Mavingu 24 - Tshwa Bible1 U nga naveli vanhu va bihileko; e hambu ku navela ku tshama zinwe navo. 2 Hakuva a timbilu tabye ti alakanya ku xanisa, i milomu yabye yi wulawula kubiha. 3 A yindlu yi akiwa hi wutlhari, i tiyisiwa hi kupimisisa. 4 A tikwaruto ta yona ta tatiswa hi wutivi, i ta tatiwa hi wukosi ga lisima gi tsakisako. 5 Loyi a tlharihileko i na ni ntamu; na, a munhu wa wutivi wa ti engetela ntamu. 6 Hakuva u ta vuxa yimpi hi wutlhari; i kupona ku kona loku masungukati ma tele. 7 A wutlhari gi tlakukile ka xipumbu, gi mu tsanza, ima xi nga ta vulula a nomu wa xona le hubyeni. 8 Loyi a alakanyelako ku maha kubiha, ta vitanwa mutshoheteli. 9 A maalakanyo ya wupumbu hi xionho; i mutseketseli manyalataniso vanhwini. 10 Loku wena u rereka sikwini ga khombo, ntamu wa wena wu tsongwani. 11 Tlhatlhisa lava va yisiwako kufeni; hlanguta lava va kokelwako kudaweni. 12 Loku uku: Languta, a hi zi tivangi; oyi a pimako timbilu a nga zi woni ke? oyi a hlayisako muhefemulo wa wena a nga zi tivi ke? nga ta chachazela munwe ni munwani kota mitiro yakwe ke? Jer. 32:19; Rom. 2:6; Kuv. 22:12 13 Nwananga, gana wulombe haku va gi nene; i zihahla za wulombe lezi zi nanzihako kanwini wa wena. 14 Hizalezo ni wutlhari gi tava tano muhefemulweni wa wena; oku u gi kumile u tava ni nchachazelo, i kutsumba ka wena ku nga tava ka mahala; 15 O wena wa kubiha, u nga ongozeli a muti wa loyi a lulamileko; nga gohi wutshamu gakwe ga kuhumula. 16 Hakuva a munhu nene iwa ntlhanu wa zikhati ni zimbiri, a vuka kambe; anilezi a wa kubiha i ta wela makhombyeni. 17 U nga giyi laha a nala wa wena a wako; gha a mbilu ya wena yi nga tsaki laha yena na a hlulilwe: 18 A nga zi wona Jehova zi mu tsanwisa; susa a zanga yakwe hehla kakwe. 19 U nga ti karati hi kota ya vanhu va kubiha; e hambu ku navela a va kubiha: 20 Hakuva a wa kubiha cima a nga ta gi wona ga manziko; kandiya ya wa kubiha yi ta timiwa. 21 Nwananga, chava Jehova ni hosi; nga ti tlhanganyisi ni lava va ranzako ku hluwuka. 1 Ped. 2:17 22 Hakuva a khombo gabye gi tata hi xitshuketi; imani a tivako a kulobyiswa ka vona vontlhe? 23 Leti kambe timhaka ta titlhari, zi sasekangi ku maha xihlawulela kulamuleni. 24 Loyi a wulako ka wa kubiha aku: Wena u lulamile; aloye i ta rukiwa hi vanhu, ni matiko ma ta mu nyenya. 25 Kanilezi lava va mu kawukako va ta xalala, i zikatekiso zi tava hehla kabye. 26 Loyi a hlamulako timhaka ti nene, pswopswa munhu nonwini. 27 Sasisa mitiro ya wena lahandle, sasisa ni simu ga wena; onake aka a yindlu ya wena; 28 U nga kustumunyi u vukela muakelane wa wena handle ka nanzu; ana u ta khohlisa hi milomu ya wena ke? 29 U nga wuli lezaku, Nzi ta maha kakwe khwatsi hi lezi a nga maha ka mina, zi ta tlhelisela munhu khwatsi hi mitiro yakwe. 30 Nzi hunzile hi le sinwini ga lolo; i le xivineni xa loyi a nga hiko na kupimisisa. 31 Languta, ku wa khubhunyetilwe hi mizwa; i wusosonya gi wa fenengetile a nghohe ya simu: i libhingo li wa hahlukile. 32 Zonake nzi lo zi wona, nzi ehleketa, zi lo zi cuwukisisa, nzi kuma gonzo ka zona. 33 Ina, etlelanyana, khudzehela kutsongwani, humbareta mawoko u etlela xikhatanyana: 34 Zonake a wusiwana ga wena gi tata kukotisa a khamba, i kuvumala kukotisa a munhu loyi a hlomileko. |
Tshwa Bible © Bible Society in Mozambique, 1972, 2007.
Bible Society of Mozambique