Mika 7 - Tshwa Bible

A zionho za ka Israeli.

¹ I khombo ka mina! hakuva nzi kotisa a simu legi a mihanzu ya gona yi phophilweko, ni xivina lexi a mauva ya xona ma kolelweko; a ka hi na xitata xa mauva lexi xi nga giwako, hambu ni mihanzu yo ranga ya kuwu leyi nzi yi ranzako. Mat. 21:19

² A vanhu va nene va nyamalele misaveni, ku hava loyi a lulamileko xikari ka vanhu. Vontlhe va xiyelela ku halata nkhata, a munwe ni munwani i hlota nakulobye hi tlhamu.

³ A mandla yabye ma tlharihile ku maha zobiha. Hosana yi kombela, zinyikiwo, ni mulamuli i ranza ku xavelelwa; a wahombe i wulawula a, kumbilukela ka mbilu yakwe, lezo va hlengela ku tlavinyela timhaka.

⁴ A wa nene wa kona ka yontlhe i fanana ni xigetlwani, ni leyi a hunzeleleko kululama i fanana ni khuhu ga mizwa, Gi tshinele a siku ga tsayiselelo wa wena, legi gi wulilweko hi varinzeli va wena, makunu ku tava ni vilinganya.

⁵ Mu nga tsumbeni vanghana, mu nga veki kutsumba ka nwina ka maxaka. Valele loyi a etleleko xifuveni xa wena a tinyangwa ta nomu wa wena.

⁶ Hakuva a mufana wa kanyisa a raru wakwe, a nhanyana a vukela a nyine wakwe, ni katamwane i vukela a nwingi wakwe; a valala va munhu hi va yindlu ya ka kabye. Mat. 10:35; Lu. 12:53

Nungungulu a tlhatlhisa Israeli.

⁷ Kanilezi mina nzi ta cuwuka ka Jehova, nzi langutela a Nungungulu wa kuhanyiswa ka mina; a Nungungulu wa mina i ta nzizwa.

⁸ Nala wanga, u nga tsakeli a khombo ga mina! Hambu loku nziwa, nzi ta tlhela nzi vuka; loku nzi tshamile munyameni, Jehova i tava kuwonekela ka mina.

⁹ Nzi ta rwala a zanga ya Jehova, hakuva nzi mu onhele, a kala a yimela a mhaka ya mina a nzi lamula. I ta nzi humesela kuwonekeleni, nzi wona a kululama kakwe.

¹⁰ A valala va mina va ta zi wona, vawa tingana, lava va nge ngalo: I kwihi Jehova a Nungungulu wa wena? A mahlo ya mina ma ta tsaka a kuwoneni kabye, hakuva va ta kanzihelelwa khwatsi i nzhope ya lomu tindleleni.

¹¹ Hi siku ga kuaketwa ka makhurisi ya wena a mimbhingano ya wena yi ta tshinetwa kule.

¹² Hi siku lego va tata ka wena a va le Assiria, ni va le mitini ya le Gipite, ni kusukela Gipite kala Congweni, kusukela bimbini kuya ka ginwani bimbi, ni kusukela xitsungeni kuya ka xinwani xitsunga.

¹³ Kanilezi a tiko gi ta hahlulwa hi kota ya vaaki va gona, ni mihanzu ya zimaho zabye.

Nungungulu a tsetselela Israeli.

¹⁴ Hisa a vanhu va wena hi nhonga ya wena, va nga tiyivu ta tshomba ya wena ti tshamileko toce khwatini ga le Karmeli. A ti gele Baxani ni Gileade khwatsi hi masikwini ya kale. Mitse. 23:9; Deut. 33:28

¹⁵ Nzi ta ya kombisa a zilo zi hlamalisako khwatsi hi masikwini ya kuhuma ka wena hi le Gipite.

¹⁶ A vamatiko va ta zi wona, vawa tingana hi kota ya ntamu wabye wontlhe; va ta ti khoma milomu, vata tindleve.

¹⁷ Va ta laza a tshuri kukotisa a nyoka; vata huma makhokholeni yabye kota zikokakoka za misava na va rurumela; va tata ka Jehova Nungungulu wa hina hi kudzevetana, va ta ku chava.

¹⁸ Hi wihi a Nungungulu loyi a fananako na wena, loyi a tsetselelako kubiha, a rivalelako a zihambunyeto za misalela ya tshomba yakwe ke? Wena a ku zangari kala kupinzuka, hakuva wa tsaka ku zwela wuxinji. Ekso. 15:11; Jer. 10:6; Miti. 10:43

¹⁹ U ta tlhela u hi zwela wusiwana, u kanzihela a zigoho za hina; u ta hoxa zontlhe zionho za hina bimbini.

²⁰ U ta tsumbeka ka Jakobe, Abrahama u mu mahela Wuxinji legi u nga gi hlambanyela a vadadani va hina kaleloko.