Mavingu 6 - Tshwa Bible

A tindlela ta wupumbu.

¹ Nwananga, loku u ti bohile hi nanzu wa muakelane wa wena, oku u nyikele a woko ga wena a ku tiyisa a wamatiko;

² Loku a nomu wa wena wu ku vekele ziyo, i loku a timhaka ta nomu wa wena ti ku bohile;

³ Maha lezi nwananga, u ti tlhatlhisa wutsumbu ga wena, Kota lezi u nga canjeni ga muakelane wa wena: amba u ya ti koramisa, u khongotela muakelane wa wena.

⁴ U nga nyiketeli mahlo ya wena wurongweni, nga vumeli tisiyi ta wena ku khudzehela.

⁵ Ti tlhatlhise kukotisa a pswele ga mhuti, ukotisa a nyanyani mandleni ya muhloti.

⁶ Wena lolo, famba ka wusokoti, ya cuwukisisa mahanyela ya gona, u tlhariha:

⁷ A gi na hosi, e hambu muwoneleli, kutani mufumeli;

⁸ Hambu zi hi tano ga ti hlayisela a kuga ka gona ka ximumu, i hlengeletela a kuga ka gona xikhatini xa kutshovela.

⁹ U ta etlela kala rini, O lolo nziwena? ta khindlimuka rini wurongweni ga wena?

¹⁰ Ina, etlelanyana, khudzehela kutsongwani, humbareta mawoko u etlela xikhatanyana:

¹¹ Zonake a wusiwana ga wena gi tata kukotisa a khamba, i kuvumala kukotisa a munhu loyi a hlomileko.

¹² I munhu wa mihoni, munhu wo biha, oyi a fambako ni nomu wo kanganyisa.

¹³ I tsopeta mahlo yakwe, a wulawula hi milenge yakwe, gonzisa hi titiho takwe;

¹⁴ A mbilu yakwe yi tele hi kukanganyisa, alakanyela kubiha xontlhe xikhati; xwanya kuhambana.

¹⁵ Hikwalaho a kukhohliswa kakwe u tata hi xitshuketi, kulobyiswa kakwe ka xitshuketi ku nga tava na kupona.

¹⁶ Ku na ni ntlhanu wa zilo ni xinwe a zi vengako Jehova: na, i ntlhanu ni zimbiri zi nga manyalataniso kakwe:

¹⁷ A mahlo ya matshanza, a lirimi li hembako, i mandla lawa ma halatako nkhata wu nga hiko na nanzu;

¹⁸ A mbilu yi polako makungo yo biha, i milenge leyi yi hatlisako yi tsutsumela kubiheni;

¹⁹ A kustumunyu yo hemba, leyi yi wulako wunwa, i loyi a xwanyako kungazwani xikari ka vanakulobye.

A mahanyela ya kubiha.

²⁰ Nwananga, hlayisa xileletelo xa dadani wa wena, nga tsiki zilayelo za nyine wa wena:

²¹ Zi bohelele xontlhe xikhati mbilwini ya wena, zi bohelela nhanwini ya wena.

²² Laha wena u fambako zona zi ta ku rangela, oku uya kuetleleni, zi ta ku hlayisa; i loku u vuka zi ta wulawula na wena. Deut. 6:7

²³ Hakuva a zileletelo i kandiya, ni xilayelo kuwonekela; i kukawuka ku layako i ndlela ya wutomi.

²⁴ Zi ta ku ponisa ka wasati wa kubiha, i ka lirimi li xengetelako la wasati wa muakelane.

²⁵ A mbilu ya wena ngha yi nga naveli wumbhuri gakwe, e hambu ku kokiwa hi tisiyi takwe.

²⁶ Hakuva hi kota ya wasati wa wuoswi, a munhu wa sala ni xipanzana xa xibaba ntsena; i wasati wa xibhayi i hlota wutomi ga lisima.

²⁷ A munhu wa zi kota ku veka nzilo laha xifuveni xakwe, tinguwo takwe ti ngaswi ke?

²⁸ I kona a zi kotako ku famba hehla ka makhala ya nzilo, mikonzo yakwe yi ngaswi ke?

²⁹ Hikwalaho loyi a enghenako ka wasati wa muakelane wakwe, i wihi loyi a mu henyako, a nga ta kuva hava nanzu.

³⁰ A vanhu a va vengi a khamba loku gi yiva, yivela ku miyeta ndlala yakwe.

³¹ Kanilezi loku a kumiwa i ta riha hi ka ntlhanu ni kumbiri, ta nyikela yontlhe nhunzu ya yindlu yakwe. Ekso. 22:1

³² Loyi a bhayako ni wasati, a nga na kupimisisa; oyi a zi mahako i lovisa muhefemulo wakwe.

³³ I ta kuma tiphanja ni tingana, i nzhukano yakwe cima yi nga ta mbhela.

³⁴ Hakuva a xiluse xi zangarisa munhu; ikwalaho a nga ta kuva ni wuxinji hi siku ga ku ti photela.

³⁵ Cima a nga ta khatalela nzhiho, e hambu ku tsakiswa hi wunyingi ga lezi u ta nga mu nyika.