Biblia Todo Logo
Baibulo la pa intaneti

- Zotsatsa -

Mavingu 19 - Tshwa Bible

1 A xisiwana lexi xi fambako hi kululama ka xona i hunza a munhu loyi a nga ni milomu ya kukanganyisa, a nga xipumbu,

2 A mixuvo yi nga hiko na kupimisisa a yi sasekangi; i loyi a hatlisako hi mikonzo yakwe wa onha.

3 A wupumbu ga munhu ga goha mahanyela yakwe; i mbilu yakwe yi vukela Jehova.

4 A wukosi gi vitanisa a vanghana vanyingi; anilezi a xisiwana xa tsikiwa hi xaka ga xona.

5 A kustumunyu ya mawunwa yi nga ta pona ku tsayiswa; i loyi a wulawulako mawunwa a nga ta huluka. Deut. 19:18

6 Vanyingi va sasela hosana; unhu ni munhu munghana wa loyi a nyikako zinyikiwo.

7 A xisiwana xi vengiwa hi vontlhe vanakulobye; vanghana vakwe va fambela kule kakwe: a va khongotela, kanilezi vo ti sukela.

8 Loyi a layako wutlhari wa ranza muhefemulo wakwe; i loyi a pimisisako i ta kuma makatekwa.

9 A kustumunyu ya mawunwa yi nga ta pona ku tsayiswa; i loyi a hembako mawunwa i ta lova.

10 A kutshameka a ku faneli xipumbu; guvunguvu a nanza a gi faneli ku fumela tihosi.

11 A munhu a tlharihileko wa nonoka ku zangara; bukosi gakwe a ku tsetselela zihambunyeto.

12 A zanga ya hosi yi khwatsi i nghonyamo yi dzumadzumako; anilezi a liranzo lakwe li fanana ni nzhokati yi welako byanyini,

13 A nʼwana wa xipumbu i khombo ka dadani wakwe; i timholova ta sati ti fana ni yindlu leyi yi vutako masiku wontihe.

14 A yindlu ni wukosi i tshomba ya vadadani; anilezi a sati a tlharihileko xinyikiwo xi tako hi ka Jehova.

15 A wulolo gi wisela munhu wurongweni; i muhefemulo wa lolo wu tazwa ndlala.

16 Loyi a hlayisako zileletelo i hlayisa muhefemulo wakwe; anilezi loyi a nga khataliko hi tindlela takwe i tafa.

17 Loyi a hawukelako zisiwana i pembisa ka Jehova; ena i ta chachazelwa hi zimaho zakwe za zi nene. Mat. 10:42; 25:40

18 Laya a nʼwana wa wena na ka ha hi kona kutsumba; anilezi u nga naveli ku mu daya.

19 A munhu wa zanga ya hombe i ta tsayiswa; akuva loku u mu tsetselela, wena u fanele ku engeta u zi maha.

20 Zwana wusungukati, u amukela ku layiwa, asi a masiku ma ha tako u fela ku tlhariha.

21 Ku na ni makungo manyingi mbilwini ya munhu; anilezi a wusungukati ga Jehova hi gona gi tiyileko.

22 Lexi xi sasekisako munhu hi wunene gakwe; xisiwana xi nene ku hunza a munhu wa wunwa.

23 A ku chava Jehova ku yisa wutomini; i loyi a nga nako i tshama a tsakile: ima a nga ta enzelwa hi kubiha.

24 A lolo gi peta a canja ga gona lomu ngelweni, anilezi a nga gi tlhelisi giya nonwini wakwe.

25 Bana mutseketseli, ni zipumbu zi ta gonza ku tlhariha; uleka loyi a nga ni kupima, i ta pima wutivi.

26 Loyi a xanisako raru wakwe, a hlongola nyine wakwe, i nʼwana loyi a wisako tingana, a vangako nzhukano.

27 Nwananga, tsika ku ingisela gonziselelo, oku yi ku maha u huma timhakeni ta wutlhari.

28 A kustumunyu ya mawunwa ya tseketsela zinene; i nomu wa munhu wo biha wu khadamula zigoho.

29 A kulamula ku yimiselwe vatseketseli; i timbirimbi ti yimiselwe mihlana ya zipumbu.

Tshwa Bible © Bible Society in Mozambique, 1972, 2007.

Bible Society of Mozambique
Titsatireni:



Zotsatsa