Mavingu 15 - Tshwa Bible

¹ A hlamulo wu olovileko wu rengisa khulo, anilezi a timhaka ti tlhavako ti vindlusa zanga. 1 Sam. 25:23; Mav. 25:15

² A lirimi la tlhari li nanzihisa wutivi; anilezi a nomu wa zipumbu wu pupuma wupumbu.

³ A mahlo ya Jehova ma wona matshamu wontihe; a cuwuka laʼvo biha ni va kululama.

⁴ A lirimi li mbheleleko i sinya ya wutomi; anilezi loku li bihile li goha muhefemulo.

⁵ A xipumbu a xi khatali hi ziluleko za raru wa xona; anilezi loyi a ingisako ziluleko i tlharihile.

⁶ A ndlwini ya loyi a lulamileko ku na ni tshomba yo tala; anilezi a bhinzu ga wa kubiha hi zikarato.

⁷ A milomu ya tlhari yi humesa wutivi; anilezi a mbilu ya xipumbu a yi mahi lezo.

⁸ A muphahlo wa va kubiha manyala ka Jehova; anilezi i tsakiswa hi mukombelo wa valulamileko.

⁹ A ndlela ya va kubiha manyala ka Jehova; anilezi wa ranza loyi a lanzelako kululama.

¹⁰ A kukawukwa ka bayisa ka loyi a tsikako ndlela; i loyi a alako ziluleko i tafa.

¹¹ A Xeole ni Abaddoni zi le kuwoneni ka Jehova; guvunguvu a timbilu ta vana va vanhu. Joba 26:6; Maheb. 4:13

¹² A mutseketseli a nga ranzi ku kawukwa; e hambu a kuya ka loyi a tlharihileko.

¹³ A mbilu yi tsakileko yi nwayitanisa a nghohe; anilezi a kuxaniseka ka mbilu ku tshova muhefemulo.

¹⁴ A mbilu ya loyi a nga ni kupimisisa yi hlota wutivi; anilezi a milomu ya zipumbu yiga wupumbu.

¹⁵ Wontihe masiku ya loyi a hlokiswako ma bihile; anilezi a mbilu yi tsakileko yi le mubuzweni masiku wontihe.

¹⁶ A wukosana gi tsongwani leʼgi nga ni xichavo ha Jehova, i hunza a titshomba to tala leti ti nga ni zikarato.

¹⁷ A kuga ka matluka laha ku nga ni liranzo, u hunza a homu yi nonileko laha ku nga ni timholova.

¹⁸ A munhu wa xizangazangani i vuxa kukanetisana; anilezi loyi a nonokako ku zangara i rengisa timholova.

¹⁹ A ndlela ya lolo yi khwatsi libhingo la mizwa; anilezi a ndlela ya loyi a lulamileko yi basile.

²⁰ A nʼwana loyi a tlharihileko i tsakisa dadani wakwe; anilezi a munhu wa xipumbu i kanyisa nyine wakwe.

²¹ A wupumbu litsako ka loyi a nga hiko na wutlhari; anilezi a munhu wa kupima i famba hi kululama.

²² Laha a wusungukati gi nga hava a zikungo za tsanzeka; anilezi za tiya hi kutala ka masungukati.

²³ A munhu i kuma kutsaka hi hlamulo wa nomu wakwe; i nanzihisa kuyini a mhaka yi wuliwako hi xikhati xa yona!

²⁴ A ka munhu nene a ndlela ya kuhanya yi tlakukela hehla, i mu ponisa Xeole lahasi.

²⁵ Jehova i ta hohlolola a yindlu ya wa matshanza; anilezi i ta tiyisa a mbhingano wa noni. Lu. 1:51; 1 Ped. 5:5

²⁶ A maalakanyo ya wa kubiha manyala ka Jehova; anilezi a timhaka ti nene ta mu tsakisa.

²⁷ Loyi, a navelako a bhinzu i karata yindlu yakwe; anilezi loyi a alako ku rengelelwa i ta hanya.

²⁸ A mbilu ya loyi a lulamileko yi alakanya na yi nga se hlamula; anilezi a nomu wa munhu wo biha wu chulula manyala.

²⁹ Jehova i le kule ni va kubiha; anilezi wazwa mikombelo ya valulamileko.

³⁰ Lezi zi tsakisako mahlo za tsakisa a mbilu; mubiko wu nene wu tiyisa marambu.

³¹ Loye a ndleve yakwe yi ingisako ziluleko zi yisako kuhanyeni, ta tshama xikari ka lava vo tlhariha.

³² Loyi a alako gonziselelo i kanyisa muhefemulo wakwe; anilezi loyi a ingisako ziluleko i kuma kupimisisa.

³³ A ku chava Jehova i gonziselelo ya wutlhari; kutitsongahata ku rangela wudzunzo. Miti. 14:22; 1 Ped. 1:6