Mavingu 16 - Tshwa Bible

¹ A munhu i pola makungo mbilwini yakwe, anilezi a hlamulo wa lirimi wuta hi le ka Jehova.

² Tontlhe tindlela ta munhu ti basile kuwoneni ka yena nwinyi; anilezi Jehova i pima a mimoya.

³ Hendleleta mitiro ya wena yontlhe ka Jehova, makungo ya wena ma ta maheka. 1 Ped. 5:7

⁴ Jehova i mahile zilo zontlhe lezaku ziva ni ntiro wo kari, na, ni loyi wa kubiha i mahelwe siku ga kubiha.

⁵ Vontlhe lava va nga ni mbilu ya ku ti kulisa va hi manyalataniso ka Jehova; ima va nga ta pona ku tsayiswa.

⁶ A kugoha ka vinyiwa hi wuxinji ni zinene; i ku chava Jehova a vanhu va huma kubiheni.

⁷ Loku a tindlela ta munhu ti mu tsakisa Jehova, a vanga kurula xikari kakwe ni valala vakwe.

⁸ I chuko ku kuma zitsongwani hi nongameto, u hunza ku bhinzula zo tala hi kubiha.

⁹ A mbilu ya munhu yi mu longisela a tindlela takwe, anilezi Jehova wa rangela kufamba kakwe.

¹⁰ A kuvumba ku le milonwini ya hosi, nomu wakwe a wu hoxisi kulamuleni kakwe.

¹¹ A lipimo ni xikalu xo lulama zi ka Jehova; ontlhe tipimo ta xikalu i ntiro wakwe.

¹² Manyalataniso ka tihosi a ku maha kubiha; akuva a xitshamu xa wuhosi xi tiyisiwa hi kululama.

¹³ A tihosi ti tsakiswa hi milomu yi nene, a mu ranza loyi a wulawulako zinene.

¹⁴ A zanga ya hosi yi khwatsi i ntsumi wa lufo; anilezi a tlhari yi ta yi rengisa.

¹⁵ A kuwonekeleni ka nghohe ya hosi ku na ni wutomi; i wumbilu ga yona gi khwatsi i refu ga vula yo gumesa.

¹⁶ A ku kuma wutlhari i chuko ku hunza nzalama; i ku kuma kupimisisa ku hunza siliva.

¹⁷ A gonzo ga valulamileko hi ku huma kubiheni; oyi a hlayisako ndlela yakwe wa lonzowota muhefemulo wakwe.

¹⁸ A matshanza ma rangela kulova; i kutikukumukisa ku rangela kuwa.

¹⁹ Zi sasekile a ku ti tsongahata ni zisiwana, u hunza ku avelana muphango zinwe ni va matshanza.

²⁰ Loyi a pimisisako khwatsi mhaka i ta kuma litsako; i loyi a tsumbako Jehova i katekile.

²¹ Loyi a tlharihileko mbilwini i ta vitanwa wa kutiva; i kunanziha ka milomu ku enzelekisa zigonzo.

²² A kupima i hlowo ya wutomi ka loyi a nga nako; anilezi a wupumbu hi tsayiselelo ya zipumbu.

²³ A mbilu ya tlhari yi gonzisa nomu wakwe; i engetela tigonzo milonwini yakwe.

²⁴ A timhaka to olova zihahla za wulombe; a tsombela muhefemulweni, ti nyika wutomi ka marambu.

²⁵ Yi kona ndlela yi wonekako na yi lulamile munhwini, anilezi magumo ka yona yi yisa kufeni.

²⁶ A ndlala ya loyi a tirako ya mu tirela, akuva a nomu wakwe wa mu kurumeta.

²⁷ A munhu wa kubiha wa kela kubiha; ilonwini yakwe ku huma a nzilo wu hisako. Jak. 3:16

²⁸ A munhu wa kukanganyisa i vanga timholova; muhlevi i hambanyisa wunghana.

²⁹ A munhu wo leva wa kucetela muakelane wakwe; mu yisa tindleleni ti nga hiko ti nene.

³⁰ Wo vala mahlo yakwe a alakanyela zilo zo kanganyisa; aha na a dumara milomu yakwe i humesa kubiha.

³¹ A hloko ya wuvu xidlodlo xa wudzunzo, i kumeka tindleleni ta kululama.

³² Loyi a nonokako ku zangara i hunza nhenha; i loyi a fumelako moya wakwe i hunza loyi a tekako muti.

³³ A hlolo yi hlahlubyelwa matshambokhulwini, anilezi zontlhe zi humako hi ka yona za ka Jehova.