Mavingu 17 - Tshwa Bible

¹ A wukoko ntsena laha ku nga ni kurula, i hunza a yindlu leyi yi teleko hi kuga ko nanziha na yi hi ni timholova.

² A nanza gi tlharihileko gi ta fumela a nʼwana loyi a wisako tingana; tava ni xiavelo xa tshomba zinwe ni vana va hosi yakwe.

³ A mbita yo nyekisela nja siliva, ni nzhimbo ngwa nzalama; anilezi Jehova i ringa timbilu.

⁴ A wa kubiha i ingisela milomu ya kubiha; i muhembi i ingisela lirimi la mahlevo.

⁵ Loyi a tseketselako xisiwana i rukatela Mumahi wa xona; i loyi a tsakako hi hlokiselelo ya vanwani a nga ta pona tsakiselelo.

⁶ A vazukulu hi xona xidlodlo xa zikhosana; i wudzunzo ga vanana hi vadadani vabye.

⁷ A timhaka ta ku ti kulisa a ti faneli xipumbu; hwatsi hi milomu ya mawunwa yi nga faneliko hosana.

⁸ A xinyikiwo xi khwatsi i ribye ga tsengo ka yena loyi a xi nyikako; i kwihi laha a enghenako kona wa humelela.

⁹ Loyi a fihlako xionho i hlota liranzo; anilezi loyi a wulawulako ha xona i vanga kuhambana xikari ka maxaka.

¹⁰ A munhu wa kupimisisa wa ingisa kukawukwa, u hunza xipumbu loku xi biwa zana ga timbirimbi.

¹¹ A munhu wa kubiha i hlota gujeguje ntsena; ikwalaho i ta rumelwa a ntsumi wa tihanyi.

¹² A ku tlhangana ni pswele ga urso legi gi tekelweko a vana va gona, chukwana ku hunza ku tlhangana ni xipumbu wupumbyini ga xona.

¹³ A khombo cima gi nga ta huma ndlwini ya munhu oyi a tlheliselako kusaseka hi kubiha. Rom. 12:17; 1 Tes. 5:15; 1 Ped. 3:9

¹⁴ A kusangula ka timholova ku khwatsi hi loku a mati ma halaka; ikwalaho tsika kukanetisana na ti nga se sangula timholova.

¹⁵ Loyi a yimelako loyi a nga ni nanzu, ni loyi a konako loyi a nga hiko na nanzu, i wumbiri gabye va hi manyalataniso mahlweni ka Jehova. Deut. 25:1; Isa. 5:23

¹⁶ Zi vuna yini a kuva a xipumbu xi hi ni mali ya ku xava wutlhari, aha a mbilu ya xona yi nga gi khataleliko ke?

¹⁷ A liranzo la munghana la su tsoma xontlhe xikhati, i nakulobye i pswalelwe ku vunetela kuxanisekeni.

¹⁸ A munhu a nga hiko na kupima wa tsumbisa, ti enghenisa nanzwini wa muakelane.

¹⁹ Loyi a ranzako mazunga wa ranza kugoha; oyi a kulisako nyangwa yakwe i hlota kulobyiswa.

²⁰ A wa mbilu yo biha a nga kumi kusaseka; oyi a nga ni lirimi lo kanganyisa i wela khombyeni.

²¹ Loyi a belekako xipumbu i ti vangela wusiwana; dadani wa xipumbu a nga na litsako.

²² A mbilu yi tsakileko yi hi muri wu nene; anilezi a moya wu tshovekileko wu omisa marambu.

²³ A wa kubiha i amukela xinyikiwo xihundleni, bihisa ha xona a tindlela ta kulamula.

²⁴ Loyi a nga ni kupimisisa i cuwukela wutlhari; anilezi a mahlo ya xipumbu ma le magumelweni ya misava.

²⁵ A nʼwana wa xipumbu i hlomulo ka raru wakwe; i tsheku ka loyi a mu belekileko.

²⁶ Kambe a ku tsayisa a munhu a nga hiko na nanzu a zi saseki; ambu a kuba lava va dzunzekako hi kota ya kululama kaye.

²⁷ Loyi a tlharihileko wa ti khoma kuwulawuleni kakwe; i loyi a nga ni kupimisisa i na ni moya wa kurula.

²⁸ Hambu a munhu wa xipumbu, oku a rutisa wa wuliwa lezaku i tlharihile; oyi a ti miyelelako i wuliwa lezaku munhu wa kupima.