Mika 6 - Tshwa Bible

Jehova i na ni mhaka na Israeli.

¹ Zwanani makunu lezi Jehova a nge ngalo: Yima, u wulawula mahlweni ka zitsunga, u zwata a gezu ga wena ka miganga!

² Nwina zitsunga, zwanani a keco ya Jehova, na nwina ziseketelo zi tiyileko za misava; hakuva Jehova i na ni mhaka ni vanhu vakwe, i ta ranisa Israeli.

³ Tiko ganga, xini nzi ku maheleko? Xini nzi ku rerileko ha xona? Nzi byele!

⁴ Hakuva nzi ku humesile tikweni ga Gipite, nzi ku tirula ndlwini ya wukhumbi, nzi ku rangela mahlweni hi va Mosi na Aroni na Miriamu.

⁵ Tiko ganga, alakanya a makungo ya Balake a hosi ya le Moabi, ni lezi Balaami a nʼwana Beore a mu hlamuleko zona, ni lezi zi nga humelela kusukela Xittimu kala Gilgale, kasi ma fela ku tiva a mitiro yi lulamileko ya Jehova. Mitse. 22:1—23:1; Jox. 2:1

Lezi zi labyiwako hi Jehova

⁶ Nzi taya na nzi hi ni yini mahlweni ka Jehova, nzi ya ti koramisa mahlweni ka Nungungulu a tlakukileko? Nzi ta tshinela kakwe na nzi hi ni minyikelo ya kuhiswa, ni marole ya lembe ginwe ke?

⁷ Jehova i ta xalaliswa hi makume mazana ya tihamba, kutani hi mazanazana ya micongo ya mafura ke? Nzi ta nyikela a matewula ya mina hi zihambunyeto za mina, ni mbhanzu wa miri wa mina hi kota ya kuonha ka muhefemulo wa mina ke?

⁸ Wena munhu, u tiyisilwe zinene; ni lezi Jehova a zi lavako ka wena, hi lezaku u maha leʼza kululama, u ranza wuxinji, ni ku famba hi kutikoramisa zinwe ni Nungungulu wa wena. Deut. 10:12

⁹ A gezu ga Jehova gi huwelela mutini, loyi a tlharihileko i ta chava a vito ga wena! Zwanani hi nhonga ni loyi a yi leleteleko.

¹⁰ Ta hi kona a titshomba to biha lomu ndlwini ya wakubiha, ni tipimo li hungulilweko leli li rukilweko ke?

¹¹ Nzi ngava loyi a lulamileko loku nzi vumela a xikalo xo kanganyisa, ni kwama wu nga ni ziringaniso zi khohlisako ke?

¹² Hakuva a vafumileko va muti va tele hi tihanyi, ni vaaki va wona va wulawula mawunwa, ni tirimi tabye mbakhohlisi milonwini yabye.

¹³ Hi kota ya lezi nzi ta kuba a mbanga yi hlokisako, nzi ku hahlula hi kota ya zionho za wena.

¹⁴ U taga, kanilezi u nga ta xura; yi ta ala yi zwala a ndlala nzeni ka wena. U ta rwala a tshomba, kanilezi yi nga ta pona; lezi u ta nga zi ponisa nzi ta zi nyikela supado.

¹⁵ U ta byala, kanilezi u nga ta tshovele; u ta kamela maoliva, kanilezi u nga ta tola mafura ya kona; u ta kamela mauva, kanilezi u nga tanwa a vinya ga kona. Deut. 28:30, 38; Zef. 1:13; Hag. 1:6

¹⁶ Hakuva u hlayisa a zilayelo za Omri, ni matirela wontlhe ya yindlu ya ka Ahabi, u famba hi tindlela tabye. Hikwalaho nzi ta ku hahlula, a vaaki va wena va hlekulwa; zonake u ta rwala a nzhukano ya vanhu va mina. 1 Tih. 16:25, 26, 30-33