Mavingu 12 - Tshwa Bible

¹ Loyi a ranzako ziluleko i ranza wutivi; anilezi loyi a vengako ku kawukwa xipumbu.

² A munhu nene i kuma thomo hi ka Jehova; anilezi a munhu wa makungo ya kubiha i ta mu kona.

³ A munhu, a nga ta tiyisiwa hi ku biha; anilezi a mutsu wa valulamileko cima wu nga tsekatsekiswa.

⁴ A wasati nene xidlodlo hlokweni ya nuna wakwe; anilezi loyi a mahako tingana i kotisa kubola marambyini yakwe.

⁵ A maalakanyo ya valulamileko ma lulamile; anilezi a makungo ya va kubiha nja kukhohlisa.

⁶ A timhaka ta va kubiha ti ongozela nkhata; anilezi a nomu wa valulamileko wu ta va tlhatlhisa.

⁷ A va kubiha va ta wisiwa, va lova; anilezi a yindlu ya valulamileko yi ta sala yi yimile.

⁸ A munhu i ta dzunziwa maringano ni wutlhari gakwe; anilezi loyi wa mbilu yi bihileko i ta nyenyiwa.

⁹ Loyi a kanyiswako na a hi ni nanza, hunza loyi a ti dzunzako na a nga hi na xibaba.

¹⁰ A munhu wo lulama wa chela kota hi wutomi ga xifuyo xakwe; anilezi a wuxinji ga laʼvo biha hi lunya.

¹¹ Loyi a ti rimelako simu gakwe i ta xura; anilezi loyi a lanzelako lezi zi nga nyawuliko a nga na kupima.

¹² A wa kubiha i navela muphango wa va kubiha; anilezi a mutsu wa valulamileko wu pswala mihanzu.

¹³ Loyi wa kubiha i phasiwa hi kugoha ka nomu wakwe; anilezi a va kululama va ta pona zikaratweni.

¹⁴ A munhu i ta eneliswa hi wunene ga mihanzu yi humako nonwini wakwe; munhu i ta tlheliselwa hi ku ringana ni mitiro ya mandla yakwe. Mat. 16:27; 2 Kor. 5:10

¹⁵ A ndlela ya xipumbu yi lulamile kuwoneni ka xona; anilezi loyi a ingisako wusungukati i tlharihile.

¹⁶ A xipumbu xi kombisa a zanga ya xona xikanwe; anilezi a munhu a tlharihileko wa fihla tingana.

¹⁷ Loyi a wulawulako zinene i kombisa kululama; anilezi a kustumunyu ya mawunwa ya khohlisa.

¹⁸ Va kona lava va wulawulako timhaka ti tlhavako khwatsi i supado; anilezi a lirimi la a tlharihileko mbutomi.

¹⁹ A nomu lowu wu wulawulako lisine wu ta tiyisiwa kala kupinzuka; anilezi a lirimi la mawunwa la xikhatanyana.

²⁰ A kukhohlisa ku lomu timbilwini ta lava va alakanyelako kubiha; anilezi lava va vangako kurula va na ni kutsaka.

²¹ Loyi a lulamileko cima a nga ta welwa hi khombo; anilezi a wa kubiha i ta tala hi khohlakalo.

²² Jehova wa venga a milomu ya mawunwa; anilezi wa tsaka hi lava va mahako kululama.

²³ A munhu wa kupima wa fihla wutivi; anilezi a mbilu ya xipumbu yiba hungu hi wupumbu ga xona.

²⁴ A canja ga loyi a tirako gi ta fuma; anilezi a lolo gi tava hasi ka mikhinyavezo.

²⁵ A kubhinza ka mbilu ku maha munhu a korama; anilezi a gezu gi nene gi tsakisa a mbilu.

²⁶ Loyi a lulamileko i rangela muakelane wakwe; anilezi a ndlela ya va kubiha ya va lovisa.

²⁷ A munhu wa lolo a nga woci a pfimba wakwe; anilezi a kupangama ka munhu i tshomba ya lisima.

²⁸ Lomu ndleleni ya kululama ku na ni wutomi; i lomu ka tisoko ta kona a ku na kufa.