis. 34:7; 2 Ped. 2:9

¹² Laha a nga wa zi pimile, i loya ndlwini ya Maria, a nyine wa Johani, loyi a ginwani vito a nga Marku; laha vanyingi va nga tsombene kona, va khongela. Xip. 15:37

¹³ Laha a nga gongonza livatini la nyangwa, ku lota a nhwana, a vito gakwe hi Roda, kasi ku ta tiva.

¹⁴ Laha a nga tivile a gezu ga Pedro, a nga vululangi nyangwa hi kota ya kutsaka, kanilezi i lo tsutsuma a ya va tivisa aku Pedro i yimile nyangweni.

¹⁵ Vaku ngalo kakwe: U hungukile! Kanilezi yena a su tiyisa lezaku zinene. Zonake vaku ngalo: I ngelosi yakwe. Mat. 18:10

¹⁶ Kanilezi Pedro i lo simamisa a gongonza; ni laha va nga vulule, va lo mu wona, va hlamala.

¹⁷ Kanilezi yena i lo va khweneta hi canja lezaku a va miyele, a hlawutela kabye lezi Hosi yi nga mu humesisa zona paxweni; zonake aku: Tivisani leti timhaka ka Jakobe ni ka vamakabye. Yena i lo suka, aya ka ginwani wutshamu.

¹⁸ Makunu na gi cile, ku wa hi ni woyonga xikari ka masochwa, lezaku xana Pedro i kwihi.

¹⁹ Laha Herodi a nga mu lavile, a nga mu kumi, i lo hlolisisa a varinzeli, a laya lezaku a va dayiwe. Zonake i lo relela hi le Judia aya Kesaria, a ya tshama kona.

A kufa ka Herodi.

²⁰ Herodi i wa hi ni zunga ni va le Tire ni Sidoni. Kanilezi va lota ka yena na va chatene wunghana na Blastu, a nga hi nduna ya hombe ya hosi, vata hi mbilu yinwe va ta kombela kurula, hakuva a tiko gabye gi wa hanyela tikweni ga Herodi. 1 Tih. 5:9

²¹ Hi siku gi yimisilweko Herodi i lo ambala tinguwo ta wuhosi, a tshama xitshanwini xa wuhosi, a kanela kabye.

²² Zonake a vanhu va lo kanyuluka, vaku: I gezu ga nungungulu, a hi gezu ga munhu!

²³ Khalakale a ngelosi ya Hosi yi lo muba, hilezi a nga mu nyikangi wudzunzo Nungungulu; i lo giwa hi ziwungwani, afa. 1 Sam. 25:38

²⁴ Kanilezi a mhaka ya Nungungulu yi lo anza yi hangalaka.

²⁵ Barnabasi na Saule laha na va mbhetile a ntiro wabye le Jerusalema va lo tlhelela kaya, va famba na Johani loyi a ginwani vito a nga Marku.