Mavingu 14 - Tshwa Bible

¹ A wasati loyi a tlharihileko wa ti akela yindlu yakwe; anilezi a xipumbu xi yi hahlula hi mandla ya xona.

² Loyi a fambako hi kululama wa chava Jehova; anilezi loyi a nga tindleleni to gombonyeka wa mu nyenya.

³ Lomu kanwini ka xipumbu ku na ni nhonga ya kuba matshanza yakwe; anilezi a milomu ya titlhari ya va lonzowota.

⁴ Laha ku nga hiko na tikavi a ranga gi basile; anilezi a wukosi gi enzelekiswa hi ntamu wa tikavi.

⁵ A kustumunyu yi kholekileko a yi hembi; anilezi a kustumunyu ya mawunwa ya hemba wunwa.

⁶ A mutseketseli wa hlota wutlhari kanilezi a nga gi kumi; anilezi za hehuka ka loyi a nga ni kupimisisa ku kuma wutivi.

⁷ U nga hlengeli ni xipumbu; akuva nonwini wa xona a ku na wutivi.

⁸ A wutlhari ga loyi a tlharihileko hi ku tivisisa a ndlela yakwe; anilezi a wupumbu ga zipumbu hi khohlakalo. Efe. 5:15

⁹ A zipumbu zi hleka milanzu; anilezi xikari ka valulamileko ku na ni wunene. Levi 6:1

¹⁰ A mbilu ya tiva kubayiseka ka yona; i munwani a nga ti enghenisi litsakweni la yona.

¹¹ A yindlu ya wa kubiha yi ta hahluliwa; anilezi a tenda ga valulamileko gi ta tiya.

¹² Yi kona ndlela yi wonekako ka munhu na yi lulamile; anilezi magumo ka yona yi yisa kufeni.

¹³ A munhu wa zi kota ku hleka na a bayiseka mbilwini; anilezi a magumo ya kutsaka tingana.

¹⁴ Loyi wa mbilu ya gome i ta kolwa hi mahanyela yakwe; anilezi loyi a lulamileko i ta xuriswa hi lezi zi nga mbilwini yakwe.

¹⁵ A xipumbu xi vumelela timhaka tontlhe; anilezi loyi a tlharihileko wa cuwukisisa laha a fambako ha kona.

¹⁶ Loyi a tlharihileko wa chava, a huma kubiheni; anilezi a xipumbu xi honisa xi ti tsumba.

¹⁷ Loyi a nga ni xizangazangani i maha zilo zo hunguka hi wupumbu; munhu wa makungo ya kubiha wa vengeka. Mav. 12:16; Jak. 1:20

¹⁸ A zipumbu ziga tshomba ya wupumbu; anilezi a va tlharihileko va ambexwa xidlodlo xa wutivi.

¹⁹ A va kubiha va ti koramisa mahlweni ka valulamileko, i va tihanyi le tinyangweni ta valulamileko.

²⁰ A xisiwana xi vengiwa hambu hi muakelane wakwe; anilezi loyi a fumileko i na ni vanghana vo tala.

²¹ Loyi a nyenyako muakelane wakwe wa onha; anilezi i katekile loyi a nga ni wuxinji ka zisiwana.

²² Lava va nga ni makungo ya kubiha va ta lahleka, anilezi a wuxinji ni zinene zi ka lava va nga ni makungo ma nene. 2 Tim. 1:16

²³ A ntiro munwe ni munwani wu na ni nchachazelo; anilezi a kuwulawula ka milomu ntsena ku yisa wusiwaneni.

²⁴ A xidlodlo xa titlhari hi wukosi gabye; anilezi a wupumbu ga zipumbu tingana ntsena.

²⁵ A kustumunyu ya zinene ya tlhatlhisa mihefemulo ya vanhu; anilezi a kustumunyu yi wulawulako wunwa ya kanganyisa.

²⁶ Kuchaveni ka Jehova ku na ni kutsumba; i vana vakwe va tava ni wutshamu ga wuchavelo.

²⁷ A ku chava Jehova i hlowo ya wutomi; a ponisa vanhu maziyweni ya lufo.

²⁸ A wudzunzo ga hosi hi kutala ka vanhu; anilezi a wutsongwani ga vanhu gi lovisa a hosi.

²⁹ Loyi a nonokako ku zangara i na ni kupima; anilezi loyi a hatlisako ku zangara i kulisa wupumbu.

³⁰ A mbilu ya kurula yi nyika wutomi nyameni; anilezi a wukhuxu kubola ka marambu.

³¹ Loyi a tsimbeketako zisiwana i ruka Mumahi wakwe; anilezi loyi a zi zwelako wuxinji wa mu dzunza.

³² A wa kubiha i pengela kubiheni kakwe; anilezi loyi a lulamileko i na ni kutsumba kufeni kakwe.

³³ A wutlhari gi akile mbilwini ya loyi a nga ni kupimisisa; anilezi a maalakanyo ya zipumbu ma tivekiswa.

³⁴ A kululama ku kulisa a tiko; anilezi a xionho i nzhukano ni ka gihi tiko.

³⁵ A nanza gi tlharihileko ga dzunzeka ka hosi ya gona; Kanilezi a zanga yakwe yi le hehla ka loyi a wisako tingana.